Saggaria 8 - Labrador Inuttitut Heritage Bible

¹ Nalekablo Zebaotib oᴋausingata tikipânga, oᴋarlune:

² Imâk oᴋarpok Nâlegak Zebaot: Zione ilungertûtigidlaluarpara, unganermut angijomut ilungertûtigidlarpara.

³ Imâk oᴋarpok Nâlegak: Utersimavunga Zionemut, Jerusalemelo inigijomavara: Jerusalemelo taijaujomârpok, iglugasaksoarnik mikseᴋârnelingnik; Nâlekablo Zebaotib ᴋaᴋanganik, ᴋaᴋarmik ivsoarnaitomik.

⁴ Imâk oᴋarpok Nâlegak Zebaot: Sulle ittuit ningiullo ineᴋaromârput Jerusalemib apᴋosineâlungine, ilûnatik ajaupialijarlutik inutoᴋaunermut.

⁵ Iglugasaksuillo apᴋosineâlungit tatadlalârput nukapianik niviarsianiglo pingoartunik apᴋosineâlungine.

⁶ Imâk oᴋarpok Nâlegak Zebaot: Tataminiarnarpat inuit tamakkoa amiakungita ijinginut uvlune ukkunane, tatamnadlartuksaugivâ ijimnût? oᴋarpok Nâlegak Zebaot.

⁷ Imâk oᴋarpok Nâlegak Zebaot: Ahâk, inuᴋotikka piulijomavakka nunamit seᴋerngub nuiviata nalânêtomit seᴋerngublo nipiviata nalânêtomit;

⁸ Tikiutijomârpakkalo ineᴋaromârpullo Jerusaleme; inuᴋotigijomârpakkalo, tâpkonungalo Gudeojomavunga mikseᴋârnerme idluarnermelo.

⁹ Imâk oᴋarpok Nâlegak Zebaot: Aggase pitsartutisigik, ilipse uvlune tamakkonane tusartose oᴋautsinik ukkuninga nalautaijut ᴋaninginit, oᴋautaujunik Nâlekab Zebaotib iglungata tungaviliortauningane, katimaviksoak igloliortauᴋovlugo.

¹⁰ Uvlut tâpkoa sivorngane inuit ikajûseᴋalaungilat, nergjutillônêt ikajûseᴋalaungilat; anijullo itertullônêt ulapirksauteᴋalaungilat, ômisukte pivlugo; inuit ilûnaita ômigijigêktilaurapkit.

¹¹ Mânale inuit makkoa amiakunginut ilinganialungilanga sorlo uvlune sivorlerne ilingalaurama, oᴋarpok Nâlegak Zebaot.

¹² Ulapirksaumik karngasûteᴋartuksaungmat; napârtok vaineliksak paungatârtuksauvok, nunalo sakᴋêjuksauvok perortitaminik, ᴋilaglo mitsuksoaᴋartuksauvok; inuillo ukkua amiakungit kingormgujitilârpakka tamakkoninga tamainik.

¹³ Imaitsomârporlo, sorlo ômisautiksaulaurapse inôᴋatigêksuit akorngane, ilipse Jûdab Israêliblo ᴋitorngangit, taimak piulijomavapse, saimarsautiksangolârposelo: sivôraniarase, aggaselo pitsartutisigik.

¹⁴ Imâk oᴋarmat Nâlegak Zebaot: Sorlo isumaᴋalaurama ajortomik piniarvigijomavluse, atâtapse ningarsarmanga, oᴋarpok Nâlegak Zebaot, annusingolaunginamalo;

¹⁵ Taimak isumaᴋalerivunga uvlune makkonane ajungitulivigijomavlugit Jerusalem Jûdablo ᴋitorngangit; sivôraniarase.

¹⁶ Makkoa tagva piniaraksarijase: ilûnase mikseᴋârtomik oᴋauseᴋaritse inôᴋatipsingnut; mikseᴋârtomik ulapirᴋsarnartomiglo idluarsaigitse itertarvipsingne:

¹⁷ Idluitomiglo isumertuiniarase ômatipsingne inôᴋatipsingnut; angilungnerillo saglûtaujut ungaginiarasigik: tamakkoa tamaita ômigidlarapkit, oᴋarpok Nâlegak.

¹⁸ Nâlekablo Zebaotib oᴋausingata tikipânga, oᴋarlune:

¹⁹ Imâk oᴋarpok Nâlegak Zebaot: Takᴋit sitamangata tallimangatalo 7-ingatalo 10ingatalo nerritailivingit ᴋuviasugviksaujomârput erᴋiertorviksauvlutiglo uvloksiorviksauvlutiglo ᴋuvianartunik Jûdab ᴋitornganginut; taimaimat mikseᴋârnek ulapirᴋsaullo ungagisigik.

²⁰ Imâk oᴋarpok Nâlegak Zebaot: Sulle tikidlalârput inôᴋatigêt inugasaksuillo unuktut inungit;

²¹ Iglugasaksuillo ilangita inungit asimingnut oᴋariartoromârput: Aisârta Nâlekab saimaninga ᴋenuarilugo, Nâlegarlo Zebaot ᴋenerlugo; aiᴋataujomagivunga.

²² Ilâ, inôᴋatigêt unuktut inôᴋatigêksuillo sôngojut tikitsomârput Nâlegak Zebaot ᴋeneromavlugo Jerusaleme, Nâlekablo saimaninga ᴋenuarilugo.

²³ Imâk oᴋarpok Nâlegak Zebaot: Uvlune tâpkonane angutit 10 inôᴋatigêksoarnit adsigêngitunik oᴋauselingnit Jûdiojûb annorânga tigumiaromârpât, oᴋarlutik: Ilagijomavapse, tusaumagapta Gudib ilagingmase.