Ruth 1 - Labrador Inuttitut Heritage Bible

Ruth ingergarpok Naemi illagêllugo Bethlehêmut.

¹ Nelliutome taipsomane idluarsaijut atanniotillugit, kângnartokalaukpok nuname. Angullo Bethlehêmiok Judamêtomiok, nûlaukpok ingergarlune Moabiterit nunanganut, nulliane ernangnelo illagêllugit;

² Atteᴋalauktok Elimêlechemik, nulliangalo Naemimik, ernigiglo aipanga Mahlonemik, aipalo Chil-Jonemik, Efratemiongôlaukput Bethlehêmit Judametomit. Tikkinamiglo Moabiterit nunanganut tagvanetualaukput.

³ Elimelechelo Naemib uinga tokᴋovok, tâmnalo amiakolerpok ernangne illagêllugik.

⁴ Tapkoa nullianikpuk arnângnik Moabitereôjungnik. Aipanga atteᴋalaukpok Arpamik, aippa Ruthemik. Tagvanelo Nunaᴋalaukârlutik Jârinik tellimaujortunik,

⁵ Tamarmîk tokkolerpuk, Mahlon Chil-Jonelo; arnârlo amiakolaukpok ernangminit uingminillo.

⁶ Tagva parngnailerpok ukkuangne illagêllugik, aularmilunelo Moabiterit nunanganit; tussarlaurame Moabiterit nunangane, Nalekab innuᴋotine nellipsarlaungmagit, kakkojaksamiglo tunnitsivigingmagit.

⁷ Annilaukporlo innimit, innigilauktaminit, ukkuakitalo illagivâk. Pissuklunelo apkome, tikkitsomavlune Judakut nunanganut,

⁸ Ukkoangminut oᴋarpok: Aileritik utterlutiglo attunit anâname iglunganut. Nâlekab napkiningnermik pinniarvigilitik sôrlo illiptik tokkungajune, uvamnelo pilauraptik.

⁹ Nâlekab tunnitsivigilitik, innilanganermik Nachvârkovlutik, attunit uime iglungane; kunnikpâglo. Tagva nippitik kagvarpâk ᴋêalutiglo,

¹⁰ Oᴋautivâglo: Illagêllutit nunakotingnut aijomavoguk.

¹¹ Naemile oᴋarpok: Uttileritik panîka! Sôg illagijomavitinga? ᴋanok pijomârtome erneᴋarungnarniarkîk timimne uingolerniartungnik illiptingnut?

¹² Uttileritik panîka ailutiglo; mânale ningiongoluarpunga uingnigungnarnermut. Oᴋarajaralloarumalo: Nerriungnarpok unuarme tamattomane uingningniarama, ᴋittornganiglo erniniarama,

¹³ ᴋanorle utakᴋijungnaralloarkitîk inumariolerninginik? ᴋanok mulludlartuksauvitik uingnigatîk? Aukak, panîka! Naiperᴋotigidlaraptik; Nâlekab aggangita akkerartorlunga tikkidlarmanga.

¹⁴ Tagva nippitik kagvarpakik ᴋêanersaulutiglo sulle. Arpablo sakkine kunnikpâ; Ruthele tapsomanêtuarpok.

¹⁵ Tamnale oᴋarpok: Ahâk angajungoit utterpok Inuᴋotiminut Gûdiminullo; igvittauk utterit angajungoit malliklugo.

¹⁶ Ruth kiovok: Oᴋarviginiarnanga ᴋemmajaksarigapkit, uttertuksaugamalo illingnit. Aivigijarnut, tagvunga aijomagivunga; ânokᴋarvigijarne, tagvane nokᴋaromagivunga; inuᴋotitit inuᴋotigivakka, Gûdillo Gûdigivara.

¹⁷ Tokᴋoniarvingne, tagvane tokᴋoniarivunga, tagvanelo illijartortaujomagivunga. Nâlekab imâk imâglônêt pinniarvigilinga, tokᴋûb avititaksarivâtiguk.

¹⁸ Takkogame mânna, attangusivlune issumaᴋarmat aiparijomavlugo, oᴋarvigijungnailerpa tamattominga.

¹⁹ Taimâk tapkoa ingiarᴋattigêkpuk, Bethlehêmut Tikkiᴋâratik. Bethlehemullo pingmânnik iglugaseksoarmiut Ilûnatik innilangajuêrutigivakit, oᴋarlutiglo: Tamna Naemiôva?

²⁰ Tâmnale oᴋarpok: Tainiarassinga Naemimik, taingarsingale Maramik, ajugakangitub angijomik kiksartilaungmânga.

²¹ Pittaᴋaloriklunga aularlaukpunga, angênarlungale Nâlekab angerartilaurivânga. Sôgle Naemimik taivissingâ? Nâlekab miklilertilauralloarmanga, ajugaᴋangitublo Kiksartimânga.

²² Kattersivigle Gerstenik nelliutilaukpok Naemi ukkuangalo Ruth, Moabitereôjok, utterlaungmannik Moabiterit nunanganit Bethlehêmut.