Takotitaunermik 5 - Labrador Inuttitut Heritage Bible

Aglait 7 it naᴋitjutilit Saugârsungmut tigujaujut.

¹ Aglangniglo iksivautaᴋsoarme iksivajub aggangita talerpinginêtunik takogivunga, ilungitigut ᴋângitigullo aglagviomajunik, naᴋitjusersimajuniglo naᴋitjutinut 7 nut.

² Engelelo pitsartujoksoak takogivara, nippersoarmut oᴋâladlartok: Aglait ukkua makperlugit naᴋitjutingillo serᴋomidlugit kina nelopᴋotinajangilâk?

³ ᴋilangmiuniglo nunamiuniglônêt, nunab atânêtuniglônêt pijoᴋangilak aglait ukkua makperungnarlugit takunârlugillônêt.

⁴ Kugviudlarpungalo angijomik, nelopᴋotingitoᴋangimat aglait ukkua makperlugit, atuarlugillo takunârlugillônêt.

⁵ Angajoᴋaunerôjullo illangata oᴋarvigivânga: ᴋugviornak; ahâk Loeve Jûdab kinguvânga, imna Dâvidib amânga, sâlaᴋarsimavok, aglait ukkua makperlugit, naᴋitjutingillo 7 it serᴋomidlugit.

⁶ Takogivunga, ahâglo iksivautaᴋsûb ᴋerᴋane, ômajullo sitamat, angajoᴋaunerôjullo akorngane Saugârsungmik nangertomik, toᴋotaujotun-itomik, nakjuᴋarlune 7 nik, ijeᴋarlarmelo 7 nik, tâpkoa Gûdib anerningit 7 it, tilijaujut nunanut tamainut.

⁷ Tâpsomalo tigujartorpait aglait iksivautaksoarme iksivajub aggangita talerpinginit.

⁸ Aglaillo tigungmagit, ômajut sitamat taipkoa Angajoᴋaunerôjullo 24 it pâmakterput Saugârsûb sânganut, ilûnatiglo atunit harfeᴋarput iluleᴋuteᴋarlutiglo goldinik isseluanerutiksamik tatatunik; tamadja ivsornaitut tuksiarningit.

⁹ Imgerumiglo nutâmik imgerput oᴋâlavlutiglo: Igvit nelopᴋotingivitôvotit aglait tigulugit, naᴋitjutingillo angmarlugit; igvit toᴋotaugavit, aungnullo pisiarilauraptigut, Gûdemut perᴋutiksautiluta, sunatuinarnit kinguvârênit, oᴋauselingnillo, inugasaksoarnillo, nelojunillo;

¹⁰ Ataniotilaukpaptigut ajoᴋertuijungortilutalo Gûdiptingnut, atanioniarpogullo nunaᴋsoarmiunut.

¹¹ Takogivunga, nippemiglo tussarlunga Engelivaksoarnit iksivautaᴋsûb avatânit, ômajullo avatânit, angajoᴋaunerôjullo avatânit; unurningillo tentausendit tentausendêrtorlutiglo, tausendillo tausendêrtulaukput,

¹² Nippersoarmullo oᴋarput: Saugârsuk toᴋotaujok nelopᴋotingivitôjok pigivlugit pitsartunerlo, akluinerlo, silatunerlo, sôngonerlo, nâlengnarnerlo, nertornarnerlo, nakorijaunerlo.

¹³ Pingortitallo ilûnamasiatik, ᴋilangmiullo nunamiullo nunab atânêtullo, imarbiublo iluanêtut tamaita tussarpakka oᴋauseᴋartut: Iksivautaksoarme iksivajok Saugârsuglo ᴋujanarsilîk nâlengnarsilutiglo nertornarsilutiglo, ajugauviojotôvlutik issoᴋangitomit issoᴋangitomut.

¹⁴ Omajullo sitamat oᴋarput: Amen. Angajoᴋaunerôjullo 24 it pâmakterdlutik tuksiarvigivât issoᴋangitomit issoᴋangitomut ômatsainartok.