Saggaria 1 - Labrador Inuttitut Heritage Bible

¹ Takᴋit 8ingane, Dariusib jâringita aippangane, Nâlekab oᴋausinga tikipok Saggariamut, Iddub erningata Berekiab erninganut, nalautaijomut, oᴋarlune:

² Nâlekab angijomik atâtagilauktase nâmaksingijutigilaukpait.

³ Taimaimat oᴋautikit: Imâk oᴋarpok Nâlegak Zebaot: Uteritse uvamnut, oᴋarpok Nâlegak Zebaot, uvangalo uteromagivunga ilipsingnut, oᴋarpok Nâlegak Zebaot.

⁴ Atâtapsetut îniarase, tâpkonunga nalautaijut sivorlit ᴋaigarsulaukput, oᴋarlutik: Imâk oᴋarpok Nâlegak Zebaot: Uteritse mâna apᴋotigijapsingnit idluitunit, piniarnipsingnillo idluitunit; tâpkoale tusângilat, nâlalungilallo uvamnik, oᴋarpok Nâlegak.

⁵ Atâtase tâpkoa naneᴋât? Nalautaijullo inôtsainarᴋât?

⁶ Oᴋausimale kajusijutigijamalo, perᴋolauktama kivgamnut nalautaijunut, atâtase angulaungilagît? Tâpkoalo sâput oᴋarlutiglo: Sorlo Nâlegak kajusilaurame ᴋanok piniarvigijomavluta apᴋutigijavut piniarnerijavullo maliklugit, taimak piniarvigivâtigut.

⁷ Takᴋit 11ingata, Sebatemik taijab, uvlungita 24ingane, Dariusib jâringita aippangane, Nâlekab oᴋausinga tikipok Saggariamut, Iddub erningata Berekiab erninganut, nalautaijomut, oᴋarlune:

⁸ Unnuarme takotitjutikut takovunga, ahâglo, angut ikimajok horsemut aupaluktamut, tâmnalo nangerpok ukpigait tipitsiariktut taggalinermêtut akorngane; tâpsomalo tunuane horseᴋarpok aupaluktanik, milaktaniglo, ᴋaᴋortaniglo.

⁹ Oᴋarpunga tagva: Nâlegara, ukkoa suvât? Engeliblo oᴋaᴋatigijima oᴋautivânga, Unertutjivigijomavagit ukkoa sungmangâta.

¹⁰ Angullo ukpigait tipitsiariktut akorngane kiovlune oᴋarpok: Makoangovut Nâlekab tilijangit arvertarᴋovlugit utitaᴋattarlutik nunakut.

¹¹ Tâpkoalo Nâlekab engelinga nangertok ikpigait tipitsiariktut akorngane kiovât, oᴋarlutiglo: Nuna ingerarvigilaukpavut utitarluta, ahâglo, nuna ilûnane nipungavok erᴋasungilarlo.

¹² Tagva Nâlekab engelinga kiovok oᴋarlunelo: Nâlegak Zebaot, ᴋanok sivitutigijomik sulle nâpkigosuktaililârᴋêt Jerusalemik Jûdablo iglugasaksoanginik, ningarvigijarnik jârit ukkoa 70 nâvlugit?

¹³ Nâlekablo engele oᴋaᴋatigijiga akivâ oᴋautsinik ajungitunik, oᴋautsinik manigornartunik.

¹⁴ Taimaimat engelib oᴋaᴋatigijima oᴋautivânga: Niplialerit, oᴋarlutit, Imâk oᴋarpok Nâlegak Zebaot: Jerusalem Zionelo ilungertûtigivâka ilungertornermut angijomut.

¹⁵ Inôᴋatigêksuillo nipungajut angijomik nâmaksingijutigivakka: angijôngitomik nâmaksingilaurama, tâpkoa ikajorput nangminermingnik ajortomut.

¹⁶ Tamanna pivlugo imâk oᴋarpok Nâlegak: Jerusalemut utilerivunga nâpkiningnelijarlunga; igluksara tagvane igloliortaujuksauvok, oᴋarpok Nâlegak Zebaot, noᴋakserpalaullo isivitaulârpok Jerusalemut.

¹⁷ Nipliasârit, oᴋarlutit, Imâk oᴋarpok Nâlegak Zebaot: Iglugasaksoaᴋotikka pikuminartut aglivalialârput sulle; Nâlekablo Zione manigoromârpâ, Jerusalemelo ama annerijomârpâ.

¹⁸ Ijikkalo arlortipâka takolungalo, ahâglo, nakjuit sitamat.

¹⁹ Engelelo oᴋaᴋatigijiga oᴋautivara: Ukkoa suvât? Akkivângalo: Ukkoa nakjuit siamartitsilauktut Jûdamik, Israêlemiglo, Jerusalemiglo.

²⁰ Nâlekablo unertutjivigivânga sabviortinik sitamanik.

²¹ Oᴋarpunga tagva: Sumik sulijartorᴋât tâpkoâ? Oᴋarporlo: Ukkoa nakjuit Jûdamik siamartitsilauᴋtut, niaᴋominik makititsijoᴋarᴋonago: makkoale tikiput pagvisaromavlugit, inôᴋatigêksuit nakjungit nakatsomavlugit, makititsilauᴋtut nakjumingnik Jûdab nunanganut siamartitsomavlugo.