Rômiunut 8 - Labrador Inuttitut Heritage Bible

Erniangupsârsimajut kipalôjungnairninginik ᴋitorngauninginiglo nerriungninginiglo; pingortisimajut anersaumininginik; okpertullo piloringninginik, kappianartut atortilugit aglât.

¹ Tagva mâna erᴋartoraksautsangilat Kristuse Jêsusemêtut, uvinik malingnago Anernerle maliklugo arvertartut.

² Anernerub ômartitsijub Kristuse Jêsuseme perᴋojangita kivgaujungnaitimanga ajornerub toᴋublo perᴋojanginit.

³ Perᴋojab ajortanga, uviningmut ajulertitaumangmat, tamanna Gûdib pivâ, Ernine tiligamiuk, uviningmut ajortolingmut adsioᴋovlugo, tunergutiksauᴋovlugolo ajornerit pivlugit, ajortorlo uviningmioᴋ erᴋartorpâ;

⁴ Idluarneᴋ perᴋojat saᴋᴋertitauᴋojangat nâmakserᴋovlugo uvaptingne uvinik malingnago, Anernerle maliklugo arvertartogut.

⁵ Uviningmigle nâlaktut uvingub pingit issumagivait; Anernermiglo nâlaktut Anernerub pingit issumagivait.

⁶ Uvinguble issumanga toᴋôvoᴋ, Anerneruble issumanga inôsiolarmelo ulapirsautauvoᴋ.

⁷ Uvingub issumanga Gûdemik ômisungniongmat; Gûdib perᴋojangit nâlagomanginamigit, saperpaillo.

⁸ Uviningmêtulle Gûdemut idluarijaujungnangilat.

⁹ Ilipsele uviningmêngilase, Anernermêposele, Gûdib Anerningata inigikpase. Kristusible Anerninganik peᴋangitoᴋ tâpsoma perᴋutigingilâ.

¹⁰ Kristusele ilupsingnêkpat, time toᴋungagalloarpoᴋ ajorneᴋ pitjutijilugo, Anernerle inôsiovoᴋ idluarneᴋ pitjutigilugo.

¹¹ Jêsusemigle toᴋungajunit tupaktitsijub Anerningata inigikpase, tagva tâpsoma Kristusemik toᴋungajunit tupaktitsijub ilipsetauᴋ timise toᴋojuksat ômartitsomârivait, Anerninga ilupsingnêngmat.

¹² Taimaimat ᴋatangutikka, akkiliksaᴋarpogut uviningmuolungitoᴋ, uvinik maliklugo inôjuksauluta.

¹³ Uvinik maliklugo inôniarupse, toᴋojomârpose; Anernermulle uvingub pingit toᴋoniarupsigik, inôjomârpose.

¹⁴ Ilûnaita Gûdib Anerningata tassiortangit Gûdib ᴋitorngaringmagit.

¹⁵ Kivgaujotut anerneᴋartitaunginapse, ama sivôrariaᴋarluse, ᴋitorngaujotulle Anernermik tunitsiviovose, tapsomûna nipliavogut: Abba, Atâtak!

¹⁶ Anernerub tâpsoma anernivut ᴋaujitipait, ᴋitorngaugapta Gûdemut.

¹⁷ Kitorngaugaptale, kingormgujijuksaugivoguttauᴋ, imaipoᴋ, Gûdemit kingormgujiluta, Kristuselo kingormgujeᴋatigilugo; kappianarnernik peᴋaᴋatigiguptigo, ânanauseᴋattaujomârᴋovlutatauᴋ.

¹⁸ Issumavikkama, naliutub tamattoma kappianarningit adsigêktitaksaungimatta ânanaunersoarmut saᴋᴋijârtitaujomârtomut uvaptingne.

¹⁹ Pingortisimajulle Gûdib ᴋitorngangita nalonairtitauniksangat ilungertordlutik ᴋilanârivlugo utaᴋivât.

²⁰ Pingortisimajut kipalôtitaugamik nunguniartomut; issumamingnut pinatik, taimaitingmagille taimaititsijub, nerriugijaksaᴋartidlugit.

²¹ Pingortisimajuttauᴋ piulijaujomârmatta kipalônermit nunguniartomut, illangiutivlutiglo Gûdib ᴋitorngangita kivgaungininganik ânanâmik.

²² Pingortisimajut tamaita ᴋaujimavavut, anersaumeᴋatigivluta kappiasutsainarmatta mâna sulle.

²³ Kissimigle tâpkoa pingilat, nangminerletauᴋ uvagut, Anernerub (tunergutingita) sivorlinginik pijogut, uvaguttauᴋ nangmineᴋ iluptigut anersaumivluta ᴋilanârivogut ᴋitorngaunermik, timiptalo piulijauninganik utaᴋivluta.

²⁴ Piulijaumagalloarapta, nerriungnermulle. Nerriugijarle takovlugo tamanna nerriungniungilaᴋ; ᴋanoᴋ inûb takojane nerriugijungnarpaûk?

²⁵ Tautungitavulle nerriugiguptigo, ᴋenuersârnermut tagva utaᴋivavut.

²⁶ Taimaktauᴋ sangêniptingne Anernerub ikajorpâtigut. Tuksiarnermik ᴋanoᴋ nâmaktomik nalogapta; Anerneruble nangmineᴋ akkisartorpâtigut anersaumijunut oᴋautaujungnangitunut.

²⁷ Omatinigle kiglisiniartub (Gûdib) ᴋaujimavâ Anernerub issumanga; tâpsoma ivjornaitut akkisartormagit Gûdib idluarijanganut.

²⁸ Kaujimavogulle Gûdemik nagligosuktut ᴋanoelinganerit tamaita idluarᴋutigingmagit, (Gûdib) issumasimaninganut ᴋaiᴋojaumajut.

²⁹ Sivorngagut illitarijane sivorngagut perᴋungmagittauᴋ, Ernerme adsiluanganik adseᴋarᴋovlugit, tâmna erniangoᴋârtôᴋovlugo ᴋatangutigêt unuktut akorngane.

³⁰ Sivorngagulle taimaiᴋojane ᴋaiᴋolaurivaittauᴋ; ᴋaiᴋojanelo idluarsitilaurivaittauᴋ; idluarsititanelo ânanausitilaurivaittauᴋ.

³¹ Taimaimatta tamakkoa, ᴋanoᴋ tagva oᴋartuksauvitâ? Gûdib illagikpatigut, kia akkerartorungnarpâtigût?

³² Tâpsoma Ernine aglât ivlerinago tamaptale pivluta tunidlalauramiuk, tâmna illagilugo tamainik tunitsiviginajangilâtigût?

³³ Gûdib anerijangit kia pasijungnarpagît? Gûde tagga idluarsititsijoᴋ.

³⁴ Kina erᴋartuijungnarᴋâ? Kristuse tagga toᴋolauᴋtoᴋ, ila piluartomik tupaktitaungmijoᴋ, tâpsoma Gûdib talerpiata tungânêdlune tuksiupâtigut.

³⁵ Kia avitsungnarpâtigût Kristusib naglingninganît? kiksarnerublônêt, kappianarnerublônêt unangmiklernerublônêt, kângnerublônêt, annorâᴋanginerublônêt, nangianarnerublônêt, saviksublônêt?

³⁶ Sorlo aglaksimangmat: Pivlutit toᴋotitaumavogut uvloᴋ nâvlugo, sauᴋatitut toᴋotaksatitut pênartauvogut.

³⁷ Tamakkoale tamaita atorlugit ajugauluarpogut uvaptingnik nagligosuktokut.

³⁸ Kaujimavikama, toᴋublônêt, inôtsiblônêt, Engeliblônêt, nâlegaunîllônêt, pitsartunerillônêt, naliusimajullônêt, naliutsomârtullônêt,

³⁹ Kingingnerublônêt, itinerublônêt, assingitalônêt pingortisimajut avititsunangimatigut Gûdib naglingninganit, Kristuse Jêsuseme Nâlegaptingnêtomit.