Rômiunut 9 - Labrador Inuttitut Heritage Bible

Gudib issumaminik nâpkigivait inuit okpertitaujut, Judinit kissianiungitoᴋ nalojunilletauᴋ pijut.

¹ Miksekartomik oᴋarpunga Kristuseme, saglunangalo, tarnima nalunginingata kigligiksarvigingmanga Anernerme ajunginerme,

² Angijomik kiksarama ânialarmalo sorainanga ômatipkut.

³ Nangmineᴋ ilungertorungnarajarpunga Kristusemut ômigijaksangortitaujomavlunga ᴋatangutikka pivlugit, uvinikut kinguvângoᴋatikka;

⁴ Tâpkoa Israêlemit kinguvângovut, ᴋitorngaunermiglo, ânanaunermiglo, angeᴋatigêngnermiglo, perᴋojaniglo, kivgartornermiglo Gûdemut, angersimanermiglo pitaᴋarput;

⁵ Tâpkoa atâtagivait sivorlît, tâpkonangat Kristuse uvinikut tikisimavoᴋ; tâmna tamainut Gûdeovoᴋ, nertortaujoᴋ issoᴋangitomut. Amen.

⁶ Taimailingilangale, Gudib oᴋausingit tukkeᴋarungnaitilugit sorlo; Israêlemit inôlertut ilûnatiungitoᴋ Israêlitiongmatta.

⁷ Ilûnatigloungitoᴋ ᴋitorngauvut, Abrahab kinguvânginut ilinganitik pivlugo; (aglaksimajoᴋarporle) kinguvângnik taijaujuksaujut Isaamit pijomârmatta.

⁸ Imaipoᴋ: uvinikut ᴋitorngaujut Gûdib ᴋitorngaringilait; angersimanikulle ᴋitorngaujut kinguvâksauvut.

⁹ Tamadjale oᴋauseᴋ angersimanilik, oᴋarmat: Achâgo ama tikitsomârivunga ilingnut naliutikpat tagva nuliat Sara erneᴋaromârpoᴋ.

¹⁰ Tamannainarle pivlugo taimaingilaᴋ; Rebekkaletauᴋ singaijaungmat atautsemit Isaamit atâtaptingnit,

¹¹ (Singaigik anerᴋartinagik, sulle ajungitulerᴋâratik idluitulerᴋâratiglônêt, Gûdib anerosungninga issumasimaningalo soᴋosijuerᴋovlugik, piniarnerit pitjutiginagit, ᴋaiᴋojijorle pitjutigilugo)

¹² Oᴋautjauvoᴋ: Anginersaᴋ kivgaksauvoᴋ mikinersamut.

¹³ Sorlo aglaksimangmat: Jako nagligilauᴋpara Esauele ômigilauᴋpara.

¹⁴ Kanoᴋ tagva oᴋartuksauvitâ? Gûde idluitôvâ? Taimaitsangilaᴋ.

¹⁵ Môsesemulle oᴋarpoᴋ: Saimauseromajakkalo saimauseromavakka, nâpkigijomajakkalo nâpkigijomavakka.

¹⁶ Taimaimat inûb pijomaningalônêt aᴋpangerningalônêt sulingilaᴋ, Gûdible nâpkiningninga kissime.

¹⁷ Aglait Faraomut imailingmatta: Tamanna pivlugo inûlivagit, pitsartunera takuksautitsomavlugo ilingnut, atteralo oᴋautigijauᴋovlugo nuname ilûnâne.

¹⁸ Issumaminik tagva nâpkigivâ naliat; issumaminiglo sittitipâ naliat.

¹⁹ Oᴋarviginajarparma: Sumik sulle pasidlarpâtigût? pijomajanga kia akkerartorungnarpaûk?

²⁰ Inuk ômât! igvit kinavêt, Gûdemut akkerartoromagavît? Sanajaᴋ sanajiminut oᴋartuksauvâ: Sôᴋ taimak sanavingâ?

²¹ Issumaminik machaliorte macharmik sanajungnangilâᴋ, illanga iluleᴋutingorlugo ânanaujuksaᴋ, illangalo nachonartuksâᴋ?

²² (Taimailiormariluganele) Gûdib, ningausine takojautitsomagamiuk, pitsartuninelo nalonairomagamiuk, ningarnartut iluleᴋutit pijarêrtitaujut asserornartomut, angijomik ᴋenuersârutigivait;

²³ Nalonairomavlugo ânanaunime angidlarninga iluleᴋutine nâpkinartune, sivorngagut âᴋiksimajamine ânanaunermut.

²⁴ Taimaitogut uvaguttauᴋ ᴋaiᴋovâtigut, Jûdinit kissiani-ungitoᴋ, nalojunittauᴋ.

²⁵ Sorlo Hosêakut oᴋarmat: Inuᴋotigilaungitakka inuᴋotimnik taijomavakka; nagligilaungigalloartaralo nagligijamnik taijomavara.

²⁶ Imaitsomârivoᴋ: Tâpkoa oᴋautjauviane: Inuᴋotigingilapse, tagvane Gûdib ômajub ᴋitornganginik taijaujomârput.

²⁷ Jesaiasele nipliavoᴋ Israêlib kinguvângit pivlugit: Inuᴋotitit, Israêle, unuktôgalloarpatta siorᴋatitut imab sidjanganêtutitut, amiakôjut tâpkonangat (kissimik) sâgiaromârput.

²⁸ Nungutaksauningat kajusimajutauvoᴋ, erᴋartuijoᴋ ᴋaglilerpoᴋ. Nâlegaᴋ, ᴋilangmiugasaksuit Nâlegangat, nungutsinermik kajusimajutigijaminik piniaromârmat nuname ilûnâne.

²⁹ Sorlotauᴋ Jesaiase sivorngagut oᴋalaungmat: Kilangmiugasaksuit Nâlegangata ikitunik amiakoᴋartingipatigut, Sodomatutinajarpogut, Gomorratullo ilinganajarpogut.

³⁰ Kanoᴋ tagva oᴋartuksauvitâ? Imâk oᴋaromavogut: Nalojut idluarsititaunasualaungitut idluarsilerput; idluarsinerle okpernermit pijoᴋ oᴋautigivara.

³¹ Israêlitille perᴋojat idluarsijutigijomalauᴋpait, idluarsijutiginagille perᴋojat.

³² Sôᴋ? Okpernermut pinasualaunginamik, perᴋojalle piniarᴋojangit pitjutigigamigit. Ujarᴋamut aporvingmut aporamik.

³³ Sorlo aglaksimangmat: Ahâk tagga ujarᴋamik tunganartovingmik ilijivunga Zioneme, ôktutiksaujomik, naliallo okpertoᴋ ᴋemâjariaᴋaromângilaᴋ.