Takotitaunermik 10 - Labrador Inuttitut Heritage Bible

Engele aglârsungnik makpersimajunik tigumiartok.

¹ Engelemiglo assianik sôngojoksoarmik takovunga, ᴋilangmit aᴋᴋartomik; tâmna nuvujamik annorârsimavok, ajagutaᴋaporlo niaᴋungane, kênanga seᴋinertun-ipok, itigangillo sukatitut ikomaliktitun-iput.

² Aglârsungnik makpersimajunik aggangminut tigumiartok itigangminullo talerpingminut imarbik tutivâ, saumingminut nuna tutilugo.

³ Nippersoarmut nipliadlarpok loevetut errinaloaᴋijadlartotut; nipliadlarnerlo sorairmat, kalluit 7 it nipliavut nippimingnut.

⁴ Kalluillo 7 it nippitik anitsarêrmatigik, aglagomalauktakka; nippemigle ᴋilangmit pijomik tussarpunga, uvamnut oᴋartomik: Naᴋitjusikit kalluit 7 it oᴋausingit, tâpkoa aglangniarnagit.

⁵ Engelible takojama imarbingmelo nunamele nangertub, aggane talerpingne issakpait ᴋilangmut,

⁶ Tâmnalo taivlugo, inôjok issoᴋangitomit issoᴋangitomut, pingortitsilauktok ᴋilangmik ᴋilangmêtuniglo, nunamiglo nunamêtuniglo imarbingmiglo imarbingmêtuniglo, (Engele) oᴋamarikpok, mânamit neliuneᴋarungnairtuksaungmat;

⁷ Uvlulle ipkua Engelit 7 ingata tiptulausijarvianut ilingajut neliutikpatta, tagva Gûdib nelonarninga nâmaksititaujomârpok, sorlo tâpsoma kigligiutigilaungmagit kivgaminut nelautaijoᴋotiminullo.

⁸ Nippiblo ᴋilangmit tussalauktama ama oᴋautivânga oᴋarlunelo: Ailerit, tigusijartorlutillo aglârsungnik makpersimajunik Engelib imarbingmelo nunamelo nangertub agganginit.

⁹ Tagvale Engele aivigivara oᴋautivlugo: Aglârsungnik ukkuninga tunitjiviginga. Oᴋautivânga: Tigukit êlugillo pît, natjeritiniarpâtillo, ᴋanernele igupsat orᴋsungititut mamarniarput.

¹⁰ Aglârsuillo makpertat tamakkoa Engelib agganginit pigapkit, êvakka, ᴋanimnelo igupsat orᴋsungititut mamalaukput; êgapkille natjeritipânga.

¹¹ Oᴋautivângalo: Ama nelautaijuksaugivotit inugasaksoarnut, nelojunullo, ingmigôlingajuniglo oᴋauselingnut, atanernullo unuktunut.