Saggaria 9 - Labrador Inuttitut Heritage Bible

¹ Oᴋausek oᴋumaitok Nâlekab oᴋauserijanga Hâdrakib nunanga pivlugo, tôlârporlo Damaskusemut; Nâlekab inuit takonârmagit, Israêliblo kinguvângit tamaita.

² Hâmatiblo kigleᴋatigijanganut, Tirusemullo, Sidonemullo, silatonasugijunut.

³ Tiruselo ingminut ungalulijoᴋsoaliolaukpok, silberemiglo katersoilune nunab sanningititut, goldelo aᴋilupiaktut apᴋosineâlungnêtotut.

⁴ Ahâk, Nâlekab piksairutijomârpâ, annauniklunelo pitsartuninganik imarbingme; ikomamullo nungutaujomârpok.

⁵ Askalonib tamanna takojomârpâ, sivôralârporlo; Gasablo, angijomiglo ânialârpok; Ekroniblo, nerriungnerijanga kangusuktitaujomârmat; Gasablo ataninga aserortaujomârpok, Askalonelo inuᴋarungnairomârpok.

⁶ Tamângainâgarlo ataniojomârpok Asdodeme, Filisterillo inornautigijangat kipiniaromârpara.

⁷ Aungalo pêjaromârpara ᴋaninganit, maᴋojungnartoᴋotingalo kigutingita akornganit; tâmnalo amiakôjomârpok Gudiptingnut; Jûdamelo angajoᴋâksoatut ilingajomârpok, Ekronelo Jebusiteritut.

⁸ Tangmârteromârpungalo igluga ilumavlugo sorᴋsuktoᴋatigêksoatitut, tamaunârtoᴋarᴋonago utertoᴋarᴋonagolônêt: oᴋumaiksartitsijorlo tamauna apᴋotiksaᴋarungnairomârpok kingorngane; mâna nangminek ijimnut tautugama.

⁹ ᴋuviasudlarit, Zionib pania; ᴋaggudlarit, Jerusalemib pania; Ahâk, atanît ᴋaivok ilingnut: idluarpok ajugauvlunelo; sinaungaidlune, siuterᴋortojome iksivavlune, siuterᴋortojûblo nangmarpaktûb noggangata ᴋânganêdlune.

¹⁰ ᴋamutillo unatautit pêjaromârpakka Efraimit, horsillo Jerusalemit, pitikselo sorᴋsût pêrtaujuksauvok; inôᴋatigêksuillo ulapirksaumik oᴋarvigilârpait; nâlegauvingalo imarbingmit imarbiub aipânut pijomârpok, kôksoarmillo nunaksûb isua tikidlugo.

¹¹ Igvillo ômât, auk ilingnut angerutaulauktok pitjutigilugo parngnanairsortaumajoᴋotitit aulartitsomârpakka itsarmit imeᴋangitomit.

¹² Ungalujijoksoarmut uteritse nerriungnartomik parngnanairsortaumajose: uvlome kigligiutjivunga maggortortomik akkileromârapkit.

¹³ Juda ᴋelugapko pitiksitut, Efraimelo noᴋaktigilugo; ernitillo, Zione, aulajârtitsomârpakka akkerartorᴋovlugit ernernik, Grîkenlande, pitsartujûblo saviksoangatut îtitsomârpagit.

¹⁴ Nâlegarlo sakᴋijâromârpok tâpkoa ᴋolâtigut, ᴋargjungalo anijomârpok ᴋaumalaktut: Nâlegarlo Nâlegaujok tiptulausijaromârpok, ingeraromârporlo uarngniluakut.

¹⁵ Nâlekab Zebaotib serngnigijomârpait; nerrilârpullo tuplerlutiglo iloereutinik; imilârpullo, pervaluklutiglo vainetorsimajutitut; ulipkilârpullo pôgutatut serparsaiviktut, tunerguserviub terreᴋungatut.

¹⁶ Nâlekablo Gudingata piulijomârpait uvlorme tâpsomane inuᴋotigijamitut saugaᴋutaujutitut; niaᴋôtib ujarangititut îtsomârmatta, ᴋebleriklutik nunangane.

¹⁷ Ajunginingat angijôdlarmat, takoranidlarningit inerᴋonadlarput! Sanaugaksat nukappait nakojksijutigilârpait, vainiksallo iptingata niviarsiat nakoksitilârpait.