Takotitaunermik 18 - Labrador Inuttitut Heritage Bible

Babilônib nungutauninganik.

¹ Kingorngagullo Engelemik assianik takovunga pitsartuniliksoarmik, nunalo ᴋaumarsartauvok tâpsoma ᴋaumaninganut.

² Aksororlunelo nipliavok nippersoarmut oᴋarlune: Ochomavok, ochomavok Babilône angijoksoak, iniksauvlunelo Sâtanasinut, iterviksauvlunelo anernernut maᴋojungnartunut tamainut, iterviksauvlunelo tingmitjanut ivsornartunut erᴋsinartunullo tamainut.

³ Assiniarninganut ningautsib vaininganik nelojut ilûnatik imermatta, atanîllo nunamêtut tâpsominga arnarnialaukput, niuverniartullo nunamêtut akluititaumavut ikligudlarninganut.

⁴ Nippemiglo assianik tussarpunga ᴋilangmit, oᴋartomik: Tâpsomangat anititse inuᴋotikka, illangiuterᴋonase, kappiasuktitauninginik.

⁵ Ajortuliningit tôrmatta ᴋilangmut, Gûdiblo issumagivait idluituliningit.

⁶ Akkiniarsiuk, sorlo akkinialaungmase, magguertorluse piniarninginik; ermgusiarsuk imertitsijutigijanga ilipsingnik magguertorlugo ullipkitârtisiuk akkiniarlugo.

⁷ Ingminik nertornartiningata ikligudlarningatalo anginingatut, taimâk angitigijomik imertiniarsiuk kappianartomik kiksanartomiglo. Omamigut oᴋarmat: Iksivalorikpunga, ataniub nuliarivânga, uigarnioniangilanga, takoniarnangalo kiksanartomik.

⁸ Tamanna pivlugo kappiagijangita uvluksame atautseme tikidlaromârpât, toᴋublo, kappianartublo, kângnartublo; otaudlarlunelo ikomamut nungutaujomârpok. Pitsartudlarmat Nâlegaᴋ Gûde tâpsominga erᴋartuiniartok.

⁹ Atanîllo nuname tâpsominga arnarnialauktut ikligudlarvigilugo, ᴋeaniarpât kappiaktoadlarutigivlugolo, ikomangata iserlunga takogamitsuk.

¹⁰ Nangeromârpullo ᴋaningitangane kappiasuktitauninga erᴋsigivlugo, oᴋarlutiglo: Kappianarmêk, kappianarmêk iglugasaksuit angijut Babilône, iglugasaksuit sôngojut! Stundeme atautseme erᴋartortaunît neliutivok.

¹¹ Niuverniartullo nuname ᴋeavlugolo uggoridlaromârpât, niorvgotiksanginik pisijomajoᴋarungnairmat:

¹² Niorvgotiksanginik goldemik silberemiglo, ujarᴋaniglo pivianartunik, sapanganiglo, saitemiglo aupaluktamiglo, aupaloriktomiglo, sunatuinarniglo ᴋejungnik tipitsiariktunik, sunatuinarniglo iluleᴋutinik togânik, sunatuinarniglo iluleᴋutinik ᴋejungnik pivianartunik, ᴋakᴋorlerniglo, kikiangniglo, ujarᴋaniglo;

¹³ Tauvluᴋutiksaniglo, mingoarutiksaniglo, tipitsiariktoksoarmiglo, kutsumiglo, vainemiglo, orᴋsumiglo, sanaukamiglo, sanaugaksaniglo, nergjutiniglo, sauganiglo, horsiniglo, ᴋamutingniglo, inuillo timinginik, inuillo tarninginik.

¹⁴ Paungaᴋsuillo tarnivit ikligijangit ilingnit ᴋemâsimavut; ilûnatiglo mamalauktut ânanaudlalauktullo ᴋemâsimavâtit, nennisijungnainiarlutillo tamakkoninga.

¹⁵ Tamakkoningalo niuvernialauktut akluitigivlugit, ᴋaningitome nangeromârput, kappiasuktitauninga erᴋsigivlugo, ᴋeavlutiglo uggoridlaromârpât,

¹⁶ Oᴋarlutiglo: Kappianarmêk, kappianarmêk, iglugasaksuit angijut, annorârsimalauktut saitinik, aupaluktaniglo, aupaloriktuniglo, ᴋalersimajullo goldinik, ujarᴋaniglo pivianartunik, sapanganiglo,

¹⁷ Stundeme atautseme akluinerit tamakkoa asserorsimangmatta. Umiaᴋsuillo angajoᴋângit ilûnatik, inugasaksuillo umiaksoarnêtut, kipalullo ilûnatik niuverniartut imarbiksoakut, ᴋaningitome nangerput;

¹⁸ Nipliadlarlutiglo, ikomangata isserlunga takogamitsuk, oᴋarpullo: Iglugasaksuit angijut ukkua ane adseᴋarᴋât?

¹⁹ Sannîllo karngautigivait niaᴋomingnut, ᴋeavlutiglo ogguadlarnerniglo nipliadlarput, oᴋarlutiglo: Kappianarmêk, kappianermêk iglugasaksuit angijut tâpkonane ilûnatik imarbingme umiaᴋsoakartut akluitigilaukpait niorvgotiksangit! Stundeme atautseme asserorsimangmatta.

²⁰ ᴋilak ᴋuviasugit tâpkoninga, ilipsetauk Apostelit, nelautaijullo ivjornaitose, ilipse akkiniarutigivluse Gûdib erᴋartulaungmagit.

²¹ Engelelo sôngojoksoak ujaraksoarmik serᴋalitsiviub ujaraktangatut kiviksilarmelo imarbingmut egitsivok oᴋarlunelo: Taimak tagvainak erinesârdlugit Babilône iglugasaksuit angijut egitauniarput nagvârtaujungnainiarlutik.

²² Imgertullo, harfesijartullo, nipjausijartullo, tiptulausijartullo, nippingit tussartaujungnainiarput ilipsingne; sanajôngojut sanajanginik ilipsingne nagvârtokarungnainiarpok, kaivivîllo nippinginik tussartoᴋarungnainiarivok ilipsingne.

²³ Nennerutiblo ᴋaumaninganut ᴋaumaksaijoᴋarungnainiarivok ilipsingne, uiksablo nuliaksablo nippingit tussartaujungnainiarivut ilipsingne. Niuvertut ilipsingne angajoᴋâksoangolaungmatta nuname, angakonipsingnut nelojut tamaita tamartitaulaungmatta.

²⁴ Tâpkonanelo nagvârtauvuttauk nelautaijut ivsornaitullo aungit, ilûnatiglo nuname toᴋotaujut aungit.