Rômiunut 12 - Labrador Inuttitut Heritage Bible

Kaiblaijutiksanik sunatuinarnik.

¹ Taimaimat kaiblarpapse, ᴋatangutikka, Gûdib nâpkiningninga pivlugo, timise tunisigik tunergutiksatut ômajotut, ivjornaitotut Gûdemullo ᴋuviagijaujotut; taimailiorupse, Gûde tukkeᴋartomik kivgartutsiarpase (anernerme.)

² Silaᴋsûblo tamattoma inungit adsiginiarasigik, ablatsauleritsele issumapsigut nutângordluse; nautsertorᴋovluse, sunaungmangât Gûdib pijomajanga ajungitoᴋ ᴋuviagijaujorlo nâmamariktorlo.

³ Saimanermulle tunergusiamnut oᴋaupapse ilûnase atunit, piojorijoᴋarᴋonago nangminerminik; nâmatuinartomigle issumaᴋaritse ilipsingnik, ilûnase ingmikôrluse, okpernipsingnut tunitjivionipsingnut Gûdemit.

⁴ Sorlo timivut unuktunik avateᴋarmatta, avatille ilûnatik adsigêngitomik piniaraksaᴋarmatta,

⁵ Taimaktauᴋ uvagut unuktôjogut Kristuseme timiovogut atautsemik, avateoᴋatigêkluta;

⁶ Saimanermullo tunergusiaptingnut sunatuinarnik tunergusiaᴋarpogut:

⁷ Naliat nalautaijungnarune, okperneᴋ maliklugo (nalautaile). Naliat kivgartorteogune, kivgartutsiarle. Naliat ajoᴋertuigune, ajoᴋertûseᴋ atutsiarliuk.

⁸ Naliat kaiblartuigune, kaiblartuitsiarle. Tunijijoᴋ, issumalingasuerlune pile. Ataniotijoᴋ kuksasuklune pile. Nâpkiniktoᴋ ᴋuviasuklune pile.

⁹ Naglingneᴋ takkormôrtailile. Ajorneᴋ ômigisiuk, ajunginerle ungagisiuk.

¹⁰ Ilungertordluse ᴋatangutigêktutitut nagliktigêngniaritse. Opigijigêleritse sivorliortigêkluse.

¹¹ Erᴋeasugase piniaraksapsingnut. Anernerme ilungertutsiaritse. Nâlegaᴋ kivgartutsiarsiuk.

¹² Nerriukluse ᴋuviasugitse; ᴋenuersâritse kappiasuktitaujarangapse. Sorairase tuksiaritse.

¹³ Ivsornaitut ajoᴋsarninginut angajoᴋauniaritse; siniktarviojomatitse.

¹⁴ Unangmijise saimarniarsigik; saimarsaititse oᴋauserlugaselo.

¹⁵ Kuviasuktut ᴋuviasuᴋatigisigik, ᴋugviortullo ᴋugvioᴋatigilugit.

¹⁶ Ilipsingnut adsigêktunik issumaᴋaᴋatigêgitse. Pinasuarniarase pingijainartunik, piojorijuitulle malingniarsigik.

¹⁷ Nangminipsingnik silatonasuginase. Innorluktoᴋ akkiniarasiuk innorlungnermut. Ajungineᴋ pinasuatsiarsiuk inuit ilûnatik takoane.

¹⁸ Ajornangipat, inungnut tamainut ulapirsauteᴋaritse ajugaringitapsingnut.

¹⁹ Nangmineᴋ akkiniarniarase, nagliktakka, ningarosungnerle toᴋosiuk, aglaksimangmat. Kiglungneᴋ (akkiniarneᴋ) uvanga pigijara, uvanga akkiniaromavunga, Nâlegaᴋ oᴋarpoᴋ.

²⁰ Taimaimat ningarijit kâkpat, nerrititsuk; imerukpallo imikiuk. Taimailioruvit niakoanut aumanik ikomalingnik katersoilârpotit.

²¹ Ajortomut sâlagijauniarnak; ajunginermulle sâlaginiaruk ajorneᴋ.