Rômiunut 13 - Labrador Inuttitut Heritage Bible

Atanît maligaksallo maliktauᴋojauninginik, nagliktigêngnermelo ᴋaumajomelo arvertarᴋojaunermik.

¹ Inuit ilûnatik atunit atanerijatik pitsartuneᴋarvigijitik nâlakligit; Gûdemit pingitomik ataneᴋangimat; ataneᴋartunele Gûdemut perᴋojaumavut.

² Atanernulle akkerartortub, Gûdib perᴋojanga akkerartorivâ; akkerartortulle erᴋartortautiksarsiorput nangminermingnut.

³ Pitsartujoᴋsuille sivôranangilat ajungitulijunut, idluitunulle. Atanernigle sivôrajomangikuvit, ajungitulilerit: tagva tâpkonunga nertortauniarpotit.

⁴ Gûdib kivgaringmagit idluarᴋutiksarnut; idluituliguville, sivôragit; sulinatik saviksoalijangimatta, Gûdib kivgarivait, akkiniarteoᴋovlugit idluitulijunik.

⁵ Taimaimat nâlagaksarivase, pidlartauneᴋ kissiat pitjutiginago, pasijauᴋonaseletauᴋ ômatipse issumanginut.

⁶ Tamanna pivlugotauᴋ tunergutiksanik tunitjivigijariaᴋarpase; Gûdib kivgaringmagit, taimaitunik piniaraksaᴋarmatta.

⁷ Tamainut tunijititse tunijaksapsingnik: nunaliksiutinik katersoijomut, nunaliksiutinik: akkitûtinik pijuksaujomut, akkitûtinik; sivôranartoᴋ sivôragisiuk; nâlangnartoᴋ nâlaksiuk.

⁸ Kinamullônêt akkiliksaᴋarniarase, nagliktigêngnermik kissianik, inuᴋatiminik nagliktub perᴋojat nâmaksingmagit.

⁹ Oᴋautaumajulle tâpkoa: Nuliarêngnermik asseroijuksaungilatit. Inuartuksaungilatit. Tigliktuksaungilatit. Inuᴋatitit saglotigivlugit oᴋartuksaungilatit. Ikliguktuksaungilatit; tâpkoalo assinginik perᴋojaᴋarpat, ilûnatik oᴋautsine tamakkonane tukkeliotitauvut: Inuᴋatingnik illiktut nagliktuksauvotit.

¹⁰ Naglingnerub inuᴋatine idluitulivigingilâ, taimaimat naglingneᴋ tagva perᴋojat nâmaksijaujutingat.

¹¹ Naliunermiglo tamattominga ᴋaujimagapta, tupagviksavut siningnermit mâna naliusimangmat; (piulijauviksavut mâna ᴋaninersaungmat taipsomanemit okpertôlitainalauraptingnit:

¹² Unnuaᴋ nâvoᴋ ᴋaulerdlunelo;) taimaimat tâᴋtub piniarningit iperarniarlavut, ᴋaumajuble sakkunginik atiniardluta.

¹³ Arvertarta ilusitsiarikluta uvloᴋsiortutitut, nerritunata, tallanatalo tachisimajune ilukeudlarata, aivanatalo, anerudjinatalo.

¹⁴ Nâlegarle Jêsuse Kristuse atiniarsiuk, timelo pairisiuk ikliguktailitilugole.