Takotitaunermik 21 - Labrador Inuttitut Heritage Bible

ᴋilak nutâk, nunalo nutâk, Jerusalemiblo nutâb ilinganinga, anerimajullo piloringningat oᴋautauvut.

¹ ᴋilangmiglo nutâmik, nunamiglo nutâmik takogivunga. ᴋilak sivorlek nunalo sivorlek pêrmanik, imarbiglo itsungnairivok.

² Uvangalo Johannese takovunga iglugasaksoarnik ivjornaitunik, Jerusalemik nutâmik, Gûdemit ᴋilangmit akᴋartunik, âkᴋiksorsimajunik, nuliaksatut pinnarnarsititaumajotut uiksaminut (ilingavlune).

³ Tussarlarmalo nippersarmik iksivautaksoarmit, oᴋartomik: Ahâk tagga Gûdib tupinga inungnêtok! Tâpsomalo iglomioᴋatiginiarpait inuᴋotigilaitalo; Gûdiblo nangminek illaginiarpait, tâpkoalo Gûdiginiarpât.

⁴ Kugviornerillo tamaita Gûdib allarterniarpait ijinginit, toᴋolo itsungnairpok, kiksarnermiglônêt, niplianermiglônêt, ânianarnermiglônêt pijokarungnainiarpok; sivorliojut itsungnairmatta.

⁵ Iksivautaksoarmelo iksivajok oᴋarpok: Ahâk, tamaitaᴋsuit nutângortipakka. Oᴋarvigivângalo: Aglagit; oᴋautsit tamakkoa mikseᴋârtôvlutik okpernartoksôngmatta.

⁶ Oᴋarvigigivânga: Pimajarêrpok. Alfauvunga Omegauvlungalo, pigiarniovlungalo naggatauvunga. Imeruktok imiub ômanartub puilavinganit imertitsomavara akkeᴋangitomik.

⁷ Sâlaᴋartok kingormgujijomârpok tamainik, Gûdiginiarpângalo, uvangalo erneriniarpara.

⁸ Maggogusertulle, okpingitullo, maᴋojungnartullo, inuartullo, assiniartullo, angakôjullo, Gûdeungituniglo kivgartortut, saglojullo ilûnatik, tâpkoa pijaksaunerijomârtangit ᴋôrᴋumêput orᴋsorutelingmik ikomaᴋsoalingme; tamadja toᴋub aipanga.

⁹ Engelillo 7 it iluleᴋutilit 7 inik pitalingnik kappianartut kingorliksanginik illangata tikipânga oᴋarvigivlunga, oᴋarlunelo: ᴋait takotitsomagapkit arnamik ipsominga Saugârsûb nuliaksanganik.

¹⁰ Aularutivângalo anernikut ᴋakᴋaksoarmut kingiktoksoarmut ᴋemergotidlunga iglugasaksoarnik, Jerusalemik ivsornaitomik, ᴋilangmit akᴋartunik;

¹¹ (Jerusalem tamanna) Gûdib ânanaunersoanganik pilik, ᴋaumaningatalo ujarak pivianarnerpâᴋ adsigivâ, Jasperetut ᴋaumatigijok.

¹² Avaloᴋarporlo angijunik poktojunik, 12 iniglo Itertarviksoaᴋarpok, itertarviksuillo ᴋângine 12 inik Engeleᴋarlune, aglaksimajuniglo aternik, tagva Israêlib ᴋitorngangita kinguvârêngninginik.

¹³ Itertarviksuit ununga sangmijut pingasôvut, itertarviksuillo avunga sangmijut pingasôvut, itertarviksuillo aunga sangmijut pingasôvut, itertarviksuillo paunga sangmijut pingasôvut.

¹⁴ Iglugasaksuillo avaloksoangit tungaveᴋarput 12 nik, tamakkonanelo Saugârsûb Apostelingita 12 it atingit aglaksimavut.

¹⁵ Uvamnullo oᴋartok suvlolingmik goldemik ajaupiangojârtomik tigumiarpok, iglugasaksuit itertarviksoangillo avaloksoangillo ôktorniardlugit.

¹⁶ Iglugasaksuillo sitamanik terreᴋoᴋarput, takiningillo silingningillo adsigêkput. Iglugasaksuillo suvlolingmut ôktorpait, mailititut 1,500 ititut. Takininga, silingningalo poktuningalo adsigêkput.

¹⁷ Avalungittauk ôktorivait, tallertitut igluinartitut 144 ititut, inûb ôktûtinga maliklugo, Engelib atortanga.

¹⁸ Iglugasaksuillo avalungita senamaningit Jaspereovut, iglugasaksuillo goldênauvut, igalâksajatut ᴋaumajotut.

¹⁹ Iglugasaksuillo avalungita tungavingit ânanausititauvut, sunatuinarnik ujarᴋanik pivianartoksoarnik pilit: Tungavik sivorlek Jasperemik, aipanga Safiremik, pingajuat Kalzedônemik, sitamangat Emaraldemik,

²⁰ Tallimangat Sardônigemik, 6 ingat Sardisemik, 7 ingat Krisolitemik, 8 ingat Berillemik, 9 ingat Topâsemik, 10 ingat Krisoprasemik, 11 ingat Hiazintemik, 12 ingat Ametistemik.

²¹ Itertarviksuillo sapangauvut 12 it, itertarviksuillo atunit sapangak atausek, iglugasaksuillo apᴋosiningit goldênauvut, igalâksajatut ᴋaumajotut.

²² Tempelemiglo tâpkonane takungilanga; Nâlegak Gûde ajugaᴋangitovitôjok Saugârsuglo Tempelegingmagik.

²³ Iglugasaksuillo seᴋinermut takᴋermullônêt ᴋaumarsartaujariaᴋangilat; Gûdib ânanauningata ᴋaumartingmagit, Saugârsuglo ᴋaumautigivât.

²⁴ Nelojullo piulijauniartut arvertarniarput tâmna ᴋaumautigilugo; nunablo ataningita ânanaunitik tagvunga pitiniarpait.

²⁵ Itertarviksoangillo upkuartauniatsangilat uvlôtilugo, (tagvane unnuaᴋatsangimat,)

²⁶ Nelojogasaksuillo pinnarnarningat nertornarningillo tagvunga pititauniarput.

²⁷ Ipeᴋtojut neliat taᴋamunga piniatsangilak, maᴋojungnartulijorlo saglojorlônêt; Saugârsûble aglangine ômanartune aglaksimajut kissimik iterniarput.