Saggaria 3 - Labrador Inuttitut Heritage Bible

¹ Unertutivangalo Josuamik ajoᴋertuijersoarmik, nangertomik Nâlekab engelingata sângane, Sâtanaselo nangerpok tâpsoma talerpiata tungâne akkerartoromavlugo.

² Nâlekablo Sâtanase oᴋautivâ: Nâlekab suadlarlitit, Sâtanase; ilâ, Nâlekab Jerusalemik annerosuktûb suadlarlitit: una aumaulungilâk ikomamit amujaujôk?

³ Josuale annorâlijarpok ipektudlartunik, nangerporlo engelib sângane.

⁴ Tapsomalo kiovlune sâmine nangertut oᴋautivait: Annorât ipektudlartut pêrsigik tâpsomangat. Tâpsomungalo oᴋarpok: Ahâk, idluitulinitit pêjarpakka ilingnit, annorâromavagillo pinnarnadlartunik.

⁵ Oᴋarpungalo: Piojomik nasarlitsuk. Taimaimat piojomik nasarpât, annorârlugolo; Nâlekablo engelinga nangerpoᴋ tagvane.

⁶ Nâlekablo engelingata Josua nipliavigivâ, oᴋarlune:

⁷ Imâk oᴋarpok Nâlegak Zebaot: Apᴋutauᴋojamne arvertaromaguvit, perᴋojakkalo nâlegomagungne, tagva igluga aulataksarivat, iglumalo avatâ avaluliorsimajok pairilugo, iterviksaᴋartitsomavagillo ukkoa mâne nangertut akornganut.

⁸ Nâlagit, Josua ajoᴋertuijersoangojotit, igvit ilatillo sângne iksivajut; angutaungmatta tâpkoa kigligiutjijut: tagva ahâk, kivgara akkerôjoᴋ tikiutitsomârpara.

⁹ Ahâk, ujaraᴋ Josuab sânganut ilijara; ujarame tâpsomane ijeᴋarpoᴋ 7nik: ahâk, uvanga aglangit aglakpakka, oᴋarpoᴋ Nâlegaᴋ Zebaot, nunablo tâpsoma idluituliningit pêjaromavakka uvloinarme.

¹⁰ Uvlorme tâpsomane, oᴋarpoᴋ Nâlegaᴋ Zebaot, vaineliksataliub atânut paungatannaᴋtaliksûblo atânut ᴋaiᴋojiᴋatigêgomârpose.