Takotitaunermik 15 - Labrador Inuttitut Heritage Bible

Kappianartut kingorlît 7 it. Imarbiub igalâksajaujârtub sinâne imgertut.

¹ Nelunaikutablo assianik takovunga ᴋilangme angijoksôjomik tatamnadlartomiglo: Engelit 7 it kappianartunik kingorlerpânik 7 nik peᴋartut; tamakkonunga Gûdib ningausinga nâmaksititaumangmat.

² Takovungalo sorlo imarbingmik igalâksajaujârtomik ikomamik akkulersimajomik, tâpkoalo sâlaᴋalauktut nergjumik adsingoanganiglo, nelunaikutanganiglo, atingatalo kittitanganik nangerput imarbiub igalâksajaujârtub sinâne, Gûdib harfinginik tigumiarlutik.

³ Imgerpullo Môsesib, Gûdib kivgangata imgerusinganik, Saugârsûblo imgerusinganik, oᴋarlutiglo: Angijoksôvut tatamnarlarmiglo piniarnitit, Nâlegak, Gûde ajugaᴋangitovitôjotit; idluartôvlutiglo mikseᴋârtôvut apᴋosinitit, igvit ataniojotit ivjornaitunut.

⁴ Kia kuksasugviginajangilâtît, Nâlegak, attît nakorivlugô? Kissivît hailigeojotôgavit. Nelojut ilûnatik tuksiariartorviginiarmatit, akkiniarnitit nelonairsimangmatta.

⁵ Tamakkoa kingorngatigut takogivunga, ahâglo Tempele, tupek kigligiutsineᴋtalik, ᴋilangme mattuêrtauvok.

⁶ Engelillo 7 it kappianartunik 7 nik peᴋartut Tempelemit anivut, atisimavlutik annorânik sâtunik ivsornaitunik ᴋeblertanik, sagvingmikullo ᴋeterusersimajut ᴋeterutinik goldinik.

⁷ Omajullo ipkoa sitamat illangat Engelit 7 it tunitjivigivait iluleᴋutinik goldinik 7 nik, tattatunik Gûdib issoᴋangitomit issoᴋangitomut ômatsainartub ningausinganik.

⁸ Tempelelo iserlungmik tattalerpok Gûdib ânanauninganut pitsartuninganullo. Tempelemullo itertokarungnangilak, kappianarnerit 7 it Engelit 7 it najortangit nâmaksititauᴋârtinagit.