Takotitaunermik 3 - Labrador Inuttitut Heritage Bible

Illagênut Sardusemêtunut, Filadelfiamêtunut, Laodiseamêtunut.

¹ Illagêllo Sardusemiut Engelingat aglagvigiuk Gûdib: anerninginik 7 nik, uvlorianiglo 7 nik peᴋartok imâk oᴋarpok: Piniarnitit ᴋaujimavakka, ômanerartaugavit toᴋungavlutillo.

² Pigâlerit, assitillo toᴋokassalertut nakoksitiniakit! piniarnitit Gûdib sângane nâmaksitsiangitut nagvârapkit.

³ Tamanna pivlugo erᴋainiarit pigilauktarnik tussalauktarniglo, tamakkoalo malingniakit ᴋaᴋialerlutillo. Pigârniangikuvit tikidlarniarpagit tigliktotut, stundillo naliane tikiviginiarmangâpkit naloniarpotit.

⁴ Inuᴋoteᴋarpottitauk ikitunik Sarduseme, annorâmingnik ipeᴋtotitsilaungitunik; tâpkoalo arvertaᴋatigijomârpânga ᴋaᴋortanik annorâlijarlutik, taimaituksaugamik.

⁵ Sâlaᴋartok ᴋaᴋortanik annôrârtitauniarpok, atingalo pêrniangilara aglangnit ômanartunit, atingalo oᴋautigijomavara Atâtamnut Engelinginullo.

⁶ Siutiliub tussarligit Anernerub oᴋausingit illagênut.

⁷ Illagêt Filadelfiamiut Engelingat aglagvigiuk: Imâk oᴋarpok Hailigeojok, mikseᴋârtok, Dâvidib pêrutânik peᴋartok; palangairutjârsijorlo naliata palangairungnangitanganik; palangairsijorlo naliata palangairutjârungnangitanganik.

⁸ Piniarnitit ᴋaujimavakka. Ahâk, upkuêrutjilaukpunga ilingnut naliata palangairungnangitanganik; pitsartunearsuᴋaravit, oᴋauseralo torᴋulaukpat, ateralo misiarutigilaungilat.

⁹ Ahâk, Sâtanasib ajoᴋertuivianit illangit pitiniarpakka, oᴋartut Jûdionermingnik taimainatiglo, saglovlutigle pijut. Ahâk, iliorvigijomavakka tikerᴋovlugit, itikavît sânganut tuksiarlutik, illitarsiniarlutiglo, igvit nagligigapkit.

¹⁰ Torᴋulaurangne oᴋausek ᴋenuersârnimnik, uvangatauk saputijomavagit neliutomit ôktorlungnartomit, silaᴋsoarmiunut tamainut tikitsomârtomit, ôktorlugit nuname nunaᴋartut.

¹¹ Ahâk, ᴋainiarpunga mânakut; pigijarnik sapkutsitaililutit pît, niaᴋôtiksarnik tigusijokarᴋonago.

¹² Sâlaᴋartok sukkangortitsomavara Gûdima iglungane, tamattomangallo kingorngane anijungnainiarpok. Gûdimalo atinga aglagomavara tâpsomane Jerusalemiblo nutâb atinga, Gûdima iglogasaksoangita ᴋilangmit akᴋartut Gûdimnit, ateralo taimna nutâk.

¹³ Siutiliub tussarligit Anernerub oᴋausingit illagênut.

¹⁴ Illagêt Laodiseamiut Engelingat aglagvigiuk: Tamadja oᴋautigivâ Ameneojub, nalâgôrlunelo mikseᴋârtôvlunelo kigligiutsijub, Gûdib pingortitangita pigiarningata:

¹⁵ Piniarnitit ᴋaujimavakka, niglingilatillônêt ônarlungillatillônêt; ᴋanoktôk niglilutit ônarlutillônêt!

¹⁶ Nerromikaville, niglinaglônêt ônarnaglônêt, ᴋanimnit oriaromârpagit.

¹⁷ Imâk oᴋauseᴋarpotit: Akluipunga pitaᴋadlarpungalo, ajoksatsangitunga; nalovlutillo ajudlaravit, takominaidlalarpullo, aklujoksôlarpillo, tautungitôlarpillo, annorâᴋarnaglo.

¹⁸ Perᴋovagit tagva, goldemik ikomamut sujungaititaumajomik pisiniarᴋovlutit uvamnit, akluilerᴋovlutit, ᴋaᴋortaniglo annorânik atitilutit, annorâᴋanginivît kangunarninga sakᴋerᴋonago, ijîkiglo mingoakik ijisiumut, tautoᴋovlutit.

¹⁹ Nagligijakka pidlarlugit ᴋaujisarpakka. Taimaimat ataruililutit ᴋaᴋialerit.

²⁰ Ahâk, upkuamêpunga avilortarlungalo. Nippimnik tussartokarpat upkuêrlunelo, tâmna iterviginiarpara, Kommunionemiglo nerreᴋatigivlugo, tâpsomalo nerreᴋatigivlunga.

²¹ Sâlaᴋartok iksivaᴋojomavara illagilunga iksivautamne; sorlotauk uvanga sâlaᴋalaurama, Atâtagalo iksivaᴋatigigapko iksivautangane.

²² Siutiliub tussarligit Anernerub oᴋausingit illagênut!