Takotitaunermik 4 - Labrador Inuttitut Heritage Bible

Johannesib Gude iksivautaᴋsoarme iksivajok ᴋilangme, ômajullo sitamat, angajoᴋaunerôjullo 24 it takovait.

¹ Tamattoma kingorngagut takovunga, ahâk, upkuamik upkuêrtaujomik ᴋilangme; nippelo sivorlek tussalauktara uvamnut sorlo tiptulaut oᴋartok, tâmna oᴋarivok: tamaunga majorarit takotitsomagapkit mattoma kingorngane pijomârtuksanik.

² Tagvainarlo anernermêtunga. Ahâglo, iksivautaksoak ilijaumajok ᴋilangme, iksivautaᴋsoarmelo iksivajoᴋarpok.

³ Iksivajub tâpsoma tautua sorlo ujaraktut Jasperetut Sardisetullo; ajagutaublo iksivautaksoak ilumavâ, tautua Emaraldetunitok.

⁴ Iksivautallo 24 it iksivautaksoak ilumavât, iksivautanelo tâpkonane angajoᴋaunerôjut 24 it iksivavut, ᴋaᴋortanik annorâlit, niaᴋomingnelo niaᴋôteᴋarlutik goldinik.

⁵ Iksivautaᴋsoarmillo anivut ᴋaumalaglo kalluglo nippillo; nennergutillo 7 it ilomalit ikoalavut iksivautaᴋsûb sângane, tamadja Gûdib Anerningit 7 it.

⁶ Iksivautaᴋsûblo sângane igalâksajaujârtomik imârbiksoakarpok, alligotun-itomik; iksivautaᴋsûblo ᴋerᴋagut avatâgullo iksivautaᴋsûb sitamanik ômajoᴋarpok, sâmikullo tunumikullo ilûnaitigut ijilingnik.

⁷ Omajorlo sivorlek loevetun-itok, ômajublo aipanga nochatunitok, ômajullo pingajuat kênaᴋartok inuktut, ômajullo sitamangat nektoraliktut tingijotun-itok.

⁸ Omajullo tâpkoa sitamat atunit isaroᴋarput pingasujortunik, ilumikullo ilûnâne ijilit, inilangajungnangerput uvlôtilugo unnuamelo, oᴋarlutik: Hailig, Hailig, Hailigeovok Gûde Nâlegak, ajugaᴋangitovitôjok, ilauktok, tamattomanêtorlo, ᴋaijomârtorlo.

⁹ Omajullo (sitamat) nertulerangatsuk nakorivlugolo ᴋujagiviklugolo iksivautaᴋsoarme iksivajok, issoᴋangitomit issoᴋangitomut inôjok,

¹⁰ Angajoᴋaunerôjut 24 it pâmaktervigivât iksivautaᴋsoarme iksivajok, tuksiarvigivlugo issoᴋangitomit issoᴋangitomut inôjok, niaᴋôtitiglo ilivait iksivautaᴋsûb sânganut, oᴋâlavlutik:

¹¹ Nâlegak, igvit nelopᴋotingivitôjotit pigilugit nertornarnerlo nâlengnarnerlo pitsartunerlo; igvit tamaitaᴋsuit pingortilaurangne; igvillo perᴋogangne, ilerput pingortisimavlutiglo.