Saggaria 2 - Labrador Inuttitut Heritage Bible

¹ Ijikkalo arlortipâka takolungalo, ahâglo, angut noᴋakserpalautemik tigumiartok.

² Oᴋarpungalo: Namungarᴋêt? Oᴋautivângalo: Jerusalem ôktoriartorpara, ᴋanok silingninga ᴋanorlo takininga takojomavlugo.

³ Ahâglo, engele oᴋaᴋatigijiga anivok, engeliblo tâpsoma asia anigivok tâmna pagreartorlugo,

⁴ Oᴋautivâlo: Aᴋpangerit, inosuktok tâmna oᴋarvigivlugo, oᴋarlutit: Jerusalem inigijaulârpok iglugasaksoatitut ᴋarmaᴋsoaᴋangitutitut, inugasaksuit nergjutillo tagvanêtut unuktoksôningit pitjutigivlugit.

⁵ Uvanga, oᴋarpok Nâlegak, ᴋarmaksoangojomârama ikomalik tâpsoma avatâne, ânanausijutaujomâramalo tâpsoma iluane.

⁶ Atê, atê, ᴋemâgitse nunamit avanêtomit, oᴋarpok Nâlegak, siamartigapse sorlo ᴋilaub anoringit sitamat, oᴋarpok Nâlegak.

⁷ Atê, Zion, nunaᴋartotit Babilonib paniane, ᴋemâlerit.

⁸ Imâk oᴋarmat Nâlegak Zebaot: ânanausijaunerub kingorngane tilivânga inôᴋatigêksoarnut ilipsingnik aserorsaijunut: ilipsingnik aktuijûb ijime takonârtinga aktorpâ.

⁹ Tagva, ahâk, aggakka aulatitsomârpakka tâpkoa ᴋolâtigut, aᴋsârnigaujomârpullo kivgartolauktunut tâpkoninga; ᴋaujijuksauvoselo Nâlekab Zebaotib tilingmanga.

¹⁰ Erᴋiertorit ᴋuviasudlarlutillo, Zionib pania; tagva ahâk, ᴋaivunga, ilingne ineᴋaromavlunga, oᴋarpok Nâlegak.

¹¹ Inôᴋatigêksuillo unuktut ilaulârput Nâlekamut uvlorme tâpsomane, inuᴋotigijomârpakkalo; ilingnelo ineᴋalârpunga, ᴋaujijuksaulârpotillo Nâlekab Zebaotib tilingmanga ilingnut.

¹² Nâlekablo Jûda kingormgutilârpâ piksarsiarilugo nuname ivsornaitome, Jerusalemelo annerijomârpara.

¹³ Uvinilît ilûnatik nipangerlit Nâlekab sângane; iniminit ivsornaitomit tupaksimangmat.