Saggaria 6 - Labrador Inuttitut Heritage Bible

¹ Ijikka arlortilerivâka ama tautuklungalo, ahâglo, ᴋamutit unatautit sitamat allakarput ᴋaᴋaksoâk maggûk akorngangnit; ᴋaᴋaksoâglo ᴋaᴋorliovûk.

² ᴋamutit sivorlingat horseᴋarpok aupaluktanik; ᴋamutit aippanga horseᴋarpok ᴋernertanik;

³ ᴋamutit pingajuat horseᴋarpok ᴋaᴋortanik; ᴋamutillo sitamangat horseᴋarpok sinarnalaringnik.

⁴ Tagva kiovunga engelelo oᴋaᴋatigijiga oᴋautilugo: Makkoa sunauvât, Nâlegarâ?

⁵ Engeliblo akivânga oᴋarlunelo: Makoa tagva ᴋilaub anoringit sitamat, noᴋangaᴋârlutik nunaksûb ilûnane Nâlegangata sângane anilertut.

⁶ ᴋamutîk ᴋernertanik horselîk aularpûk nunamut avanêtomut; ᴋaᴋortalîglo aularpûk tâpkoa maliklugik; sinarnalariktalîglo aularpûk nunamut ânêtomut.

⁷ Aupaluktalîglo aularpûk ingerarviksarsiorlutik utitaᴋattarlutik nuname; tâmnalo oᴋarpoᴋ: Aularitse, nuname utitaᴋattarluse. Tagva nuname utitaᴋattarput.

⁸ ᴋaigarsugvigivânga tagva oᴋarvigilungalo, oᴋarporlo: Ahâk, nunamut avanêtomut aijut anernera inilangatipât nuname avanêtome.

⁹ Nâlekablo oᴋausingata tikipânga, oᴋarlune:

¹⁰ Aularutijaujut tigusivigikit, tagva Heldaimit, Tobiamillo, Jedaiamillo, uvlormelo tâpsomanetsainaᴋ ᴋailerit iterlutillo Josiab Sefaniab erningata iglunganut, Babilonemit tikisimajut itervigijanganut;

¹¹ Ilâ, tigusivigikit silberemik goldemiglo, niaᴋôteliorillo ililugillo Josuab, Jehôsadakib erningata, ajoᴋertuijersûb niaᴋoanut;

¹² Oᴋarvigiuglo imâk: Imâk oᴋarpok Nâlegak Zebaot: Ahâk, angut Nuitajomik atelik; nuitalârporlo iniminit igloliorlunelo Nâlekab katimaviksoanganik;

¹³ Tâmnaluatsiak igloliolârpok Nâlekab katimaviksoanganik; ânanausijaulârporlo, iksivalârporlo aulatsilunelo iksivautaksoamine; ajoᴋertuijoᴋsoaᴋalârporlo iksivautaksoangane; ulapirᴋsauteᴋaᴋatigêgomârpuglo.

¹⁴ Niaᴋôtillo tâpkoa Helemib Tobiablo Jedaiablo Heniblo, Sefaniab erningata, erᴋaijutigijaksarivait Nâlekab katimaviksoangane.

¹⁵ Ungasiktullo tikilârput igloliorᴋatauvlutiglo Nâlekab katimaviksoanganik, ᴋaujijuksaulârposelo Nâlekab Zebaotib tilingmanga ilipsingnut. Tamannalo naliutilârpok katsungaivluse nâletsiarupse Nâlekab Gudipse nippinganik.