Rômiunut 5 - Labrador Inuttitut Heritage Bible

Okpernikut idluarsititaumajut ilinganingat piloringnartoᴋ. Adamelo Kristuselo.

¹ Tagva okpernermut idluarsititaugapta, Gûdemut ulapirsauteᴋarpogut Nâlegaptigut Jêsuse Kristusikut.

² Tâpsomûnalo okpernermut apᴋotiksarsigapta saimanermut (nâpkigijaunermut) tamattomunga pigijaptingnut, nertôtivoguttauᴋ nerriungneᴋarnermik pinnarnartoᴋsoarmik, Gûdib tunijomârtanganik (okpertunut.)

³ Taimaituinangilarle, kapianarnerille aglât nertôtigivavut; ᴋaujimagapta kapianarnerit ᴋenuersârtitsingmatta;

⁴ Kenuersârnerle ôksimanermik ᴋaitsivoᴋ, ôksimanerle nerriungnermik ᴋaitsivoᴋ;

⁵ Nerriungnerle kangusuktitsiniangilaᴋ. Gûdib naglingninga kovimangmat ômatiptingnut, Anernermut ajunginermut tunergusiarijaptingnut.

⁶ Ajulidlalaurapta taipsomane, Kristusib naliutitsiartome toᴋotigivâtigut ajortoliksôtiluta.

⁷ Idluartorle pivlugo toᴋojomajoᴋarajangilaᴋ; ajungitulivigijine pivlugo toᴋojomajoᴋarajaralloarune.

⁸ Taimaimat Gûdib naglingnine uvaptingnik nalonaijarpâ, Kristuse pivluta toᴋolaungmat, sulle ajortoᴋsôtiluta.

⁹ Mâna tâpsoma aunganut idluarsititaumagapta, anginersamik tagva piulijigijomârpavut ningautsemit.

¹⁰ Gûdemut ulapirsarsimagapta Erningata toᴋunganut, sulle ômisuktiluta, anginersamik tagva piulijaujomârpogut inôsinganut, mâna ulapirsartaugapta.

¹¹ Tamannale kissimeungitoᴋ, nertôtivogulletauᴋ Gûdeme, Nâlegaptigut Jêsuse Kristusikut, tâpsomûna mâna ulapirsaumik tunitsiviogapta.

¹² Taimaimat sorlo ajorneᴋ silaᴋsoarmut tikingmat inungmut atautsemut, toᴋolo ajornermut, taimaglo toᴋo inungnut tamainut kiblemangmat, ilûnatik idluitulilaungmatta.

¹³ (Ajorneᴋ silaᴋsoarmêgalloarpoᴋ perᴋojaᴋarᴋârtinago; perᴋojaᴋangitunele ajorneᴋ issumagijaungilaᴋ.

¹⁴ Toᴋole Adamemit Môsese tikidlugo ataniotivoᴋ taipkonungatauᴋ idluitulilaungitunut Adamib idluituliningatut; tâmna (Adame) tagva tikituksab (Kristusib) adsingoanga.

¹⁵ Idluitulinerle tunergullo saimanartoᴋ adsigêngilâk. Unuktut toᴋungmatta atautsib idluitulininganut, anginersamik unuktut Gûdib saimarsautâniglo tunergutâniglo pititaumaluarput, inûb atautsib Jêsusib Kristusib saimarsautânut.

¹⁶ Sorlo idluitulinerub atautsib maliktingatut tunergut ilingangilaᴋ, atautsib idluitulijub idluitulininganut atautsemut ilûnaita asserortitaungmatta: Pidlaraksangortitauneᴋ idluitulinermit atautsemit pingmat; tunergulle saimanartoᴋ ajornernit unuktunit piuliklerpoᴋ idluarsititaunermut.

¹⁷ Atautsib idluitulininganut toᴋo ataniotilaungmat atauseᴋ pivlugo; tunergumik saimanartoᴋsoarmik illangiutijut idluarsititauvlutik anginersavaksôjomik ataniotiniarput inôniarlutik atausiojokut Jêsuse Kristusikut)

¹⁸ Taimaimat, sorlo atautsib idluitulininganut sutainartoᴋ inungnut tamainut pingmat, taimaktauᴋ atautsib idluarninganut inuit ilûnaita idluarsititaulerput inôniarlutik.

¹⁹ Sorlo inûb atautsib nâlangininganut unuktut ajorneᴋartitaulermatta, taimaktauᴋ atautsib nâlangninganut unuktut idluarsititaulerput.

²⁰ Perᴋojalle illautitaulerput, idluitulinerub angininga nalonaititauluarᴋovlugo. Ajorneruble anginingata nalonaititauviane saimanerub anginersauninga nalonaititaumaluarpoᴋ;

²¹ Sorlo ajorneᴋ ataniotilaungmat toᴋokut, taimaktauᴋ saimaneᴋ atanioterᴋovlugo idluarsititsinikut inôtsemut nâksaungitomut (pititsivlune), Jêsuse Kristusikut Nâlegaptigut.