Saggaria 12 - Labrador Inuttitut Heritage Bible

¹ Oᴋausek oᴋumaitok Nâlekab oᴋauserijanga Israêle pivlugo. Imâk oᴋarpok Nâlegak, ᴋilangmik isivitsijok, nunamiglo tunganilêjok, inûblo anerninganik ilumigijanganik pingortitsijok:

² Ahâk, Jerusalem ᴋajûtangortitsomârpara oggojarnartok inôᴋatigêksoarnut tamainut avanêtunut, Jûdatauk pijauᴋataujomârpok Jerusalem sorᴋsuktunut ilumajaulerpat.

³ Uvlormelo tâpsomane Jerusalem ujaraᴋsoangortitsomârpara oᴋumaitok inôᴋatigêksoarnut tamainut; ilûnatik oᴋumaititut tâpsomunga angijomik kilertaujomârput; inôᴋatigêksuillo ilûnatik nunaksoarme tâpsomunga katersoromârput sorᴋsugvigijomavlugo.

⁴ Uvlorme tâpsomane, oᴋarpok Nâlegak, horsit ilûnaita ᴋaggaidlaromârpakka, ikimajungillo isumairutitilugit; ijîkkalo uitatitsomârpâka Jûdab ᴋitornganginut, inôᴋatigêksuillo horsingit tamaita annaujomârpakka tautugungnaitilugit.

⁵ Jûdablo angajoᴋângit ômatimingne oᴋaromârput: Jerusalemiut pitsartutigivakka Nâlekame Zebaoteme Gudimingne.

⁶ Uvlorme tâpsomane Jûdab angajoᴋângit aumaliniktut ᴋejungnêtotut îtitsomârpakka, naneroaktullo ikomajotut ivît ᴋepitat akorngane; nungulârpaillo inôᴋatigêksuit tamaita avatânêtut, talerpingmêtullo saumingmêtullo: Jerusalemelo iniksaᴋaromârivoᴋ inimine, tagva Jerusaleme.

⁷ Nâlekablo Jûdab tupingit sivorliutilugit piulijomârpait Dâvidib kinguvângita inornarningat Jerusalemiblo inungita inornarningat nertortauluarᴋonagit Jûdakunit.

⁸ Uvlorme tâpsomane Nâlekab Jerusalemiut serngnigilârpait; sukkôjullo tâpkoa akorngane Dâvidetut ilârput uvlorme tâpsomane; Dâvidekullo Gudetut îtsomârput, Nâlekab engelingatut tâpkoa sângine.

⁹ Pijomârporlo uvlorme tâpsomane nungunasuaromârapkit inôᴋatigeksuit ilûnaita Jerusalemut sorᴋsugiartortut.

¹⁰ Dâvidiblo kinguvânginut Jerusalemiunullo kovijomârpara anernek saimanartitsijok ᴋenutitsijorlo; takojomârpullo kapilauktamingnik; ᴋeagijomârpâllo sorlo ernetuak ᴋeagijaungmat, ogguarutigijomârpâllo sorlo ᴋitorngak angajuklek oggorijaungmat.

¹¹ Uvlorme tâpsomane ᴋeaneᴋadlalârpok Jerusaleme, ᴋeanektut Hadad-Rimmoneme naksarme Megiddoneme.

¹² Nunamiullo ᴋeadlaromârput, ᴋitorngarêt ilûnatik ingmikôrlutik; Dâvidib kinguvângita ᴋitorngarêngit ingmikôrlutik, nuliangillo ingmikôrlutik; Nâtaniblo kinguvângita ᴋitorngarêngit ingmikôrlutik, nuliangillo ingmikôrlutik;

¹³ Lêvib kinguvângita ᴋitorngarêngit ingmikôrlutik, nuliangillo ingmikôrlutik; Simeib ᴋitorngarêngit ingmikôrlutik, nuliangillo ingmikôrlutik;

¹⁴ ᴋitorngarêllo amiakôjut ilûnatik, ᴋitorngarêt atunit ingmikôrlutik, nuliangillo ingmikôrlutik.