Takotitaunermik 2 - Labrador Inuttitut Heritage Bible

Aglangnik illagêktotalingnut 7 inut ilingajunik: illagênut Efêsusemêtunut. Smirnamêtunut, Pergamusemêtunut, Tiatîramêtunut.

¹ Illagêt Efêsusemiut Engelingat aglagvigiuk: Uvloritjanik 7 inik talerpingminut tigumiartok, nennergoarvît 7 it goldit akorngane arvertartok imâk oᴋarpok:

² Piniarnitit senanîllo ᴋenuersârnîllo ᴋaujimavakka, idluitulijullo ᴋenuersârvigijungnanginangne, Apostelionermingniglo oᴋartut, taimainatiglo ôktulaurangne, nagvârlutillo saglotojoksôngmatta.

³ Kunutuidlutit ᴋenuersârlutillo atera pivlugo senavotit, merngortulaunaglo.

⁴ Erᴋartuijutiksaᴋarpungale ilingnut; nagligosungnek sivorlek sorairtinangne.

⁵ Erᴋailerit, sunamit katangneravit, ᴋaᴋialerillo, piniarnerit sivorlît piniarlugit. Pingikuville, tikisârniarpagit, nennergoarvît ininganit pinguvlugo nûtsomârpara, ᴋaᴋialingikuvit.

⁶ Mattomingale peᴋarpotit ômisûtigigangne Nikolaitit piniarningit, tâpkoa uvangatauk ômisûtigivakka.

⁷ Siutiliub tussarligit Anernerub oᴋausingit illagênut: Sâlaᴋartok nerrititsomavara napârtomit ômanartomit, Gûdib Paradîsinganêtomit.

⁸ Illagêt Smirnamiut Engelingat aglagvigiuk: Sivorliovlunelo kingorliojok toᴋolauklunelo ômarmijok imâk oᴋarpok:

⁹ Piniarnitit ᴋaujimavakka, kappiasungnîllo aklunîllo (akluigalloartotit), mitautaunîllo oᴋartunut Jûdionermingnik taimainatiglo, Sâtanasible ajoᴋertuivinganut ilingavut.

¹⁰ Sivôraginiarnagit nelîllônêt kappianartut ilingnut neliutuksat. Ahâk Sâtanasib illapse illangit parngnanairsimavingmut pititsomârpait, ôktortauᴋovluse kappiasuktitauᴋovluselo uvlunik 10 nik. Soᴋosijuilerille toᴋo tikidlugo, tagva niaᴋôtemik ômanartomik tunitjivigijomagapkit.

¹¹ Siutiliub tussarligit Anernerub oᴋausingit illagênut: Sâlaᴋalertok toᴋub aipanganut pijauniangilak.

¹² Illagêt Pergamusemiut Engelingat aglagvigiuk: Ipiktomik igluktut kênalingmik saviksoalik imâk oᴋarpok:

¹³ Sulijatit ᴋaujimavakka, nunaᴋarnîllo nane, Sâtanasib iksivautaᴋsoangata ininganek ateralo atavigigangne, okpernerlo uvamnut misiarutiginago uvlune ipkonane aglât, Antipase ataruilivlune uvamnik kigligiutsijok toᴋotaungmat ilipsingne, Sâtanasib ineᴋarviane.

¹⁴ Mikijomigle erᴋartuijutiksaᴋarpunga ilingnut, tagvane inuᴋoteᴋaravit Balaamib ajoᴋertûtânik nâlektunik; tâpsoma Balake ajoᴋertormago, Israêlib ᴋitornganginut aporviksarsiorᴋovlugo, nerrerᴋovlugit Gûdeungitunut tunergutinik, assiniarᴋovlugillo.

¹⁵ Taimaktauk inuᴋoteᴋarmigavit, Nikolaitit ajoᴋertûsinginik nâlektunik, tamanna ômisûtigivara.

¹⁶ ᴋaᴋialerit! pingikuville tikisârniarpagit, sorsugiartorlugit ᴋanerma saviksoanganut.

¹⁷ Siutiliub tussarligit Anernerub oᴋausingit illagênut: Sâlaᴋartok nerrititsomavara Mannanik ijersimajunik; tunitjivigijomavaralo ujarᴋamik ᴋaᴋortamik, atermiglo nutâmik ujarᴋamut aglaksimajomik, kimut illitarijaungitomik, inuata kisime (illitarivâ).

¹⁸ Ilagêt Tiatîramiut Engelingat aglagvigiuk: Gûdib erninga ikomatut ikoalajotut ijeᴋartok, itigaliglo ᴋaᴋᴋorlertun-itunik, imâk oᴋarpok:

¹⁹ Piniarnitit ᴋaujimavakka, nagligosungnîllo, kivgartornîllo, okpernîllo, ᴋenuersârnîllo, sulidlaravillo kingorlît pivalliatilugit sivorlinit.

²⁰ Mikijomigle erᴋartuijutiksaᴋarpunga ilingnut, arnâluk Jesabele nelautaijôvlune oᴋartok, inertinginangne, ajoᴋertuinerlugangat kivgakka uivêrivlugit assiniarᴋovlugit, nerritiniarlugillo tunergutinik Gûdeungitunut.

²¹ Piviksaᴋartilaukparalo ᴋaᴋialerᴋovlugo anguniarnerminik, ᴋaᴋialingilarle.

²² Ahâk, innangavingmut egipara, kappianartoksoarmullo pitilugit tâpsominga arnarnialauktut, ᴋaᴋialingipatta piniarnermingnik.

²³ ᴋitorngangillo anauvlugit toᴋotsomavakka. Illagêllo ilûnatik nelojungnainiarpânga, taᴋtuniglo ômatiniglo kiglisiniartok uvangaugama, ilûnaselo atunit piniarvigijomârpapse iliornerijase maliklugit.

²⁴ Ilipsele oᴋarvigivapse, Tiatîrame amiakôjose, tamattominga ajoᴋertûseᴋangitose, itijuniglo Sâtanasib issumanginik ᴋaujimangitose (taimak ipkoa oᴋarmatta): assianik oᴋumainartomik ilijivigijomangilapse.

²⁵ Pigijase sapkuniarasigik tikitsiarivlunga.

²⁶ Sâlaᴋartok perᴋojamniglo ataruilijok naggatiksamut, tâmna nâlegangortitsomavara nelojunut;

²⁷ Mianeriniarpaillo ajaupiamut kikiangmut, machaliortiblo iluleᴋutingititut serᴋomitsomârpait, sôrlo uvangatauk Atâtamnut perᴋojaugama;

²⁸ Uvloriamiglo ᴋausiumik tunitjivigijomavara.

²⁹ Siutiliub tussarligit Anernerub oᴋausingit illagênut.