Rômiunut 15 - Labrador Inuttitut Heritage Bible

Kenuersârᴋojaunermik issumaᴋaᴋatigêrᴋojaunermiglo. Nalojut saimartitauninginik Paulusib kivgartorninganut.

¹ Uvagulle sangijogut sangêtut ajulerningit ᴋenuêrsârutigijaksarivavut, nangminiptingniglo nâmagijuksaungilagut.

² Ilûnatale atunit ᴋuviagijaunasuarta inuᴋatiptingnut, idluarᴋutiksarsiorlugo, ajungitiniaromavlugo.

³ Kristusetauᴋ ingminik nâmagilaungimat, sorlole aglaksimangmat: Ilingnik oᴋauteᴋaluktut oᴋarnerlungningita tupvigivânga.

⁴ Sivorngagulle aglaksimajut ajoᴋertortaujutiksaptingnut aglaksimavut, aglangnut ᴋenuersârtitauvluta manigortauvlutalo nerriugijaksaᴋarᴋovluta.

⁵ Gûdible ᴋenuersârtitsijub manigoijublo tunitjivigilise issumaᴋaᴋatigêngnermik, Kristuse Jêsuse maliklugo.

⁶ Kajusimaᴋatigêkmarikluse ᴋanermut atautsemut (sorlo) nertordlerᴋovluse Gûdemik Nâlegaptingnik, Jêsusib Kristusib Atâtanganik.

⁷ Taimaimat illaliortigêgitse, sorlo Kristusib illaliulaungmase, Gûde nertortauᴋovlugo.

⁸ Oᴋarpungale: Jêsuse Kristuse kivgaulauᴋpoᴋ kipineᴋartunut, Gûdib mikseᴋârninga pivlugo angersimaneᴋ atâtanut pijoᴋ soᴋosijuerᴋovlugo.

⁹ Nalojulle Gûdemik nertordlerᴋovlugit, nâpkiningnersoanga pivlugo, sorlo aglaksimangmat: Tamanna pivlugo Nâlegaᴋ nertoromavagit nalojut akorngane, attîllo imgerutigijomavara.

¹⁰ Ama oᴋarivoᴋ: Kuviasugitse nalojose, inuᴋotingit illagivlugit.

¹¹ Amatauᴋ: Nalojose tamapse Nâlegaᴋ nertorsiuk, inuᴋatigêksuillo tamapse nakorisiuk.

¹² Amatauᴋ Jesaiase oᴋarivoᴋ: Amâᴋaromârpoᴋ Jessemit pijomik, nutaijoᴋtoᴋaromârlunelo ataniotijuksamik nalojunut; tâmna nalojut nerriugijomârpât.

¹³ Gûdible nerriuktitsijub ilumertilise tamainik ᴋuviasungnermiglo ulapirsaumiglo okpernermut, nerriugijaksaᴋarmarerᴋovluse Anernerub ajunginerub pitsartuninganut.

¹⁴ Uvangale ᴋaujimatsiaralloarpapse, ᴋatangutikka, ilipse nangmineᴋtauᴋ ajungitomik ilumertaugapse, tamainik illisimavluse, kaiblartigêgungnarluselo.

¹⁵ Taimaikalloartose ᴋatangutikka silasiorviginase aglagvigivapse erᴋaitiniardluse, saimaneᴋ Gûdemut tunitsivionera pivlugo.

¹⁶ Jêsuse Kristusemik kivgartortuksaugama nalojut akorngane, Gûdib oᴋausingit tussarnertut oᴋâlatigivlugit, nalojut tunergutauᴋovlugit ᴋuviagijaujomik Gûdemut, ivjornaititauᴋovlugillo Anernermut ajunginermut.

¹⁷ Nertornauteᴋarpunga tagva Kristuse Jêsuseme Gûdib pingit pivlugit.

¹⁸ Oᴋâlanermigle saperajarpunga, Kristuse uvapkut pinialungipat, nalojut nâlaktilugit oᴋautsinut piniarnernullo,

¹⁹ Nalunaikutanut pitsartudlartunut tatamnartunullo, Gûdib Anerningata pitsartuninganut. Taimak, Jerusalemit aularlunga, erᴋânelo ilûnâne Illîriamut tikidlunga, Kristusib oᴋausingit tussarnertut oᴋâlatigilauᴋpakka tamainut;

²⁰ Piluartomigle oᴋautsinik tussarnertunik oᴋâlajartoromavlunga Kristusib attingata ᴋaujijauvigingitangne, iglolioromananga assima tungaviliorvianut.

²¹ Imâgle, sorlo aglaksimangmat: Tâpsominga oᴋautjaulaungitut takojomârpât, tussalaungitullo tukkisijomârpât.

²² Tamannalo pitjutigivlugo unuktunik agviaruteᴋalauᴋpunga tikilaunginapse.

²³ Mânale nalipsaraksairutigama nunane makkonane, unuktunigle jârinik ᴋilanâlaurama tikitsomavluse,

²⁴ Spâniamut ainiaruma tikitsomavapse. Issumagama ingergarnimne taikunga takojomavluse, ilipsingnullo ᴋanilârtauᴋovlunga, anikitomik ᴋuviasuᴋatigiᴋârupse.

²⁵ Mânale Jerusalemut ainiarpunga, ivjornaitut kivgartorvigijomavlugit.

²⁶ Mazedôniamiut Achâjamiullo ᴋunulugatik tujôtsanik katersoilaungmatta, ivjornaitut Jerusalemêtut ikajoromavlugit.

²⁷ Taimaitomik ᴋunulugatik pinialauᴋput, taimaglo piniarvigijaksarivait; nalojut illangiutivigigamigit taipkoa tarningita pingit, tagva timib piksanginik tunitjivigijaksarigalloarpait.

²⁸ Tamanna tagva pinialaurupko, tujôtiksanik âtsivigilauᴋlugit, aijomârnimne Spaniamut apᴋosaromavapse.

²⁹ Nalungilangale, ilipsingnut piguma, pititsomârapse Kristusib oᴋausinginik tussarnertunik saimanartoᴋsoarnik.

³⁰ Kaiblarpapsele, ᴋatangutikka, Nâlegavut Jêsuse Kristuse pivlugo, Anernerublo naglingninga pivlugo, ikajoᴋatigisinga ilungertorluse tuksiarudlunga Gûdemut;

³¹ Saputijauᴋovlunga okpingitunit Jûdêamêtunit, tamakkoalo kivgartôtikka Jerusalemut, ivjornaitunut idluarijauᴋovlugit;

³² Kingorngagut, Gûdib perᴋokpanga, tikerᴋovlunga ilipsingnut ᴋuviasuklunga, nakoᴋseᴋatigiluselo.

³³ Gûdible ulapirsaijub illagilise ilûnase. Amen.