Rômiunut 3 - Labrador Inuttitut Heritage Bible

Inuk okpernikut kissiani idluarsititauvoᴋ.

¹ Sumik tagva Jûdit peᴋarnersauvât? kipimanerlo sumik sulivâ?

² Mikijôngitomik pivut. Sivorlermik, Gûdib oᴋausinginik tunitjiviovut.

³ Illangille tamakkonunga okpingimatta, tamanna erᴋanarᴋâ? taipkoa okpinginingita Gûdib mikseᴋârninga okpernarungnaitinajarpatsûk?

⁴ Taimainiatsangilaᴋ! imaivikporle, Gûde mikseᴋârtôvoᴋ, inuillo ilûnatik saglotovut; aglait imaingmatta: Oᴋauserne idluarᴋovlutit, ajugauᴋovlutillo, erᴋartortauguvit.

⁵ Idluiniptale Gûdib idluarninga nertornartikpatsuk, sumik oᴋartuksauvitâ? Gûde idluitônajarᴋâ, ningarnermut pidlaramitigût? (inuktut taimak oᴋarpunga.)

⁶ Taimaitsangilaᴋ! Taimaipat, ᴋanoᴋ ilivlune Gûdib silaᴋsûb inungit erᴋartorajarᴋagît?

⁷ Gûdib mikseᴋârninga saglonimnut ânanausiluarpat nertortautitauluarlunelo, sôᴋ idluitulijotut erᴋartortaujariaᴋarᴋêk sullê?

⁸ Sôᴋ imailiungârajangilagût, sorlo mitautigijaugapta, sorlolo illangita oᴋautigingmatigut oᴋarnerarluta: Idluituliniarta, ajungitoᴋ tamattomangat perᴋovlugo? Taimaitut erᴋartortauningat idluarpoᴋ.

⁹ Kanoᴋ tagvâ? taipkonangat ajunginersauvitâ? Mikijomiglônêt pitsangilagut. Kigligiudseᴋammerapta Jûdillo Grîᴋillo ajortoliksôninginik.

¹⁰ Aglaittauᴋ imaimatta: Idluartomik inuᴋangilaᴋ atautsemiglônêt;

¹¹ Silatujoᴋaranelo, Gûdemik aperᴋuteᴋartoᴋangilaᴋ.

¹² Ilûnatik kiglormut sâsimavut, ilûnamatsiatiglo piojungnairput; ajungitulijoᴋangilaᴋ atautsemiglônêt;

¹³ Torᴋlungit iluveᴋtut angmarsimajotun-iput, oᴋarmingnullo takkormôrput, oᴋatik ipiksitilugit, ᴋuglugiangojârtutitut toᴋonartoksoarmik ᴋangasinâmiuteᴋarput.

¹⁴ Kaningit tattaput oᴋautsilungnernik ᴋassilinartuniglo;

¹⁵ Itigangit sukalidlarput aungmik kovisijomavlutik.

¹⁶ Apᴋotingine asserornartoᴋarpoᴋ kiksanartoᴋarlarmelo.

¹⁷ Apᴋomiglo ulapirsartauvionartomik ᴋaujimangilat.

¹⁸ Nâlangnermik Gûdemik kamangilat.

¹⁹ Kaujimavogulle, perᴋojat oᴋausingit taipkonunga perᴋojalingnut pingmatta; ᴋanit ilûnatik simiktauᴋovlugit, silaᴋsûblo inungit ilûnatik pasijaksauᴋovlugit Gûdib sângane.

²⁰ Taimaimat, uvinik (inuk) idluartitaujungnangilaᴋ tâpsoma sângane perᴋojat piniarᴋojanginut; perᴋojanut ajornerit illitarijaulermatta.

²¹ Mânale idluarsineᴋ Gûdib sângane nâmagijaujoᴋ perᴋojat pinagit nalojaujungnairpok, perᴋojanut nalautaijunullo kigligiutauumajoᴋ;

²² Idluarsinerle Gûdeme atortoᴋ, okpernermit Jêsuse Kristusemut pijoᴋ oᴋautigivara, tamainut piksaᴋ, ilûnatiglo okpertut pigijaksangat.

²³ Adsigêngitoᴋangimat; ilûnatik idluitulilaungmatta, Gûdemullo nertortaujuksaunitik ajulerdlugo;

²⁴ Akkeᴋangitomiglo idluarsititaulerput tâpsoma saimarsautânut, piuliklernermut, Kristusib Jêsusib pijanganut;

²⁵ Tâmna Gûdib saᴋᴋertilauᴋpâ saimauservioᴋovlugo okpernermut tâpsoma aunganut, idluarneᴋ sâmine nâmagijaujoᴋ nalonairomavlugo, issumagijungnairamigit ajornerit sivorngagut pilauktut, Gûde ᴋenuêsertortilugo;

²⁶ Naliutune tamakkonane idluarneᴋ sâmine nâmagijaujoᴋ nalonairomavlugo; saᴋᴋerᴋovlugik Gûdib nangmineᴋ idluartôninga idluarsititsiningalo Jêsusemut okpertomik.

²⁷ Nauk tagva nertornautiksâᴋ? Pêrsimavoᴋ. Perᴋojat nalianût? perᴋojanut piniarᴋojijunût? Aukak, perᴋojamulle okperᴋojijomut.

²⁸ Taimaimat issumavikpogut, inuk idluarsititaulermat perᴋojat piniarᴋojanginu-ungitoᴋ, okpernermut kissianut.

²⁹ Ubvalo Jûdit kissimik Gûde Gûdigivatsûk? nalojuttauk Gûdiginginivatsûk? Aukak, nalojuttauᴋ Gûdigivât.

³⁰ Gûde atauseongmat, kipimajunik idluarsititsijoᴋ okpernermut, kipimangituniktauᴋ (idluarsititsingmijoᴋ) okpernermut.

³¹ Perᴋojat tagva atorungnairᴋovitigîk, okperᴋojigaptâ? Taimaitsangilaᴋ! perᴋojalle aulaijauᴋonagit pivogut.