Saggaria 11 - Labrador Inuttitut Heritage Bible

¹ Upkoatit upᴋoêrkit, Libanon, ikoma nungutsiᴋovlugo sidereᴋotingnik.

² Erinaluaᴋilerit, ᴋeblariktotit, sidere oggosimangmat, piojôjullo aserortaungmatta; erinaluaᴋileritse, Basanib napârtungit sôngojoksuit ilipse, napârtolik avaluliorsimajok ukpimat.

³ Mianersijut erinaluaᴋijut nipingit tusaksauvok; pinnarijangat aserortaungmat. Loevearait erinaluaᴋijut nipingat tusaksauvok, Jordanib pinnarsautigijanga aserortaungmat.

⁴ Imâk oᴋarpok Nâlegak Gudiga: Saukat toᴋotaksat nerripkarkit;

⁵ Pisiarijingita toᴋopait pidlaraksaunasugingilallo; niuviangotitsijullo tapkoninga oᴋarput: Nâlegak nakorijaule, akluinama; mianerijingitalo ilapjugingilait.

⁶ Nunab inungit ilapjugijungnairomagapkit, oᴋarpok Nâlegak: ahâgle, inuit ilûnatik pititsomavakka inôᴋatingita agganginut, ataningitalo agganginut: tâpkoalo nuna aseroromârpât, piulijomângilakkalo agganginit.

⁷ Taimaimat saukat toᴋotaksat nerripkarpakka, saukat ajulernerpât. Tigusivungalo ajaupiârnik maggûngnik, aippangalo taivara Inornartomik, aipâlo Kelarutinik; saukallo nerripkarpakka.

⁸ Mianersijullo pingasut kipipakka takᴋerme atauserme; ariulaurapkit, tâpkoalo tarningita ᴋuinagivânga.

⁹ Oᴋarpunga tagva: Nerripᴋaromangilapse: toᴋolertok toᴋole; tamaromajullo tamarlit; amiakôjullo atunit nerrilit asimik uvininginik.

¹⁰ Ajaupiarlo Inornartok tiguvara naviklugolo, angerutimnik inôᴋatigênut tamainut angerutigilauktamnik serᴋomitsijungnarᴋovlunga.

¹¹ Serᴋomitaulaukporlo uvlorme tâpsomane: saukallo ajulernerpât uvamnik kamatsiartut misigidlarput Nâlekab tamanna oᴋauseringmago.

¹² Oᴋautivakkalo: Idluarigupsiuk akkiksarsiaksara ᴋaisiuk: pijomangikupsele, taimaituinarle. Tagva akkiksarsiaksara ôktorpait kênaujat silberit 30.

¹³ Nâlekablo oᴋautivânga: Egikit maggalerijomut, akkiksatsiavait uvamnik akkitutiginasugijanginik. Kênaujallo silberit 30 tiguvakka êgilugillo maggalerijomut Nâlekab iglungane.

¹⁴ Tagva ajaupiângma aipanga Kelarute navikpara, serᴋomitsijungnarᴋovlunga Judablo Israêliblo ᴋatangutigêngnîgingnik.

¹⁵ Nâlekablo oᴋautivânga: Tigusimit mianersijûb silaitûb atortanginik.

¹⁶ Tagva ahâk, makititsijomârpunga mianersijomik nuname, nalipsainiangitomik tamarsimajunik, ᴋenerniangitomiglo siamangajunik, inûliklerniangitomiglo akᴋunartaumajunik, nerripkainiangitomiglo atsuilijunik, nerrilârtomigle kuinijut nerᴋinginik, kukingillo aliktorlugit.

¹⁷ Kapianarmêk mianersijut atungitut, saukanik ᴋemaijut! Saviksûb talinga pilârpâ, ijingalo talerpik: talinga uvinêrutilârpoᴋ, ijingalo talerpik tâktitaumarilârpok.