Sefania 2 - Labrador Inuttitut Heritage Bible

¹ Katimaleritse ilâ, katimaleritse, inôᴋatigêngojose kangusungneᴋangitose:

² Perᴋojak aulangitok aniᴋârtinago, uvlok anigorᴋârtinago iviksukatitut serᴋalijaumajutitut, Nâlekab ningarninga katsungaitoktôᴋârtinago ilipsingnut, Nâlekab ningarningata uvlunga tikiᴋârtinago ilipsingnut.

³ Nâlegak ᴋenersiuk, ilûnnase sinaungaitose nuname, tâpsoma perᴋojanganik nâlektose; idluarniksak ᴋenersiuk, sinaungainek ᴋenersiuk; ijertortauniangimangâpse Nâlekab ningarningata uvlungane.

⁴ Gaza ᴋemaktaujomârmat, Askalonelo sunairutingorlune; Asdode ᴋemâtitaujomârpok uvlub ᴋeterarningane, Ekronelo nusuktaujomârpok amânginut aglât.

⁵ Kapianarmêk imarbiub kiglingane nunalît, inôᴋatigêt Kritimiut! Nâlekab oᴋausingata tôᴋpâtit, Kanaan, Filisterit nunangat; asseroromavagit inuᴋarungnaimariᴋovlutit.

⁶ Imarbiublo kiglinga nerrinasugviksaujomârpok, iglokulluᴋartuinarlune mianersijut siniktarviksanginik unnuiviksaniglo sauganut.

⁷ Kiglingalo Jûdakut amiakunginut ilingajomârpok, saugaᴋotitik nerripkalârpait tagvane; Askalonib iglungine innangalârput unnungme; Nâlekab Gudimik nelipsalârmagit, aularutijaujungillo tikiutimilugit.

⁸ Moabib mitauteᴋarningit, Ammoniblo ᴋitorngangita oᴋarnerlutjiningit tusarpakka, inuᴋotikka mitautigingmâtigik, angijorortilutiglo nangminermingnik kigligijangit pivlugit.

⁹ Tamanna pivlugo, sorlo mikseᴋârtomik inôgama, oᴋarpok Nâlegak Zebaot Israêlib Gûdinga, Moabe Sodomatut ituksauvok, Ammoniblo ᴋitorngangit Gomorratut, perornerlukut ôtsiutit, itersallo tarrioktalît, sunaᴋajuitûblo pigilârpait; inuᴋotima amiakungita asserolârpait, inôᴋatigêksoaᴋotimalo amiakungita kingormgutilârpait.

¹⁰ Tamanna tikitautigilârpât pingijainitik pitjutigilugo, mitauteᴋarmatta angijorortilutiglo nangminermingnik Nâlekab Zebaotib inuᴋotinginut.

¹¹ Nâlegak erᴋsinadlaromârpok tâpkonunga, nuname Gûdeojut ilûnaita perlertitsomârmagit; opigijaksarivâllo inuit, ilûnatik inimingnit, ilâ, inôᴋatigêksuit ilûnatik kiglingit.

¹² Ilipsetauk Etiopiamiojose saviksoarmut toᴋotaujuksauvose.

¹³ Agganelo issagomârpait avunga, Assirialo asserorlugo; Ninivelo sunaᴋangitungordlugo ipteriliktungordlugolo inuᴋajuitotut.

¹⁴ Nergjutillo nujuartut akᴋorilârput tagvane, nergjutit adsigêngitut ilûnatik: tingmiat miagôrtut ilâᴋosîllo siniktalârput sukkaksoangita katigoliunganingine; nippingit tusartaujomârput igalânginit; aunek takuksaujomârpok upkoangita abloriangine: ikângit sidereojut ilupiarutaijartaulârmatta.

¹⁵ Tamadja iglugasaksuit ᴋuvianartoviolauᴋtut terliklutik ineᴋartut, ômatimingne oᴋartut: Uvangauvunga, uvaptullo itoᴋangilak: taimale sunaᴋangitungorpok, aᴋopiviksatuinauvok nergjutinut nujuartunut! Ilûnatik apᴋusârtut tâpkoninga kokoviarutigilarpait, aggatiglo pataktorlugit.