Takotitaunermik 22 - Labrador Inuttitut Heritage Bible

Imermiglo napârtuniglo ômanartunik. Kaiblaijutiksanik kuksasungnartunik.

¹ Unertuivorlo uvamnut kôngmik issungitomik, ômanartomik imalingmik, alligoᴋtut ᴋaumatigijomik; tâmna anivok Gûdib Saugârsûblo iksivautaksoanganit.

² (Iglugasaksuillo) apᴋosiningita ᴋerᴋane kôblo senîgingne tamangne napârtoᴋalaukpok ômanartunik; tâpkoa 12 inik ingmigôlingajunik paungaᴋalaukput, takᴋinelo tamaine nutânik paungaᴋaᴋattarput, napârtullo millukatangit atsuiligutiksauvut nelojunut.

³ Ominartoᴋarungnairivok, Gûdiblo Saugârsûblo iksivautaksoâgik tâpkonanêtsomârpuk, kivgangitalo kivgartoromârpât,

⁴ Kênangalo takojomârlugo; atingalo ᴋaunginêtsomârpok.

⁵ Tagvane unnuaᴋarniangilak, ᴋaumajutiksamiglo seᴋiniublônêt ᴋaumaninganik pijariaᴋarnianginivut, Gûdib Nâlekab ᴋaumarsarniarmagit, ataniotijomârpullo issoᴋangitomit issoᴋangitomut.

⁶ Oᴋautivângalo: Oᴋautsit tamakkoa mikseᴋârtôvlutiglo saglojuitôvut. Gûdiblo, nelautaijut ivsornaitut Nâlegangata, Engeline tililaukpâ, kivgaminut takotitserᴋovlugo mânakut neliutsomârtuksanik.

⁷ Ahâk, mânakassâkut ᴋainiarpunga. Piloridlarpok torᴋoijok oᴋautsinik nelautaimajunik aglangne tamakkonane.

⁸ Uvanga tagga Johannese, tussarlugillo takolaukpakka tamakkoa. Tussarlugillo takogapkit, pâmakterpunga Engelib tamakkoninga uvamnut takotitsijub itiganginut tuksiarvigivlugo.

⁹ Oᴋarvigivângalo: Udsertorit, taimailiornak! Kivgauᴋatigigamga, ᴋatangutivîllo nelautaijut, tâpkoalo oᴋautsinik aglangnêtunik tamakkonane torᴋuijut (kivgauᴋatigivânga). Gûde tuksiarvigiuk.

¹⁰ Oᴋarvigigivângalo: Naᴋitjuserniangilatit (ᴋaujijautailitiniangilatit) oᴋautsit nelautaimajut aglangne tamakkonanêtut, neliutiningat ᴋaningmat.

¹¹ Idluitomik piniartok idluitomik pitsainarle; ipektujorlo ipektutsainarle; idluartorle idluatsainarle, ivjornaitorlo ivjornaitsainarle!

¹² Ahâk mânakasâkut ᴋainiarpunga, akkiliutiksaralo neksarlugo, akkileriartordlugit piniarningit maliklugit.

¹³ Alfauvunga Omegauvlungalo, pigiarneovlungalo naggatauvunga, sivorliovlungalo kingorliovunga.

¹⁴ Piloridlarput perᴋojanginik nâlektut, pitsartuneᴋarᴋovlugit napârtomut ômanartomut, itertarvikullo iterᴋovlugit iglogasaksoarnut.

¹⁵ Silatânêpulle ᴋingmît tôrngijut, ajortulijullo, inuartullo, gûdingoaniglo kivgartortut, ilûnatiglo saglunermik ivlersijut, saglovlutiglo pijut.

¹⁶ Uvanga Jêsuseojunga Engeliga tililaukpara tamakkoninga kigligiutsivigiluse perᴋovlugo illagêktunut (ilingajuksanik). Dâvidib amârivlungalo kinguvârivânga, uvloriangojunga ᴋausiut ᴋaumaridlartok.

¹⁷ Anernerlo nuliaksarlo oᴋarpuk: ᴋait! Tamatttomingalo tussartok oᴋarle: ᴋait! Imeruktorlo ᴋaile, pijomajorlo imermik ômanartomik pile akkeᴋangitomik.

¹⁸ Kigligiutivakkale ilûnaita oᴋautsinik nelautaimajunik tussartut aglangne tamakkonanêtunik: Tamakkoninga illaᴋartitsijoᴋarpat, Gûde tagva tâpsomunga illaᴋartitsiniarpok kappianartunik aglangne tamakkonane aglaksimajunik.

¹⁹ Illangaijoᴋarpat oᴋautsinik nelautaimajunik aglangne tamakkonanêtunik, Gûdib tagva illangaivigijomârpâ piksanganik aglangnit ômanartunit, iglugasaksoarnillo ivsornaitunit, aglaksimajunillo aglangne tamakkonane.

²⁰ Kigligiutsijok tamakkoninga oᴋarpok: Âhamarik, mânakasakut ᴋainiarpunga. Amen ilâ, ᴋailaurittôᴋ Nâlegak Jêsuse!

²¹ Nâlegapta Jêsusib Kristûsib saimaningata illagilise ilûnase! Amen.