Saggaria 13 - Labrador Inuttitut Heritage Bible

¹ Uvlorme tâpsomane Dâvidekunut Jerusalemiunullo puilavik matoêrtaujomârpok ajortoêrutiksak ivsornairutiksarlo.

² Pijomârporlo uvlorme tâpsomane, oᴋarpok Nâlegak Zebaot, kipisijomârama gudingoat atinginik nunamit, erᴋaumajaujungnairomârpullo; nalautaijullo anernerlo ivsornartok aulartitsomârpakka nunamit.

³ Pijomârporlo, nalautaijoᴋalerpat sulle, atâtangata anânangatalo ernertalauktûk tâpsominga oᴋautijomârpâk: Inôjuksaungilatit; saglonernik oᴋâlagavit Nâlekab atingane; atâtangatalo anânangatalo ernertârtûk tâpsominga kapijomârpâk, nalautailerpat.

⁴ Pijomârporlo uvlorme tâpsomane, nalautaijut ilûnatik takotitjutitik kangusûtigijomarmagit, nalautaijarangamik, ulingmiglo merᴋolingmik atisilulângilat uivêrikleromavlutik;

⁵ Oᴋalârporle: Nalautaijôlungilanga, perorsêvilerijôvungale; inûb pisiaringmanga inôsungnimnit.

⁶ Tâpsomungalo oᴋartoᴋaromârpok: Ikkit ukkoa aggangnêtut suvât? Kiolârporlo: Makkoninga ikkilertaulauᴋpunga ilanârijama iglungane.

⁷ Saviksoak tupalerit, mianersijiga pâvigilugo, angullo inôᴋatigijara, oᴋarpok Nâlegak Zebaot, mianersijoᴋ annauleruk, saukallo siamartitaulârput; aggakkalo sâtitsomârpakka piarangnut.

⁸ Pijomârporlo nuname ilûnâne, oᴋarpok Nâlegak, avgoâk maggûk kipijaujomarmatta toᴋolutiglo, pingajuingille amiakôjomârput.

⁹ Pingajuingillo ikomakôrtitsomârpakka, sujungaititsomârpakkalo, sorlo silbere sujungaititaungmat, nautsertoromârpakkalo, sorlo golde nautsertortaungmat: atera ᴋaigarsugvigijomârpât, tusaromârpakkalo; oᴋaromârpunga: Tamadja inuᴋotigijakka; tâpkoalo oᴋaromârput: Nâlegak Gudigivara.