Takotitaunermik 20 - Labrador Inuttitut Heritage Bible

Sâtanasib ᴋelaksortauninganik. Makinermik sivorlermik. Kristûsib ataniovinganik jârine 1,000 ine nuname. Gogemik Magogemiglo. Erᴋartuivingmik.

¹ Engelemiglo takogivunga ᴋilangmit akᴋartomik; tâmna pêrumik netteᴋangitomut peᴋarpok, ᴋelaumgujaᴋsoarniglo aggangminut tigumiarpok.

² Kuglugiaksoarâluk tagva tiguvâ, ᴋuglugiatoᴋak, tagva passiklerte Sâtanaselo, jârinelo tausendine ᴋelaksorsimatipâ.

³ Netteᴋangitomullo egipâ, parngnanairpâlo naᴋitjuserlugolo ᴋângagut, nelojunik tamartitsijungnairᴋovlugo jârit tausendit nâᴋârtinagit; tamakkoale kingorngatigut ᴋelarutjârtaujariaᴋarpok anikitoarsungmik.

⁴ Iksivautaniglo takogivunga; tâpkununga ingilerput, erᴋartuinermiglo perᴋojauvut. Niaᴋoêrtaulauktullo Jêsusemik kigligiutsinek Gûdiblo oᴋausinga pitjutigilugik, nergjumiglo adsingoanganiglônêt tuksiarveᴋalaungitut, nelunaikutanganiglônêt tigusilaungitut ᴋaungmikut aggangmikullo, tâpkoa tarningit takogivakka: tâpkoa ômarput ataniotivlutiglo Kristûse illagilugo jârit tausendit nâvlugit.

⁵ Toᴋungajulle taipkoa assingit ômartitaungilat, jârit tausendit nâᴋârtinagit. Tamadja makinek sivorlek.

⁶ Piloridlarpok ivjornaitôvlunelo makinermik sivorlermik illangiutijok; taimaitomut toᴋub aipanga pitsartuneᴋangimat, Gûdemullo Kristûsemullo ajoᴋertuijôjomârput, atanioteᴋatigilugolo jârine tausendine.

⁷ Jârillo tausendit nâkpatta, Sâtanase ᴋelarudjârtaujomârpok parngnanairsortaumavingminit.

⁸ Aijomârlunelo nelojut tamartitsartorlugit nunaksûb terreᴋunginêtut sitamane, Goglo Magoglo katitiniardlugit sorsugiartorᴋovlugit, siorᴋatitut imarbiub kiglinganêtutitut unuktigijut.

⁹ Nunablo naternaksoanganut pivut, ivjornaitullo sorsuktoᴋutsoangita tangmârvingit iglugasaksuillo naglingnartut ilumavait. Ikoma tagva katakpok Gûdemit ᴋilangmit nungutidlugit.

¹⁰ Sâtanaselo tâpkoninga tamartitsijok egitauvok ᴋôrᴋumut orᴋsorutelingmik ikomaᴋsoalingmut, nergjutsûb nelautaijublo nellangaitub iningangnut; âniatitauniarivullo uvlôtilugo unnuamelo issoᴋangitomit issoᴋangitomut.

¹¹ Iksivautaksoarmiglo ᴋaᴋortamik takogivunga, tâpsomanelo iksivajomik; tâpsoma kênanganit nunalo ᴋilaglo ᴋemâvuk, tâpkungnungalo iniksamik nagvârtoᴋangilak.

¹² Toᴋungajullo takogivakka, mikijullo angijullo, Gûdib sângane nangertut. Aglaillo makpertaulerput; aglaillo assingit makpertaulerivut, tagva ômanartut. Toᴋungajullo erᴋartortauvut, piniarningit aglangne aglaksimajut maliklugit.

¹³ Imarbiublo toᴋungajut iluminêtut ᴋaipait, tâᴋtoksûblo toᴋungajut iluminêtut ᴋaitinivait, ilûnatiglo erᴋartortauvut piniarningit maliklugit.

¹⁴ Toᴋolo tâᴋtoksoarlo egitauvuk ᴋôrᴋumut ikomaᴋsoalingmut. Tamadja toᴋub aipanga.

¹⁵ Neliat aglaksimanane aglangne ômanartune nagvârtaukpat, tâmna egitauvok ᴋôrᴋumut ikomaksoalingmut.