Saggaria 10 - Labrador Inuttitut Heritage Bible

¹ Nalegak silalungmik ᴋenuvigisiuk silalûb kingorliojûb naliuningane, ilâ, Nâlegak ᴋaumalaliortok; tâpsomalo silalungmik nâmaktomik tunitjivigilârpait, iviksukaniglo naternarme ilûnainut.

² Gudingoat sulingitunik oᴋauseᴋalaungmatta, nalautainerluktullo saglonernik takotitjuteᴋarmatta; sinnartomanerniglo tukeᴋangitunik oᴋâlavut, sulingitomik manigoivut; tamanna pivlugo arvertarput saukatitut mianerijeᴋangitutitut.

³ Ningarnera katsungailerpok mianersijunut, parngnillo sugiaromârpakka; Nâlekab Zebaotib katimgajoᴋotine, tamadja Jûdab ᴋitorngangit, nalipsarmagit, âᴋiksoromârpaillo horsimitut piojutitut sorᴋsungnerme.

⁴ Tâpsomangat sakᴋeromârput ujarak terreᴋuksaᴋ, kikiarlo, pitikselo unatautiksaᴋ, aulatsijullo ilûnatik ilagêklutik.

⁵ Pitsartujoksoatutitullo îtsomârput, ômigijitik tullerarlugit aᴋilupiarme apᴋosineâlungnêtome unatarvingme; sorᴋsugomârpullo, Nâlekab ilagingmagit; ikimajullo horsinut ila ᴋemalârput.

⁶ Jûdablo ᴋitorngangit pitsartutitsomârpakka, Josefiblo ᴋitorngangit piulijomârpakka, iniksaᴋartitsomârivakkalo, nâpkigijomârapkit; ajaktortaumalaungitutitullo îtsomârivut; Nâlegauvlunga Gudeovunga tâpkonunga, tusaromârpakkalo.

⁷ Efraimemullo ilingajut pitsartujoksoatitut îtsomârput, ômatingillo ᴋuviasudlaromârput sorlo vainemut; ilâ, ᴋitorngangita takojomârpât, ᴋuviasugomârpullo; ômatingit ᴋuviasugomârput Nâlekame.

⁸ Uvingiartoromârpakka, katersorlugillo; piuligapkit; unuksivaliajomârpullo sorlo unuksilaungmatta.

⁹ Karngasoromârpakkalo inôᴋatigêksuit akornganut, erᴋaumalârpângalo nunane ungasiktune; inôjuksauvullo ᴋitorngatik ilagilugit, uteromârlutiglo.

¹⁰ Utertitsomârivakkatauk nunamit Egiptenemit, katersoromârlugillo Assiriamit, tikiutijomârpakkalo nunamut Gileademut Libanonemullo; nimnioromârpullo.

¹¹ Imarbiglo siorniornartotalik apᴋutigilârpât, imablo malliksoangit annaulârpait, kôksûblo Nîlib itiningit ilûnatik panilârput: Assiriablo piojorininga oggotitaujomârpok, Egipteniblo ataningata ajaupianga nungutaujomârpok.

¹² Pitsartutitsomârpakkalo Nâlekame; ingeraromârpullo tâpsoma atingane, oᴋarpok Nâlegak.