Saggaria 7 - Labrador Inuttitut Heritage Bible

¹ Pijoᴋarporlo ataniub Dariusib jâringita sitamangane, Nâlekab oᴋausinga tikingmat Saggariamut, takᴋit 9ingata, tagva Kislivib, uvlungita sitamangane.

² Bêtelemiulle tiliklersimalauᴋput Sarêseremik Rêgemêlekemiglo tâpkoalo angutinginik ᴋenujartorᴋovlugit Nâlekab saimarsaininganik,

³ Oᴋarᴋovlugillo ajoᴋertuijunut Gudib Zebaotib iglunganêtunut nâlautaijunullo oᴋarlutik: ᴋeajuksauvêk sulle takᴋit tallimangane, ingmigolingatilungalo uvamnik, sorlo pinialaurama jârit makoa sutaijartut nâvlugît?

⁴ Nâlekablo Zebaotib oᴋausingata tikipânga, oᴋarlune:

⁵ Nunab inungit tamaita ajoᴋertuijullo oᴋarvigikit, oᴋarlutit: Jârit makkoa 70 nâvlugit, nerritaililaurapse kiksarluselo takᴋit tallimangane 7-inganelo, uvanga pivlunga nerritaililaukisê?

⁶ Nerrijarangapselônêt imerangapselônêt, nerrilungilasê pivluse, pivluselo imerlusê?

⁷ Tusaraksaringilasê oᴋautsit Nâlekab oᴋauserilauktangit nalautaijutigut sivorlitigut, Jerusalem inuktaᴋalaungmat pilluangongmattalo, iglugasaksuillo tâpsoma avatânêtut seᴋinerdlerlo naternangillo nunagijaulaungmattâ?

⁸ Nâlekablo oᴋausinga tikipok Saggariamut, oᴋarlune:

⁹ Imâk Nâlegak Zebaot oᴋarpok: Idluartomik erᴋartuileritse, ilûnapselo atunit ᴋatangutise unertutjivigisigik nâpkiningnermik ilapsugosungnermiglo;

¹⁰ Oᴋumaiksartiniarasigiglo uigarnerit, iliarsuillo, takorngartallo, aklujullo; ᴋatangutiselo nalipse idluitomik isumertuiviginiarasigik ômatipsingne.

¹¹ Tâpkoale nâlagomalaungilat, tuitiglo ᴋagvartipait ᴋunumut, siutitiglo simikpait tusaromangimut.

¹² Ilâ, ômatitik aligoᴋtut ilingatipait, tusarᴋonagit perᴋojanik oᴋautsiniglo Nâlekab Zebaotib tilijanginik anernermigut nalautaijutigut sivorlertutigut; tamanna pivlugo ningarnek angijok tikipok Nâlekamit Zebaotemit.

¹³ Imailivorlo: sorlo tâmna ᴋaigarsungmat, tâpkoalo tusaromangimatta, taimak tâpkoa ᴋaigarsulârput, uvangalo tusaromangilanga, oᴋarpok Nâlegak Zebaot;

¹⁴ Siamartitsomârpakkale ulajujoksoarmut inôᴋatigêksuit ilitarilaungitangita ilûnatik akornganut. Taimaglo tâpkoa kingorngane nuna ᴋemagauvok, tamaunârtoᴋangilaᴋ utertoᴋangilarlônêt: nuna kajungernartok inuᴋajuitungortingmatsuk.