Sefania 3 - Labrador Inuttitut Heritage Bible

¹ Kapianarmek iglugasaksuit ᴋunutojoksôjut salumaitullo ᴋunutitsijullo!

² Nâlelaungilat nippemik; ilaliolungilat inerterutaujunik; Nâlegak sungertutigilungilât; Guditik najoromangilât.

³ Angajoᴋâᴋsuit tâpkonanêtut loeveovut ᴋalingoartut; idluarsaijungit amarôvut unuksiortut; piksaᴋumitârilungilat.

⁴ Nelautaijoᴋotingit ᴋuksalaiput tunganailutiglo; ajoᴋertuijoᴋotingita ivsornaitovik sujukpât, perᴋojallo mumikpait.

⁵ Nâlegak tagvanêtok idluartôvok; tâmna idluituliniangilak; ᴋaujarangat idluarsainine ᴋaumajomut pitipâ, nipotilungilak; idluitulle kangusulungilat.

⁶ Uvanga inôᴋatigêksuit kipipakka, nuvuguseksoangit nungunikungorput; apᴋosineâlungit asserortauvut, tagvûnârtoᴋangilak; iglugasaksoangit, serᴋomitauvut, inuêrutivut, tagvanêtoᴋarungnaiporlo.

⁷ Oᴋarpunga: Âhamarik, erᴋsiginiarpalukparma, inertertauniarpalukpotit; ininga piniarvioᴋonago kajusijutigilauktamnik tâmna pivlugo: uvlârolaukpulle asserornartulijomavlutik.

⁸ Tamanna pivlugo tikitsiarisinga, oᴋarpok Nâlegak, uvlok neliutiᴋârtinago nikovivigilârtara pinniniaromavlunga; kajusigama inôᴋatigêksuit katersoromavlugit, ataniovillo ilagêktitsomavlugit, ᴋaningaumajârnera kovijomavlugo tâpko nunga, ilâ, ningaumajârnersoara katsungaitok tamât; nunaksoak ilûnât nungutaujomârmat ilungertornima ikomanganut.

⁹ Taimanganit tagva ᴋangasinâk ivsornaitok sâtitsomârpara inôᴋatigêksoarnut, ilûnatik Nâlekab atinganut ᴋaigarsuᴋovlugit, ilagêklutiglo tâmna kivgartoromavlugo.

¹⁰ Etiopiab kôksoangita ungatânit tuksiartima siamartitaujut paningita tunergusiaksakka ᴋaijomârpait.

¹¹ Uvlorme tâpsomane kangusûtiginiangilatit piniarnitit tamaita, idluitulinerijatit uvamnut: taipsomane ilupsingnit pêjaromârapkit piojorinerit pingijaitoksônerillo, kingornganelo pingijaijungnairomârpotit ᴋaᴋaᴋotimne ivsornaitome.

¹² Ilingnele amiakoᴋartitsijomârpunga inungnik nikanartunik aklujuniglo, tâpkoalo Nâlekab atinga tatigijomârpât.

¹³ Israêlib amiakungit idluituliniangilat, saglutiksaniglo oᴋauseᴋarniangilat; oᴋarlônêt uivêriklertok naipitauniangilak ᴋaningine; nerrilârmatta innilalutiglo, ᴋaggaijoᴋarniangilarlo tâpkoninga.

¹⁴ Imgitsiarit, Zionib pania; ᴋaggudlarit, Israêle; erᴋiêrtorit ᴋuviasudlarlutillo ômamut tamanut, Jerusalemib paninga.

¹⁵ Nâlekab erᴋartortaunît sorairtipâ, ômigijîllo pingujârpâ; Nâlegak, Israêlib ataninga ilingnêpok: idluitomik sivôrajariaᴋarᴋonak kingorngane.

¹⁶ Uvlorme tâpsomane Jerusalem oᴋautijaulârpok: Sivôraniarnak; Zione, aggatit ᴋasuniaratik.

¹⁷ Nâlegak Gûdît ilingnêpok, pitsartudlartok piulikleromajok: ᴋuviasungnermut serrijûtigilârpâtit, nagligosungnermine nunanijâlârpok, imgerutinut serrijûtigilârpâtit.

¹⁸ Katersoromârpakka katimaniksanik kiksasungnartunik kiksauteᴋartut, ilingnit pijovinît; tâpkoa oᴋumaijutigijat naggonautigilauᴋpât.

¹⁹ Ahâk, neliutome tâpsomane tamaita oᴋumaiksartitsijut ilingnik piniarvigijomârpakka: tusiaktullo piulijomârpakka, ajaktortaujullo katersorlugit; ipkoalo kangusûtaulauᴋtut nuname ilûnâne, nertornautiksangortitsomârpakka opinartungortilugillo.

²⁰ Neliutome tâpsomane tikiutijomârpapse, neliutomelo tâpsomane katersoromârpapse; opinartungortitsomârapse nertornautiksangordluselo inôᴋatigêksoarne tamaine silaksoarme, aularutjaunise tikiutilermigupkit ijipse sângine, oᴋarpok Nâlegak.