Takotitaunermik 7 - Labrador Inuttitut Heritage Bible

144,000 it Israêlitinit pijut naᴋitjutitauninginik. Inugasaksoarnik piulimajunik, piloringninginiglo.

¹ Makkoa kingorngatigut Engelit sitamat takogivakka, nangertut nunaᴋsûb terreᴋungine sitamane, tigumiartut nunab anoringinik sitamanik, anore anordlerᴋonago nunamut, imânullônêt, napârtullo nalianut.

² Engelillo tâpkoa assingat takogivara, nuilertok seᴋiniub nuilervinganit, Gûdib toᴋosuitub naᴋitjutânik peᴋartok; nippersoarmullo nipliadlarpok Engelinut sitamanut nuna imârbiglo aᴋᴋunarniarlugik perᴋojaumajunut.

³ Oᴋarlunelo: Nuna akᴋunarniarnago, imârbiglônêt napârtullônêt, Gûdipta kivgangit naᴋitjutilugit (nelunaikuserdlugit) ᴋaungitigut perᴋârtinata.

⁴ Naᴋitjutitaujullo unurningit tussarpakka, 144,000 it, naᴋitjusersimajut (nelunaikusersimajut) tamainit Israêlib kinguvângita abvanginit:

⁵ Jûdab kinguvânginit 12,000 it naᴋitjutisimajut; Rûbenib kinguvânginit 12,000 it naᴋitjutisimajut; Gadib kinguvânginit 12,000 it naᴋijutisimajut;

⁶ Asserib kinguvânginit 12,000 it naᴋitjutisimajut; Naftalib kinguvânginit 12,000 it naᴋitjutisimajut; Manassib kinguvânginit 12,000 it naᴋitjutisimajut;

⁷ Simeonib kinguvânginit 12,000 it naᴋitjutisimajut; Lêvib kinguvânginit 12,000 it naᴋitjutisimajut; Isassarib kinguvânginit 12,000 it naᴋitjutisimajut;

⁸ Zabulonib kinguvânginit 12,000 it naᴋitjutisimajut; Jôsefib kinguvânginit 12,000 it naᴋitjutisimajut; Benjaminib kinguvânginit 12,000 it naᴋitjutisimajut.

⁹ Mattoma kingorngane takogivunga, ahâglo, inugasaksoarnik kititaujungnangitunik kimut, nelojunit tamainit, inugasaksoarnillo, ingmigôlingajuniglo oᴋauselingnit, iksivautaᴋsûb sângane nangertunik, Saugârsûblo sângane, annorârsimajunik ᴋaᴋortanik, aggangmingnelo Palminik tigumiarlutik.

¹⁰ Nippersoarmut nipliadlarput oᴋarlutiglo: Piuliklerneᴋ tâpsoma pigivâ iksivautaᴋsoarme iksivajub, Gûdipta, Saugârsûblo.

¹¹ Engelillo ilûnatik nangerput iksivautaᴋsoak ilumavlugo angajoᴋaunerôjullo ilumavlugit, ômajullo sitamat ilumavlugit, pâmakterlutiglo iksivautaksûb sânganut, Gûde tuksiarvigivât,

¹² Oᴋarlutiglo: Amen, nakorijaunerlo, nâlengnarnerlo, silatunerlo, ᴋujanarnerlo, nertornarnerlo, pitsartunerlo, ajugaᴋanginerlo Gûdipta pigiligit issoᴋangitomit issoᴋangitomut. Amen.

¹³ Angajoᴋaunerôjullo illangat kiovlune uvamnut oᴋarpok: Ukkua ᴋaᴋortanik annorâlit kikkût? nakillo pivât?

¹⁴ Kiovaralo: Nâlegak, igvit ᴋaujimavat. Ama oᴋautivânga: Ukkua tagva kappianartoksoarmit pijut, annorâtiglo ergortulaukpait, ᴋaᴋorsardlugillo annorâtik Saugârsûb aunganut.

¹⁵ Tamanna pivlugo Gûdib iksivautaksoangata sânganêput, kivgartulâllo uvlôtilugo unnuamelo Tempelingane. Iksivautaksoarmelo iksivajub ᴋollangiarvigênarniarpait.

¹⁶ Kângungnailutiglo imerugungnainiarput, seᴋinermullo pijauniangilat, kiab asianullônêt.

¹⁷ Saugârsûb iksivautaksûb ᴋerᴋanêtub pairiniarmagit, tessiorlugillo imiub ômanartub puilavinginut, Gûdiblo ᴋugviornerit tamaita allarterniarpait ijinginit.