Saggaria 5 - Labrador Inuttitut Heritage Bible

¹ Amalo ijîkka arlortipâka takolungalo, ahâglo, aglarait immûmajut tingijut.

² Oᴋautivângalo: Sunamik takovêt? Kiovungalo: Takovunga aglarangnik immûmajunik tingijunik, talertut 20tut takitigijunik, talertullo 10tut siliktigijunik.

³ Oᴋautivânga tagva: Tamadja pilluᴋojijût nunamut tamânut aulartok: tigliktut ilûnatik pêjartaujomârmatta tamângat tâpkoa maliklugit, angiluktullo ilûnatik pêjartaujomârmatta tamângat tâpkoa maliklugit.

⁴ Aulartitsomârpara, oᴋarpok Nâlegak Zebaot, iteromârporlo tigliktûb iglunganut, angiluktûblo atera taivlugo iglunganut: iglungatalo iluanêtuartuksauvok, nungulârpâlo ᴋejuktangit ujaraktangillo ilaliullugit.

⁵ Engeliblo oᴋaᴋatigijima pigannerlune oᴋautivânga: Ijîkik arlortikik takolutillo una anijoᴋ sunaumangât.

⁶ Oᴋarpungalo: Sunauvâ? Tâmnalo oᴋarpok: Tâmna anijok tagva ôktûte efa. Oᴋarporlo sulle: Tamadja idluinerit nunaksoarme ilûnane:

⁷ Sunaubvalo aᴋitok talente kiviktauvok, taggalo arnak iksivajok ôktûtib efab iluane.

⁸ Oᴋarporlo: Tamadja idluinek; êgipâlo ôktûtib efab iluanut: oᴋumailutarlo aᴋitok êgipâ ôktûtib pânganut.

⁹ Ijîka arlortipâka tagva tautuklungalo, ahâglo, arnâk maggûk anivûk, anorelo esarunginêpok; esaroᴋarpuglo siggorᴋortojûb esarungititut: ôktûtelo efa kivikpâk nunab ᴋilaublo akorngangnut.

¹⁰ Engelelo oᴋaᴋatigijiga oᴋautivara: Namut tâpkoa efa âpakkô?

¹¹ Oᴋautivângalo: Igluksanganik iglolioromavâk nuname Sinareme: pijarêrpallo, tâmna tagvunga ilijaulârpok tungaviksaminut.