Rômiunut 2 - Labrador Inuttitut Heritage Bible

Nalojutitut Judittauᴋ idluarneᴋanginivut, Môsesib perᴋojangit kipimanerlo nertôtigigalloaramigit.

¹ Taimaimat, inuk ômât! pasijaungijutiksaᴋangilatit, kinaungmangârpillônêt erᴋartujiotit; assingnik erᴋartuinernut, nangminernik erᴋartorpotit, erᴋartuijutigijarnik taimaluatsiaᴋ igvittauᴋ piniaravit.

² Gûdible erᴋartuininga taimailiortunik idluarmat ᴋaujimavogut.

³ Inugle ômât! taimailiortunik erᴋartuijotit, nangmineᴋ taimailioralloarlutit, Gûdib erᴋartuininganit igvit ᴋemâjomâravit, issumavêt?

⁴ Ubvalo akluininga pitsiarnermik ᴋenuersârnermiglo kamangitsertornermiglo nachogiviûk? ᴋaujimangilatît, Gûdib pitsiarningata tassiormatit ᴋaᴋialernermût?

⁵ Igville ômativît mangaidlarninganut ᴋaᴋialeromangininganullo ᴋallerêktitsivotit nangminernut ningautsemik ningautsib uvluksanganut Gûdiblo erᴋartuiningata idluartub saᴋᴋijârvianut.

⁶ Tâpsoma ilûnaita atunit akkiniaromârpait piniarnerilauᴋtangit maliklugit.

⁷ Imâgle: ᴋenuersârlutik ajungitulinermut pinasuartut nertornartomiglo nâlangnartomiglo soᴋosijuitomiglo taipkoa inôgumik nungusuitomik tunisivigijomârpait;

⁸ Akkerartortulle mikseᴋârnermiglo nâlangitut, idluangitomigle nâlaktut, taipkoa saimaungitomiglo ningarnermiglo pijomârpait;

⁹ Kappianartomigle kiksanartomiglo pijomârput inuit idluitulijut tarningit ilûnatik, Jûdit sivorliolutik Grîᴋillotauᴋ.

¹⁰ Nertornartomigle, nâlangnartomiglo ulapirsaumiglo ajungitulijut ilûnatik peᴋarlit, Jûdit sivorliolutik Grîᴋillotauᴋ.

¹¹ Inûb tautua Gûdeme atungimat.

¹² Idluitulilauᴋtut perᴋojaᴋaratik, assiojomârputtauᴋ perᴋojaᴋaratik; idluitulilauᴋtullo perᴋojaᴋarlutik erᴋartortaujomârput perᴋojat maliklugit;

¹³ (Perᴋojanik tussatuinartut idluangimatta Gûdeme; perᴋojanigle maliktut idluarsititaujomârput.

¹⁴ Nalojut aglaksimajunik perᴋojaᴋangitut, ingergarmik perᴋojat piniarᴋojanginik pigamik, tâpkoa perᴋojaᴋangigalloardlutik ingmingnut perᴋojatitut-iput.

¹⁵ Perᴋojat piniarᴋojangit ômatingine aglaksimangmatta nalunailivut, erᴋarsautimingnik kiglisitingmatigik; issumangillo passijigêngmatta pasitiksarutigêngmattalo ingmingnik;)

¹⁶ Uvluksame taipsomane, Gûdib inuit angigutsiningit erᴋartoromârpagit Jêsuse Kristusikut, oᴋautsit tussarnertut oᴋâlatigijakka maliklugit.

¹⁷ Kamalerille, Jûdemik atteᴋarpotit, perᴋojaᴋarnermiglo tattitartorpotit Gûdelo nertorutigivat ilingnik.

¹⁸ Pijomajanganiglo ᴋaujimavotit, perᴋojanullo ajoᴋertortaugavit, kiglisiniarpotit, piniaraksat ajunginersat sunaungmangâta;

¹⁹ Ilikullo issumaᴋarpotit, tautungitunik tassiorungnarasugilutit, ᴋaumaijungnarasugilutillo tâᴋtomêtunik,

²⁰ Silaitunik ᴋaujisarteojungnarasugilutit; ᴋaujimangitunik ajoᴋertuijôjungnarasugilutit, illisimaᴋôrpotit illiniaraksanik okpernartuniglo perᴋojanêtunik.

²¹ Sunaubvale assingnik ajoᴋertuivotit, ilingniglo ajoᴋertungilatit. Oᴋâlavotit tigliktuksaunginermik, nangminerle tiglikpotit.

²² Oᴋarpotit nuliarêngnermik asseroijuksaunginermik, nangminerlo nuliarêngneᴋ asserorpat. Gûdingoanik maᴋojukpotit, Gûdiblo pinginik arᴋtaivotit.

²³ Perᴋojanik nertôtivotit, Gûdelo mitautigivat perᴋojanik nâlanginermut.

²⁴ Ilipse pivluse Gûdib attinga mitautigijaungmat nalojune, sorlo aglaksimangmat.

²⁵ Kipimaneᴋ atornartôgalloaᴋ, perᴋojat malikungne; perᴋojalle malingikungne, kipimanît kipimanginertut-ilerêrpoᴋ.

²⁶ Kipimangitub tagva perᴋojat idluarijangit piniarunigit, kipimangininga kipimanionerartaunajangilâᴋ?

²⁷ Timimigut kipimangitub perᴋojat nâmaksitigunigit, erᴋartoromârpâtit igvit, perᴋojat tapagigangne, aglangnik kipimanermiglo peᴋaralloartotit.

²⁸ Tâmna Jûdiungimat ᴋalinermigut Jûdiojoᴋ, tamannalo kipiniunginivoᴋ uvingub ᴋângagut pijoᴋ.

²⁹ Ilumigulle pijoᴋ, Jûdiovoᴋ; ômatiblo kipimaninga kipimaniovoᴋ anernikut pijoᴋ, aglatuinartigut pinane; tâpsoma nertornautâ inungnit pingilaᴋ Gûdemille.