Takotitaunermik 14 - Labrador Inuttitut Heritage Bible

Saugârsuk illagêktoᴋotingillo 144,000 it. Engelit pingasut. Nâlegaᴋ kibluitelijartok.

¹ Ama takogivunga Saugârsungmik Zionib ᴋakᴋangane nangertomik tâpsomalo 144,000 it illagivait, tâpkoalo ᴋaungine aglaksimajokarpok tâpsoma atâtangata atinganik.

² Nippemiglo ᴋilangmit tussarpunga, sorlo kôksûb nippinganik, sorlolo kallidlartub nippinganik, nippelo tussartara harfesijartut harfimingnik atortut nippingititut-iput.

³ Imgerusertâmiglo imgerput iksivautaᴋsûb sângane, ômajullo sitamat angajoᴋaunerôjullo sângane; assingitalo imgerusertâk tamanna illiniarlugo ajorpât, tâpkoa 144,000 it kissimik illipât, nunamit pisiangojut.

⁴ Tâpkoa tagga, arnanut ipeᴋtotisimangitut; uigasôgamik, Saugârsuglo namut pijarangat malikpât. Tâpkoa pisiangovut inungnit sivorlerpângovlutik Gûdemut Saugârsungmullo.

⁵ Nelangainermiglo ᴋaningine nagvârtoᴋalaungilak, pidlaraksaujuinamik Gûdib iksivautaᴋsoangata sângane.

⁶ Engelemiglo takogivunga ᴋilaub ᴋerᴋagut tingijomik, oᴋautsinik tussarnertunik soraingitunik pilingmik, oᴋautigijaksanik nuname nunaᴋartunut, nelojunullo, ingmigôlingajuniglo oᴋauselingnut, inungnullo tamainut;

⁷ Nippersoarmullo oᴋarpok: Gûde kuksasungniarvigisiuk nertorsiuglo akkiniarviksanga neliutingmat; tuksiarvigisiuglo ᴋilangmiglo nunamiglo imarbingmiglo, imiuglo puilavinginik pingortitsijok.

⁸ Engeliblo assia malikpok oᴋarlune: Ochomavut ochomavut iglugasaksuit angijut Babilône, nelojut tamaita imertinamigit assiniarnermik vaininganik.

⁹ Engeliglo pingajungata tâpkoa malikpak nippersoarmullo oᴋarlune; Neliata nergjut tâmna adsingoangalo tuksiarvigigunigik, nelunaikutanganiglo ᴋaungmigut aggangmigullônêt tigusigune,

¹⁰ Tâmna imeromârpok Gûdib ningausingata vaininganik illaᴋangitomik ningausingata ermgusiarsunganut kovijaujomik; naiatitauniarlunelo ikomamut orᴋsorutelingmut, Engelit ivsorânitut Saugârsûblo takoane.

¹¹ Aniangitalo iserlunga ᴋongmuaromârpok issoᴋangitomit issoᴋangitomut; inilangajungnangilallo uvlôtilugo unnuamelo, nergjutemik tâpsomalo adsingoanganik tuksiarveᴋalauktut, atingatalo nelunaikutanganik illaliulauktut.

¹² Tagvane ivsornaitut ᴋenuêningat; tagvane Gûdib perᴋojanginik okpernermiglo Jêsusemut torᴋuijut.

¹³ ᴋilangmillo nippemik tussarpunga oᴋautjimnik: Aglagit: Piloridlarput toᴋungajut, Nâlekame toᴋojut, mânamit. Ilâ Anernek oᴋarpok, merngoerserniarmatta sulijamingnit, piniarningitalo malikpait.

¹⁴ Takogivungalo, ahâglo nuvuja ᴋaᴋortak, nuvujamelo iksivajok inûb erninganik adseᴋartok, niaᴋomine niaᴋôteᴋartok goldemik, kibluitemiglo ipiktomik tigumiartok.

¹⁵ Engeliblo assia Tempelemit anijok nippersoarmut nipliadlarpok tâpsomunga nuvujab ᴋânganêtomut: Annaunilerit kibluitingnut, katersoilutillo, katersoiviksak neliutingmat, nuname katersoraksat panermatta.

¹⁶ Nuvujablo ᴋângane iksivajub nuna annaulerpâ kibluitiminut, nunalo katersoiviolerpok.

¹⁷ Engeletauk assia anîgivok Tempelemit ᴋilangmêtomit, tâmnatauk kibluitelijarivok ipiktoksoarmik.

¹⁸ Engelelo assia anigivok Altâremit, tâmna nâlegaujok ikomamut nipliadlarlune ipiktoksoarmik kibluitilingmut oᴋarpok: Annaunilerit kibluitingnut ipiktoksoarmut, paungat (ᴋeleᴋsaujat) vainilit nuname pêjarlugit, inersimangmatta.

¹⁹ Engelib tagva nuna annaulerpâ kibluitiminut pêjarlugit nunab akkerungit vainilit egidlugillo Gûdib iptêjaiveᴋotinganut ningausilingmut.

²⁰ Iptêjaiviglo tâmna atortauvok iglugasaksuit silatane; auksoak tagva kôkpok iptêjaivingmit horsit noᴋilautingit tikidlugit, mailititut 200 ititut ᴋaningitigijomik.