Takotitaunermik 6 - Labrador Inuttitut Heritage Bible

Naᴋitjutit pingasujortut sivorlît angmartauninginik.

¹ Takogivunga, Saugârsûblo naᴋitjutit ipkoa illangat angmarpâ. Omajullo sitamat ipkoa illangat tussarpara, sorlo kallûb nippinganut oᴋartok: Takojartorit.

² Takogivunga, ahâglo horsemik ᴋaᴋortamik; tâpsomalo ᴋângane iksivajok pitiksilijartok, niaᴋôtemiglo tunitsiviolertok, ajugaᴋaranelo ailerpok sâlaᴋarniardlune.

³ Naᴋitjutiblo aipanga (Saugârsûb) angmarmago, ômajub aipanga tussartara oᴋartok: Takojartorit.

⁴ Horsiblo aipanga aupaluktaᴋ anijok; tâpsomalo ᴋânganêtok pitsartunermik tunitsiviolerpok, ullapirsauteᴋarungnairtidlugo nuname, ingmingnullo inuartigêrᴋovlugit, saviksoarmiglo tunitsiviovok.

⁵ Naᴋitjutillo pingajuat (Saugârsûb) angmarmago, ômajut pingajuat tussartara oᴋartok: takojartorit. Takogivunga, ahâglo, horsemik ᴋernertamik; tâpsomalo ᴋângane iksivajok kiktitautîngnik tigumiartok.

⁶ Nippemiglo tussarpunga ômajut taipkoa sitamat akornganit oᴋartomik: sanaugaksat, ôktût atausiardlugo, kênaujârsungmik atautsemik akkeᴋarlit, sanaugâluksallo, ôktût pingasuertorlugo, kênaujârsungmik atautsemik akᴋeᴋarlît, orᴋsorle vainelo asserorniarnagik!

⁷ Naᴋitjutillo sitamangat (Saugârsûb) angmarmago, ômajut sitamangata nippinga tussarpara oᴋartok: Takojartorit.

⁸ Takogivunga, ahâglo, horsemik ᴋataktângajomik; tâpsomalo ᴋânganêtok toᴋomik ateᴋartok, tâᴋtoksûblo (toᴋungajut iningata) malikpâ. Tâpkoalo ajugautitauvut nunamêtut sitamaulivlugit sitamaingit toᴋoniardlugit, saviksoarmullo, kângnermullo, toᴋonartomullo, pisuktinullo nunamêtunut.

⁹ Naᴋitjutillo tallimangat (Saugârsûb) angmarmago, takovunga Altârib atâne Gûdib oᴋausingit pitjutigilugit kigligiutsinitiglo tamakkoninga pitjutigilugit toᴋotaulauktut tarninginik.

¹⁰ Nippersoarmut nipliadlarput oᴋarlutiglo: Nâlegak, hailigiojotit mikseᴋârtôvlutillo, ᴋanok akkunêrtoksoarmik erᴋartuingilatît, auvut akkiniarutiginago taipkonunga nunamêtunût?

¹¹ Atunillo tâpkoa tunitsiviovut annorâmik ᴋaᴋortamik, oᴋautjauvlutiglo, sulle neliutomik anikitomik merngoêrserᴋovlugit, kivgauᴋatitik ᴋatangutitiglo sulle toᴋotauniartut tâpkotitunak illautsiarilugit.

¹² Takogivunga, naᴋitjutit 6 ingat (Saugârsûb) angmarmago, ahâglo, nuna sajukpilâdlarpok, seᴋinerlo tâᴋtoksôlerpok pôksajatut merᴋunit senamajotut, taᴋᴋerlo auktun-ipok.

¹³ Kilaublo uvloriangit nunamut katakput, sorlo aᴋpit aᴋpiᴋutinit katangmatta anorersoarmut aulataujaraigamik.

¹⁴ Kilaglo ᴋemâvok, sorlo aglait imusersimajut, ᴋakᴋallo, ᴋikertallo ilûnaita nûtaulerput inimingnit.

¹⁵ Atanîllo nunamêtut, nâlegaᴋsuillo akluitoksuillo, Angajoᴋâviksuillo, sôngojullo kivgaujullo, kivgaungitullo ilûnatik ijeriartorput ᴋairosungnelo ᴋakᴋallo ᴋongnângine,

¹⁶ Oᴋarlutiglo ᴋakᴋanut imnaksoarnullo: Sitorvigitigut mattuvluta iksivautaᴋsoarme ijsivajub kênanganit, Saugârsublo ningausinganit,

¹⁷ Uvloᴋsoak ningaumavinga neliutingmat, kinalo nâmagijaujungnarniarᴋâ?