Takotitaunermik 17 - Labrador Inuttitut Heritage Bible

Babilône anguniartoksoak nergjutsub 7 nik niaᴋoᴋartub ᴋângane iksivajok, asserortaujorlo.

¹ Engelillo 7 it iluleᴋuteᴋartut 7 nik illangata oᴋariartorvigivânga oᴋautivângalo: ᴋait, anguniartoksûb imaksuit unuktut ᴋângine iksivajub erᴋartortauninganik takotitsomagapkit;

² Tâmna atanît nuname arnarniararijangat, nunablo inungit tallaput anguniarningata vaininganut.

³ Anernikullo pitipânga inuᴋajuitomut. Arnamiglo takovunga nergjutsûb aupaloriktub ᴋângane iksivajomik, ilûnane ateliksôjub mitautiksanik, niaᴋoᴋartub 7 nik, nakjuᴋartublo 10 nik.

⁴ Arnarlo annorârsimajok aupaluktamik, aupaloriktomiglo; ᴋalersimajorlo goldemik, ujarᴋaniglo pivianartoksoarnik, sapanganiglo, ermgusiarsungmiglo goldemik tigumiartok, imalingmik maᴋojungnartoksoarnik mamaitoksoarniglo anguniarutinginik;

⁵ Kaunganelo atek aglaksimavok: Nelonartok, Babilônersoak, ajortulinerit maᴋojungnarnerillo ilûnatik anânangat nuname.

⁶ Arnarlo tâmna takovara tallatok ivsornaitut aunginut, Jêsusemiglo kigligiutsijut aunginut. Takogapkolo, angijomik tataminiarpunga.

⁷ Engeliblo oᴋautivânga: Suna pivlugo tataminiarᴋêt? Oᴋautijomavagit arnab tâpsoma, nergjutsûblo (arnab) ᴋânganêvingata, niaᴋoliub 7 nik, nakjuliublo 10 nik nelonarnîgingnik.

⁸ Nergjut takojat ilauktok itsungnairpok, ama anijomârpok netteᴋangitoksoarmit, aijomârlunelo asserortauvingmut; nunablo inungit, ateᴋartut aglaksimangitunik aglangne ômanartune silaᴋsûb pigiarninganit, tataminiaromârput, nergjut ilauktok itsungnairtorlo takogunitsuk sulle ingmat.

⁹ Tamadja tukkinga; silatuneᴋariaᴋarporle nagvârlugo: Niaᴋut 7 it ᴋakᴋangovut 7 it, arnab iksivavingit, tâpkoalo attaniovut 7 it.

¹⁰ Tallimat ochosimavut, atausek tamattomanêpok, aipâ sulle tikingilaᴋ, tikikunelo anikitomik pijuksaujomârpok.

¹¹ Nergjullo ilauktok itsungnairtorlo, tamna 8 ingat, 7 it illangat, aivorlo asserortauvingmut.

¹² Nakjullo tallimaujortut takojatit ataniovut 10 it, sulle ataniovingmik pilaungitut, atanertitulle atanioveᴋartitaujomârput nergjut illagilugo, neliutub illangane.

¹³ Tâpkoa atautsemik issumaᴋaᴋatigêkput, sôngonitiglo pitsartunitiglo pititsomârpait nergjumut.

¹⁴ Tâpkoa sorsugomârput Saugârsungmut, Saugârsûble sâlagijomârpait; nâlekanut ilûnainut Nâlegaugame, atanernullo ilûnainut ataniogame, ᴋairᴋojaumajullo anerimajullo okpertullo tâmna illagivlugo.

¹⁵ Engeliblo oᴋarvigivânga: Imeksuit takojatit, anguniartub iksivavigijangit, tagga inugasaksuit, katimajoksuillo, nelojullo, ingmigôlingajuniglo oᴋausilit.

¹⁶ Nakjuillo tallimaujortut takojatit nergjumêtut ômigijomârpât anguniartok, pêjarlugolo annorairtidlugo, uviningalo nerrivlugo, ikomamullo nungutsomârpât.

¹⁷ Gûdib ômatingit aulatingmagit, issumanga nâleklugo, atautsemiglo piniarlutik issumaᴋartidlugit, nergjumullo tunijilutik ataniovingmingnik, Gûdib oᴋausingit nâmaksititauᴋârtinagit.

¹⁸ Arnarlo takojat, tagva iglugasaksuit angijut, ataniojut atanernut nunamêtunut.