Rômiunut 7 - Labrador Inuttitut Heritage Bible

Okpertut pijaujungnairninganik perᴋojanut. Inuktâb inutoᴋablo sorsutiningangnik perᴋojat atortilugit.

¹ Katangutikka (perᴋojanik ᴋaujimajut oᴋautivakka), ᴋaujimangilasê, perᴋojat ataniongmatta inungmut, inôtilugô?

² Arnaᴋ uilik uiminut ᴋelaksugaungmat inôtilugo, perᴋojat nâlaklugit; uingale toᴋokpat, ᴋelaksugaujungnairpoᴋ perᴋojamut uinga pivlugo.

³ Taimaimat, uine inôtilugo uime assianut pigune, nuliarêngnermik asseroijomik taijaulerpoᴋ; uingale toᴋokpat, ᴋelaksimajungnairpoᴋ perᴋojamut, nuliarêngnermiglo asseroijônane, uigilauᴋtame assia pigileruniuk.

⁴ Taimaktauᴋ, ᴋatangutikka, perᴋojanit toᴋosimavose Kristusib timinganut, perᴋutaulerᴋovluse assianut toᴋungajunit tupaktitaujomut, Gûdeme ajungituliniarᴋovluta.

⁵ Uviningmêtiluta ikligunerit idluitulerᴋojijut, perᴋojanut ômariktitaujut, sôngolauᴋput avatiptingne, toᴋo piksaᴋartilugo.

⁶ Mânale perᴋojanit ᴋelarudjârsimavogut, toᴋungavlutalo taipkonangat ᴋelaksûtigilauᴋtaptingnit, imâk, kivgartorᴋovluta, nutâmik ilinganeᴋartitauvluta Anernermut, ilinganetoᴋaᴋaratale aglatuinait maliklugit.

⁷ Kanoᴋ tagva oᴋartuksauvitâ? Perᴋojat idluitulijutauvât? Taimaitsangilaᴋ! Ajornerle illitarilaungilara, perᴋojanut kissiani; ikliguneᴋ nalolaurapko, perᴋojat oᴋangipatta: Ikliguktuksaungilatit.

⁸ Ajornerub tagva perᴋojat pitjutigilerpait ilumne kajungersailune sunatuinarnik ikligunernik. Perᴋojaᴋangitune ajorneᴋ toᴋungangmat.

⁹ Perᴋojaᴋarnanga inôtsima illangane inôlaurama. Perᴋojarle tikingmat, ajorneᴋ ômarivoᴋ.

¹⁰ Uvangale toᴋolerpunga; perᴋojarlo inôjutiksaugalloaᴋ sunaubva toᴋojutigilerpara;

¹¹ Ajornerub perᴋojaᴋ kajungersautigivlugo uivêringmanga toᴋotilungalo tamattomunga perᴋojamut.

¹² Perᴋojat ivjornaigalloarput, perᴋojarlo ivjornailunelo idluarlarmelo ajungilaᴋ.

¹³ Ajungitoᴋ tagva uvamnut toᴋonartôvâ? Taimaitsangilaᴋ! Ajornerle saᴋᴋerᴋovlugo ajortoᴋsôningane, uvamnut toᴋonartôlerpoᴋ ajungitoᴋ atorlugo; ajorneᴋ ajortovaksônerôlerᴋovlugo perᴋojamut.

¹⁴ Perᴋojat ᴋaujimagaptigik anerniliongmatta. Uvangale uviniliovunga, ajornerub kivgarivânga.

¹⁵ Suliakka illitaringilakka; piniaromajara pinianginapko; ômigijarale pisârpara.

¹⁶ Piniaromangitarale pisârupko, perᴋojat tagva ajungininganik angerpunga.

¹⁷ Tagva uvanga taimailiungilanga, ajornerle ilumnêtoᴋ (taimailiorpoᴋ).

¹⁸ Kaujimagama ilumne, tamadja uvinimne ajungitoᴋangitomik. Pijomaneᴋ uvamnêgalloarpoᴋ, nâmaksilugole ajungineᴋ, tamanna nagvângilara.

¹⁹ Ajungitoᴋ pijomagalloartara pinginapko, ajortorle pijomangigalloartara piniarpara.

²⁰ Pijomangitarale pigapko, tagva uvanga taimailiungitunga, ajornerle ilumnêtoᴋ.

²¹ Ajungitulijomagalloartunga perᴋojaᴋ nagvârpara uvamne, ajornerub atavigênarmanga.

²² Gûdib perᴋojangit ᴋuviagivakka ilumiutapkut;

²³ Assianigle perᴋojamik avatimnêtomik tukkisivunga, issumama perᴋojanganut akkerartortomik; tâpsoma kivgautipânga ajornerub perᴋojanganut, avatimnêtomut.

²⁴ Uvanga inukullôjunga, kia piuliniarpânga timemit, toᴋub tamattoma pinganît?

²⁵ Gûde ᴋujagivara Jêsuse Kristusikut Nâlegaptigut. Tagva uvanga tâmnatsainaᴋ issumapkut kivgartûtigivakka Gûdib perᴋojangit, uvinipkulle ajornerub perᴋojangit.