Rômiunut 14 - Labrador Inuttitut Heritage Bible

Kaiblainermik, sangêtut sinaungaksartauᴋonagit.

¹ Sangêtok okpernerme illaliorsiuk issumangit illaᴋematiniarnagit.

² Illangata erᴋanarasugingilâ, sunatuinarnik nerrigalloarune; sangêtorle perorsianik kissiani nerrivoᴋ.

³ Nerrijoᴋ nachoniarane nerringitomik, nerringitorle erᴋartuiniarane nerrijomik, Gûdib illaliulaungmago.

⁴ Kinauvêt, erᴋartuijotit assivit kivganganîk? Nangerunelônêt ochogunelônêt, nâlekaminut ilingavoᴋ. Makititaujungnaralloarivorle, Gûdib makititsungnarmago.

⁵ Illangata uvlut illangit nâmanersaunasugivait assinginit; aipangatale uvlut ilûnatik adsigêgasugivait. Ilûnatik ᴋolangitomik issumaᴋartuksauvut.

⁶ Uvlunik adsigêgasugiklingitoᴋ, Nâlekamut taimak pivoᴋ; uvluniglo adsigêgasugiklertoᴋ, taimaktauᴋ pivoᴋ Nâlekamut (Sunatuinarnik) nerrijoᴋ, Nâlekamut nerrivoᴋ; Gûde ᴋujagigamiuk. Nerringitorlo, Nâlekamut nerringilaᴋ, Gûdelo ᴋujagivâ.

⁷ Ilûnata nangmineᴋ uvaptingnik inônginapta, uvaptingniktauᴋ toᴋoniangilagut.

⁸ Inôguptale, Nâlekamut inôvogut; toᴋoguptalo, Nâlekamut toᴋovogut. Taimaimat inôguptalônêt, toᴋoguptalônêt, Nâlekab perᴋutigivâtigut.

⁹ Tamanna pivlugo Kristuse toᴋovlunelo makinivoᴋ, ama ômardlune, Nâlegaujomavlune toᴋungajunullo inôjunullo.

¹⁰ Igville, sôᴋ ᴋatangutit erᴋartorpiûk? Igvillônêt, aipâ, sôᴋ ᴋatangutit nachogiviûk? Ilûnata saᴋᴋertitaujomârpogut Kristusib erᴋartuiviata sângane.

¹¹ Aglaksimangmat: Sorlo nalâgut inôgama, Nâlegaᴋ oᴋarpoᴋ, sêrᴋut ilûnatik sêrᴋortorvigijaksarivânga, oᴋallo ilûnatik angervigijaksarivânga.

¹² Ilûnata tagva kigligiksariaᴋaromârpogut Gûdemut nangmineᴋ uvagut pivluta

¹³ Taimaimat erᴋartôtiniarata; piluardlusele mattominga inerterititse, naliat ᴋatangutiminut apôtiksamik sinaungajutiksamiglônêt sanaᴋonago.

¹⁴ Nalungilanga ᴋaujimavilarmalo Nâlekame Jêsuseme, tamaita ingergarmik maᴋojungnangimatta; kissianut maᴋojungnarasugiklertomut maᴋojungnarput.

¹⁵ Katangutivîlle nerᴋigijatit kiksautigikpagit, tagva naglingneᴋ maliklugo iluseᴋangilatit. Nerᴋigijatille pivlugit Kristusib toᴋotigijanga asserortiniarnagotôᴋ.

¹⁶ Taimaimat kamatsiaritse, perᴋutigijase ajungitoᴋ mitautigijauᴋonago.

¹⁷ Gûdib nâlegauvingata ilinganinga nerrinionanelo imerniongilaᴋ, idluarniovorle ulapirsautaularmelo ᴋuviasungniolunelo Anernerme ajunginerme.

¹⁸ Tamattomunga Kristusemik kivgartortoᴋ, Gûdemut ᴋuviagijauvoᴋ, inungnullo ivlerijauvlune.

¹⁹ Taimaimat ulapᴋoteᴋarnartomik idluarᴋutiksaujomiglo illaptingnut pinasuarta.

²⁰ Gûdib piniarninga asserorniarnago nerᴋiksaᴋ pitjutigilugo. Nerᴋiksat ilûnatik ivjornaikalloarput; ajorpulle inungmut, apôtiksaᴋartitsilune nerrijomut.

²¹ Ajunginersauvoᴋ, nerᴋetungikuvit, vainemiglo imingikuvit, assianiglônêt pingikuvit ᴋatangutivît aporvigijanganik, sinaungajutiksanganiglônet ajulerutiksanganiglônêt.

²² Okperneᴋaruvit, ilingne nangmineᴋ taimaitsiarit Gûdib sângane. Pilorikpoᴋ inuk ingminut pasijaungitoᴋ piniarnerit idluarijane pivlugit.

²³ Kolartoᴋarpalle nerrilunelo, tâmna erᴋartortaumavoᴋ, okpernermut pinginame; sunale okpernermit pingitoᴋ ajorneovoᴋ.