Rômiunut 6 - Labrador Inuttitut Heritage Bible

Inub ivjornailininganik, inôsertâmiglo idluarsititaunermit pijomik.

¹ Kanok tagva oᴋauseᴋartuksauvitâ? idluitulitsainartuksauvitâ saimaneᴋ anginersauᴋovlugô?

² Taimainiarata! Uvagut ajortomit toᴋomajogut, ᴋanoᴋ tamanna inôvigijomanajarpitigô?

³ Kaujimangilasê, ilûnata Jêsuse Kristusemut baptisimajogut, toᴋunganut baptitaugaptâ?

⁴ Taimaimat ilijartortauᴋatigimavavut baptijutikut toᴋomut, sorlo Kristuse toᴋungajunit tupaktitaungmat Atâtab ânanaunersoanganut, taimaktauᴋ uvagut inôsertâme arvertartuksauvogut.

⁵ Ilijaumaᴋatauguptale toᴋunga adsigilugo, makinerme adsigijomârivavuttauᴋ;

⁶ Kaujimavluta, tâpsoma inutoᴋavut kikiaktortauᴋatigingmago saningajolingmut, time, ajornerub pinga, atorungnairᴋovlugo, ajortomik kivgartorᴋonata kingorngane.

⁷ Nalialle toᴋomajoᴋ, tâmna ᴋelarudjârtauvoᴋ ajortomit.

⁸ Kristusele toᴋoᴋatigiguptigo, tagva okperpogut, tâmna inôᴋatigijomâraptigotauᴋ.

⁹ Kaujimavogullo, Kristuse toᴋungajunit tupaktitaujoᴋ kingorngane toᴋosuermat; toᴋo ataniotijungnairpoᴋ tâpsomunga kingorngane.

¹⁰ Toᴋogamele, atausiardlune toᴋovoᴋ ajorneᴋ pitjutigilugo; inôgamelo, Gûdemut inôvoᴋ.

¹¹ Taimaktauᴋ ilipse, issumavileritse ilipsingnik, ajornermit toᴋunganasugiluse, inôluselo Gûdemut Kristuse Jêsusikut Nâlegaptigut.

¹² Taimaimat ajorneᴋ atanerinasiuk timipsigut toᴋojuksatigut, ikliguninga nâlatsanago!

¹³ Avatisetauᴋ pitiniarasigik ajortomut, sakkugitaililugit idluitomut; Gûdemulle ilipsingnik tunititse, toᴋungajunit ômartutitut; avatiselo Gûdemut tunisigik sakkuᴋovlugit idluartomut.

¹⁴ Ajorneᴋ ataniotijungnangimat ilipsingnut; perᴋojat kivgaringimase, saimaneruble pingmase.

¹⁵ Kanôᴋ tagvâ? Idluitulijuksauvitâ, perᴋojat kivgaringimatigut, saimaneruble pingmattigût? Taimainiarata!

¹⁶ Kaujimangilasê, nalianut kivgaulerluse tunigupse ilipsingnik nâlaklugo, nâlaktapse kivgarilermase; ajornerublônêt toᴋotsiniartub, nâlangnerublônêt idluarsaijûb?

¹⁷ Gûde ᴋujagijaule, ajornerub kivgarilaungmâse; mânale oᴋautsit ajoᴋertûtsinik maligaksapsingnik ômamut nâlekapsigik;

¹⁸ Mânale ajornermit ᴋelarudjârtaumagapse idluarnerub kivgaliarimavâse.

¹⁹ Inuktut tamattominga oᴋariaᴋarpunga, uvinipse sangêninga pivlugo. Sorlo avatise tunilaurapsigik kivgartortigivlugit maᴋojungnartomut, idluitomik ᴋalerêktitsivluse idluitomut; taimaktauᴋ mâna avatise tunisigik kivgartortigivlugit idluartomut, ivjornaiᴋovlugit.

²⁰ Ajortomulle kivgautiluse, idluarneᴋ atanerilaungilase.

²¹ Taipsomane taipkonangat ᴋanoêtunik piksarsivisê? Mâna kangusutigijapsingnik; toᴋomik taipkoa naggateᴋarmatta.

²² Mânale ajornermit ᴋelarudjârtaumagapse, Gûdemullo kivgaumalerdluse, piksarsivose ivjornaijutiksapsingnik; naggatânelo inôtsemik nâksaungitomik.

²³ Ajornerub akkiliutâ, tagva toᴋo; Gûdible tunergutâ saimanartoᴋ, tagva inôseᴋ nâksaungitoᴋ Kristuseme Jêsuseme Nalegaptingne.