Ruth 2 - Labrador Inuttitut Heritage Bible

Ruth kattersivok sullugainernik Boasib perorsêvingane.

¹ Angutekalaukpoktauk, Naemib uingata illanarijanganik, Elimêlechib illanginit, Boasemik attelingmik, anguteôlauktomik perᴋutelingmik.

² Ruthelo Moabitereôjok Naemimut oᴋarpok: Perorsêvingmut ailaulanga, sullugainerniglo kattersilunga, tamna malliklugo saimaneksivigijara. Tapsomale oᴋautiva: Ailerît panik.

³ Tamna aivok, tikkilune kattersivok perorsêvingme kibluijut malliklugit. Nellautsivorlo perorsêvik tamna perkutaulaungmat Boasemut Elimelechib illanginit pijomut.

⁴ Ahâglo, Boase Bethlehemit pivok, oᴋarlunelo kibluijunut: Nâlekab illagilise! Tapkoa kiovut: Nâlekab saimartilitit!

⁵ Boaselo kivgaminut kibluijunut Angajoᴋangortitaumajomut, oᴋarpok: Kia arnak una pigivauk?

⁶ Kivgarlo angajoᴋangortitaumajok kibluijunut kiovok, Oᴋarlunelo: Arnauvok tamna, Moabitereôjok, Naemi Illagêllugo utterlauktok Moabiterit nunanganit.

⁷ Oᴋalaungmat: Nagliktara, kattersikolaunga kippitat akkorngane, kibluijut malliklugit; taimâglo tikkipok sullilunelo tagvane uvlâmit mânna tikkilugo, iglominelo annikitotuinarmik nokᴋarpok.

⁸ Tagva Boas Ruthemut oᴋarpok: Tussârkît pannîk? Perorsêviub oma assianut aijuksaungilatit, kattersilutit; nulerniarnaglonêt ovangat, arnaᴋotimnetualerille;

⁹ Takkolutillo nane kibluivigijanganik perorsêvingme, tagvunga mallikit. Angutekotikka perkolaukpakka ullapitaukonak kinamut. Immerujarangavillo, ailerit immerᴋaumut, nukapiakotima kalluvigijanganut, immerlutillo.

¹⁰ Tagva pâmakterpok kênane pûvlugo, tuksiarlunelo nunamêdlune, oᴋautivalo: Sunamut saimaneksivik ijikpît sângangne, illitarigamga, takkorngartaugalloartunga?

¹¹ Boase kiovok, oᴋautilâlo: Oᴋautsaumavunga tamainik pinniarnerilauktarnik sakkingnut, uikpit tokᴋungata kingorngane; atâtait anânaillo, inûlervîllo kemalaurangne, inûᴋattigêksoarnullo tikkisimavlutit illitarilaungitarnut sivorngane.

¹² Nâlekab pinniarnerilauktat akkilêjutigiliuk illingnut, akkilertaunîllo namâmarigle Nâlekame Israelib Gûdingane, tikkivigijarne; esarᴋungita attâne Sungertutiksaᴋaromavlutit.

¹³ Tamna oᴋarpok: Saimaneksilaunga ijikpit sângangne, Nâlegâk; mannigoramga, kivgallo pitsiarlutit oᴋarvigivat, kivgavit illangatitun îlungitungalônêt.

¹⁴ Boasib oᴋautivâ: Nerriviksaulerpat najutilerit, Kakᴋojaktorlutillo, tamuatillo missuktiuk sêrnartomut. Tamnalo ikterpok kibluijut senianut. Tapsomalo manijervigiva Kakᴋojaksanik jarrasimajunik; tamnalo nerrivôk akkeartorlunelo amiakokartitsilarmelo.

¹⁵ Nikkovingmallo kattersilune, Boasib nukapiakotine perkovait, oᴋarlunelo: Kippitat akkornganêtauk kattersikogisiuk kangusuktiniarnagolo;

¹⁶ Kattersimajunittauk amiakoᴋartitsileritse, ᴋemailuselo, kattersikovlugo tamattominga, suartoᴋarniaranelo tapsominga tamanna pivlugo.

¹⁷ Taimâk kattersivok perorsêvingme unnuk tikkilugo, katjuklugillo kattersorlauktane; Efalo tatteᴋasalaukpok Gerstenik.

¹⁸ Kivikpaillo, ailunelo iglugaseksoarnut, sakkingatalo takkovait kattersorlauktangit. Tagva sagvarpa tunnilâlo tapsomunga amiakogilauktane akᴋeartornekogilauktaminit.

¹⁹ Tagva sakkingata oᴋautiva: Nane uvlome kattersilaukît, nanelo sennalaukît? Saimartitaule illitarksilauktok illingnik. Tapsomale sakkine oᴋautiva, kiname sennavigilauktamine, oᴋarlunelo: Angut sennavigilauktara uvlome, atteᴋarpok Boasemik.

²⁰ Naemile ukkuaminut oᴋarpok: Saimartitaule Nâlekamut, takkopsoanine sapkolaunginamiuk, tamangnut inôjunut tokᴋungajunullo. Naemilo oᴋarpok tapsomunga: Angut tamna illagivavut, kingormgujijuksangôlunelo uvaptingnik.

²¹ Ruth Moabitereôjok oᴋarpok: Oᴋautilaurivânga: Nukapiakotimnut illautsainartuksauvotit, kattersiᴋârtinagit tamainik perortoᴋotimnik.

²² Naemi Ruthemut, ukkuaminut oᴋarpok: Nâmakpok panîk, tapsoma arnakotingitaularkattigigungne, innertertaukonak assiata perorsêvingane.

²³ Taimak Boasib arnakotinginut illautsainarpok, kattersilunelo, kattersivik Gerstenik Weizeniglo soraikârtinago; utterlunelo sakkiminut.