Takotitaunermik 11 - Labrador Inuttitut Heritage Bible

Kigligiutsijûk maggûk. Tiptulausijartut 7 ingat.

¹ Tunitsiviovungalo suvlolingmik ajaupiatun-itomik, oᴋautjauvlungalo: Nikovidlutit ôktoruk Gûdib Tempelinga, Altârelo, taᴋamanelo tuksiartut.

² Tempelible silatânêtok egidlugo ôktorniangilat, nelojunut tunijaungmat, iglugasaksuillo ivjornaitut tullerajaromârpait takᴋit 42 it nâvlugit.

³ Uvamniglo kigligiutsijûk maggûk tunitsivigijomavakka, nelautainiarᴋovlugik uvlut 1,260 it nâvlugit, pôksajanik atisimavlutik.

⁴ Taipkoa napârtôvuk maggûk orᴋsulîk, nennergutaujûglo maggûk ikomajûk nunab Gûdingata sângane nangertûk.

⁵ Tâpkoningalo akᴋunaijomajoᴋarpat, ikoma tagva ᴋanîgingnit aniniarpok, ômigijitik nungudlugit; tâpkoninga akᴋunaijomajoᴋarpat, tâmna taimailiortauvlune toᴋotaksauvok.

⁶ Tâpkoa pitsartuneᴋarpuk ᴋilak parngnanairlugo silaloᴋonago uvlune nelautaivigijamingne, pitsartuneᴋarpuglo imek aungolertidlugo, nunalo pidlarlugo kappianartunut sunatuinarnut, pijomajarangamik.

⁷ Kigligiutsinitik nâmaksigunikik nergjutsûb netteᴋangitomit nuijub sorsugomârpak, sâlagivlugiglo toᴋoniarlugiglo.

⁸ Timîgiglo toᴋungajûk silatuinarmêniarpûk iglugasaksuit angijoksuit apᴋosiningane; tâpkoa Anernek maliklugo issumaᴋarasuartunut taijauvut Sodômamik Egiptenemiglo, tagvane Nâlegavut kikiaktortaulaukpok saningajolingmut.

⁹ Inugasaksuillo, inuᴋatigêllo ingmigôlingajuniglo oᴋausilit, nelojullo illangita timîgik toᴋungajûk takojomârpakit uvlune pingasune, sitamangata ᴋoppanga tikidlugo, ilijauᴋojomanagiglo timîgik toᴋungajûk iluvermut.

¹⁰ Nunamelo nunaᴋartut ᴋuviasûtigijomârpakit serrilutiglo, tunergutiniglo tujortigêgomârput kigligiutsijûk tâpkoa maggûk kappiasuktilaungmatikik nuname nunaᴋartut.

¹¹ Uvlullo pingasut, sitamangata ᴋoppanga tikidlugo nângmatta, Anernerub ômanartub Gûdemit tuavidlune itervigivak itigangmingnullo nangilerpûk, erᴋsinermiglo angijomik ilumertaulerput tâpkungninga tautuktut.

¹² Nippersoarmiglo ᴋilangmit tussarpûk, tâpkungnunga oᴋartomik: Tamaunga majoraritik! Kongmuarpûk tagva nuvujakut ᴋilangmut, ômigijingitalo takovakit.

¹³ Tagvainarlo nuna sajukpilâdlarpok angijomik, iglugasaksuillo tallimaujortôlilugit tallimaujungit ochovut, toᴋotauvullo nunab sajukpilâdlarninganut inuit 7,000 it, amiakullo ᴋoaᴋsângadlarput nertordlerlutiglo ᴋilaub Gûdinganik.

¹⁴ Kappianarnerub aipanga anigorpok, ahâk, kappianarnerit pingajuksangat tuavi neliutilârpok.

¹⁵ Engelillo 7 ingat tiptulausijarpok. Nippersuit tagva tussartauvut ᴋilangme oᴋartut: Silaksûb ataniovingit perᴋutautitaumavut Nâlegaptingnut Kristûsinganullo, tâmnalo nâlegaviksôniarpok issoᴋangitomit issoᴋangitomut.

¹⁶ Angajoᴋaunerôjullo 24 it, Gûdib sângane iksivajut iksivautamingne, pâmakterput Gûde tuksiarvigivlugo,

¹⁷ Oᴋarpullo: ᴋujagidlarpaptigit Nâlegak, Gûde ajugaᴋangitovitôjotit, tamattomane itotit, ilauktotillo, itsomârtotillo, pitsartujoksônît atorangne nâlegautilutillo;

¹⁸ Nelojullo ᴋaningajâdlarput, ningaumajârnîlle neliutilerpok, toᴋungajullo erᴋartortauniarvingat, kivgatillo, nelautaijoᴋotitillo, ivjornaitullo, aterniglo nâlektut, mikijullo angijullo akkileromagangne; asserorlugillo nunamik asseruilauktut.

¹⁹ Gûdiblo Tempelinga ᴋilangme upkuêrtaulerpok, Testamentingatalo iklervinga takuksauvok Tempelingane, ᴋaumalaᴋarporlo, nippersoakalarmelo, kallidlarlarmelo, nuna sajukpiludlarlarmelo, nettaᴋonadlarlarmelo.