Takotitaunermik 19 - Labrador Inuttitut Heritage Bible

Saugârsub nertortauninganik katititauniarvia okpertoᴋotinginut pivlugo. Nergjutsub nelautaijublo nelangaitub sâlagijauningangnik.

¹ Tamakkoa kingorngatigut inugasaksuit nippersoanginik ᴋilangme tussarpunga, oᴋartunik: oᴋartunik: Hallêlaja! piuliklerneᴋ, nakorijaunerlo, nâlengnarnelo, pitsartunerlo pigiligit Nâlekab Gûdipta.

² Erᴋartuiningit mikseᴋârtôvlutiglo idluartôngmatta, anguniartoksoak erᴋartulaungmago, anguniarnerminut nunamik asseroilauktok, kivgamelo aungit akkiniarutigilugit, tâmna pidlalaungmago.

³ Aipanganiglo oᴋarivut: Hallêluja! Iserlungallo ᴋongmuatsainarpok sorairane.

⁴ Angajoᴋaunerôjullo 24 it, ômajullo sitamat ipkoa pâmakterput Gûde tuksiarvigivlugo, iksivautaksoarme iksivajok, oᴋarlutiglo: Amen, Hallêluja!

⁵ Iksivautaᴋsoarmillo nippe pivok: Gûdivut nertorsiuk, tâpsomunga kivgaujose nâlektullo tamapse, mikijullo angijullo!

⁶ Inugasaksuillo nippingit tussarpakka, kôksûb nippingatut, kallûblo angijoksûb nippingatut oᴋartut: Hallêluja! Gûdib ajugaᴋangitovitôjub nâlegauvik pigingmago.

⁷ ᴋuviasulerta serrilutalo nâlengniarlugo; Saugârsûb katititauvia okpertoᴋotiminut neliutingmat, nuliaksangalo ingminik âᴋiksorsimavok.

⁸ Tâmnalo nuliaksak tunitsiviovok annorâᴋartitauvlune ipeᴋtongitomik saitemik ânanamik. (Saitele tagva ivjornaitut idluartitauningat.)

⁹ Oᴋarvigivângalo: Aglagit: Piloridlarput ᴋairᴋojaujut Saugârsûb Kommunioninganut katititauviksangane. Oᴋarvigigivânga: Tamakkoa Gûdib oᴋausingit mikseᴋârtôjut.

¹⁰ Itiganginullo pâmakterpunga tuksiarvigijomavlugo. Oᴋautivângalo: Udsertorit, taimailiornak! kivgauᴋatigivarma, ᴋatangutivîllo, Jêsusemik kigligiutjuteᴋartut (kivgauᴋatigivânga). Gûde tuksiarvigiuk. (Jêsusemigle kigligiutsinek tagva nelautainerub anerninga.)

¹¹ Kilaglo angmartok takovara, ahâglo horse ᴋaᴋortak, tâpsomalo ᴋângane iksivajok nertornarnermik mikseᴋârnermiglo ateᴋartok, idluartomik erᴋartuivlunelo sorsuklunelo.

¹² Ijîgiglo ikomatut ikoalajotut-ipuk, unuktuniglo niaᴋôteᴋarpok niaᴋomine, aglaksimajomiglo ateᴋarpok kialônêt ᴋaujimangitanganik, nangminek kissime (ᴋaujimavâ).

¹³ Atisimavorlo annorâmik aungmut serparsarsimajomik, atingalo taijauvok Gûdib oᴋausinganik.

¹⁴ Sorsuktoᴋutsuillo ᴋilangmêtut malikpât horsit ᴋaᴋortat ᴋânginedlutik, atisimajut saidinik ᴋaᴋortanik ipeᴋtojoᴋangitunik.

¹⁵ Kaninganillo anijoᴋarpok saviksoarmik ipiktoksoarmik, nelojut unatartaujutiksanganik; mianeriniarpaillo ajaupiamut kikiangmut, tullerniarpâlo iptêjaivik Gûdib ajugaᴋangitovitôjub ilungertudlartub ningausingata vaininganik pitalik.

¹⁶ Ateᴋarivorlo annorâmigullo sibviamigullo aglaksimajomik, imaitomik: Ataniojok atanernut ilûnainut, Nâlegaujorlo nâlekanut ilûnainut.

¹⁷ Engelemiglo takovunga seᴋinerme nangertomik; nippersoarmullo nipliadlarpok tingmitjanut ilûnainut ᴋilaub atâgut tingijunut oᴋarlune: ᴋaititse katimalerluse Gûdeviksôjub nerrimârvianut;

¹⁸ Atanît angajoᴋaujullo uvininginik nerrivluse, sôngojullo uvininginik, horsillo ᴋânginêtullo nerᴋinginik, kivgaungitullo kivgaujullo, mikijullo angijullo ilûnatik uvininginik.

¹⁹ Nergjullo imna, atanîllo nuname, sorsuktoᴋutsoangillo takogivakka katersorsimajut sorsugomavlutik horsib ᴋângane iksivajomut sorsuktoᴋutsoanginullo.

²⁰ Nergjut tagva tigujauvok, tâmnalo illagilugo nelautaijok nelangaitok, tâpsoma takoane tatamnartulidlalauktok, tamakkonunga tamartilaungmagit nergjutsûb nelunaikutanganik tigusimajut, adsingoanganiglo tuksiarveᴋalauktut; tâpkoa magguk ômavlutik egitauvuk ᴋôrᴋumut orᴋsorutelingmik ikomaᴋsoalingmut.

²¹ Assingillo nungudlugit toᴋotauvut saviksoarmut, horseme iksivajub ᴋaninganit anijomut; tingmitjallo ilûnatik nerivut taipkoa uvininginik aᴋeartorlutik.