Takotitaunermik 13 - Labrador Inuttitut Heritage Bible

Nergjutsoak 7 nik niaᴋoartok imarbingmit ᴋakᴋijok. Nergjutsoarlo maggûngnik nakjulik nunab iluanit pijok.

¹ Imarbiublo sinâne siorᴋane nangerpunga. Nergjutsoarmiglo imarbingmit ᴋakᴋijomik takovunga, niaᴋolingmik 7 nik, nakjuᴋarlunelo 10 nik; nakjunginelo niaᴋôteᴋalaukpok 10 nik, niaᴋunginelo aternik mitautilingnik (aglaksimajokarpok).

² Nergjullo takojara pûsevâluktun-ipok, itigaᴋalarmelo nenoktut, ᴋaningalo Loevib ᴋaningatut. Kuglugiaksoarâlublo pitsartunerminik tunitsivigivâ, iksivautaksoarminiglo atanionerminiglo.

³ Niaᴋungitalo illangat sorlo toᴋonartomit ikilersimajok, takovara, ikingalo toᴋonartôgalloak mamilaukpok, nunaᴋsoarmiullo ilûnatik tataminiarutigivât nergjutsoak.

⁴ Tuksiarvigivâllo ᴋuglugiaksoarâluk nergjumik pitsartutitsijok, tuksiarvigigivâllo nergjut oᴋarlutik: Nergjut tâmna kia adsigivaûk? kialo sorsugvigijungnarᴋaûk?

⁵ Kanermiglo tunitsiviovok oᴋausersoakarlune mitautiksaniglo, pitsartuneᴋartitauvlunelo soraingitomik takᴋit 42 it nâvlugit.

⁶ Kaninelo angmarpâ mitauteᴋarlune Gûdemut, atinganiglo, tupersoanganiglo, ᴋilangmiuniglo mitauteᴋarlune.

⁷ Perᴋojaugivorlo ivsornaitut sorsugvigilugit sâlagilugillo; pitsartuneᴋarvigivlugillo kinguvârêt ilûnaita, ingmigôlingajuniglo oᴋausilit nelojullo.

⁸ Tuksiarvigivâllo nunaksoarmiut ilûnatik ateᴋartut aglaksimangitunik silaᴋsub pigiarninganit Saugârsûb toᴋotaujub aglangine ômanartune.

⁹ Siuteᴋartoᴋarpat tussarle!

¹⁰ Parngnanairsimavingmut pititsijok parngnanairsimavingmut pititaksaugivok; saviksoarmut toᴋotsijok saviksoarmut toᴋotaksaugivok. Tagvane ivjornaitut ᴋenuersâriaᴋarput okperneᴋarlutiglo.

¹¹ Nergjutiblo asianik nunab iluanit nuijomik takogivunga, maggûngnik nakjuᴋartomik saugârsutut, oᴋauseᴋartomik ᴋuglugiaksoarâluktut.

¹² Pitsartuneᴋarlunelo tamainik piniarpok nergjututut sivorliojotut tâpsoma takoane, nunalo tâpsomanelo nunaᴋartut pitipait tuksiarveᴋarᴋovlugit nergjumik sivorlermik, mamilauktomik ikiminit toᴋonartomit.

¹³ Tatamnartoksoarniglo pivok, ikoma aglât ᴋilangmit kataktidlugo nunamut, inuit takoane.

¹⁴ Nunamiullo tamartidlugit tatamnartut piniarungnartitaujutigijane nergjutsûb takoane pivlugit; oᴋautivlugillo nuname nunaᴋartut, adsiliorᴋovlugit nergjumik, saviksoarmut ikilertaulauktomik, ômatitaulauktomiglo.

¹⁵ Pitsartuneᴋartitauvorlo nergjutsûb adsingoanga anerneᴋartidlugo, nergjutsûb adsingoanga oᴋarungnarᴋovlugo, piniarᴋovlugolo, nergjutsûb adsingoanganik tuksiarveᴋaromangitut toᴋotauᴋovlugit.

¹⁶ Tamaitalo imailingatipait, mikijut angijullo, akluitut aklujullo, kivgaungitut kivgaujullo nelunaikuserdlugit talerpingitigut ᴋaungitigullônêt.

¹⁷ Pisiniartoᴋarᴋonago niuverniartoᴋarᴋonagolônêt taimak nelunaikusersimangitomik nergjutsûb atinganiglônêt, atingata kittitanganiglônêt.

¹⁸ Tagvane illisimaneᴋarpok! Silatuneᴋartub kittiliuk nergjutsûb kittitanga; inûb kittitangatun-ingmat, kittitangalo 666 ovok.