Takotitaunermik 12 - Labrador Inuttitut Heritage Bible

Arnamik ᴋuglugiaᴋsoarâlungmut aupaluktamut unangmijaujomik.

¹ Kilangmelo nelunaikutaᴋsoak sakᴋerpok: Arnak seᴋinermik annorârsimajok, takᴋerlo itigangita atânêtok, niaᴋominelo niaᴋôteᴋarlune uvloritjanik 12 nik.

² Tâmnalo singaijok nipliadlarpok ernisukame, angijomiglo âniavok ernivlune.

³ Nelunaikutablo assia sakᴋerpok ᴋilangme, ahâk ᴋuglugiaᴋsoarâluk angijok aupaluktak, niaᴋoᴋarlune 7 nik, nakjuᴋarlarmelo 10 nik, niaᴋominelo niaᴋôteᴋarlune 7 nik.

⁴ Pamiominullo uvloritjat pingasuililugit pingajuingit nusukpait, nunamullo egidlugit. Kuglugiaksoarâluglo tâmna arnab ernisuktub sânganut pivok, ernijarêtuarpat, ᴋitornganga nerrijomavlugo.

⁵ Ernermiglo angutiarsungmik ernivok, nelojunik tamainik mianersijuksamik ajaupiamut kikiangmut. Kitorngangalo aularutjauvok Gûdib iksivautangatalo sânganut.

⁶ Arnarlo ᴋemâvok inuᴋajuitomut, tagvane Gûdib iniksarsisimavâ, tagvane nerrititaukovlugo uvlut 1,260 it nâvlugit.

⁷ Angijomiglo sorsuktoᴋalerpok ᴋilangme: Miggailib Engelingitalo ᴋuglugiaksoarâluk sorsugvigingmatsuk, ᴋuglugiaᴋsoarâlublo Engelingitalo sorsugvigivait,

⁸ Sâlaᴋarlugatik iniksanginiglônêt Nagvârtoᴋarungnairpok ᴋilangme.

⁹ Kuglugiaᴋsoarâluglo angijok anititauvok, ᴋuglugiatoᴋak ateᴋartok: Passiklertemik Sâtanasemiglo, silaksoarmiunik tamainik asseroijok, egitauvlunelo nunamut, Engelingillo egitaugivut.

¹⁰ Nippersoarmiglo tussarpunga imâk oᴋartomik ᴋilangme: Mâna piuliklernek, pitsartunerlo, nâlegaunerlo, ajugaᴋanginerlo Gûdipta Kristûsingatalo pigivait, ᴋatangutiptingnik passiklertok kataktitaungmat, tâpkoninga passiklertok Gûdib sângane uvlôtilugolo unnuamelo.

¹¹ Sâlagidlarpâlle Saugârsûb aunganut, kigligiutsinerijamiglo oᴋausinginut, inôtsitiglo ivlerilaunginamigit toᴋo tikidlugo aglât.

¹² Taimaimat ᴋuviasugitse ᴋilait, ilipselo tâpkonane ineᴋartose. Kappiasungniarpulle nunamêtut imarbiksoarmêtullo; Sâtanase akᴋarmat ilipsingnut, angijomik ningausilik, ᴋaujimagame sivikitomik piviksaᴋarnerminik.

¹³ Kuglugiaksoarâluglo nunamut kataktitaunerminik takogame, arnak angutiarsungmik ernilauktok unangmivâ.

¹⁴ Arnarlo issarungnik maggûngnik nektoraliub angijub issarôktitut-itungnik tunitsiviovok, tingilerᴋovlugo inuᴋajuitomut iniksaminut, tagvane nerrititauᴋovlugo nelliutome atautseme, neliutungnelo maggûngne, neliutublo ᴋoppangane, ᴋuglugiab kênanganit.

¹⁵ Kuglugiab ᴋanerminit imeᴋsoak kôksoatut anipâ arnab tunuagut ipititsomavlugo.

¹⁶ Nunable arnak ikajorpâ, ᴋanine aitarlugo kôksoak êvâ, kuglugiaksoarâlub anitanga ᴋanerminit.

¹⁷ Kuglugiaksoarâlub tagva arnak ningaumajârvigivâ aivlunelo tâpsoma kinguvângita amiakungit sorsugiartoromavlugit, Gûdib perᴋojanginik nâlektut kigligiutsijullo Jêsuse Kristûsemik.