Rômiunut 1 - Labrador Inuttitut Heritage Bible

Oᴋautsit tussarnertut Kristusemik pitsartuneᴋarput inuit ilûnaita piloriktitsungnarlugit. Gûdib sângane pasijaksaungitoᴋangilaᴋ. Nalojut idluarneᴋanginingat oᴋautauᴋârpoᴋ.

¹ Pauluse Jêsusib Kristusib kivganga, perᴋojaumajoᴋ Apostelioᴋovlugo, anerimajoᴋ oᴋâlaᴋovlugo oᴋautsinik tussarnertunik,

² Tamakkoa (Gûdib) nalautaijoᴋotimigut sivorngagut angerutigilaungmagit aglangne hailigine,

³ Ernine pivlugo, (Davidib kinguvânginit erniangojoᴋ uvinikut,

⁴ Pitsartunermulle nalonairsimajoᴋ Gûdib ernerijanga, Anernikut ivjornaititsijokut, makininganit toᴋungajunit,) tagva Jêsuse Kristuse Nâlegavut;

⁵ Tâpsomunga saimartauvluta Apostelingortitauvogut nalojune ilûnaine, okpernikut nâlaktungortitauᴋovlugit tâpsoma attinganut;

⁶ Tâpkoa iilipsetauᴋ illagivâse, Jêsuse Kristusemut ᴋaiᴋojaumajose.

⁷ Rômamêtunut tamainut, Gûdib nagligijanginut ivjornaitunullo ᴋaiᴋojaumajunut: Gûdib Atâtapta Nâlekablo Jêsusib Kristusib saimarsautingata ulapirsautingatalo illagilisetôᴋ!

⁸ Sivorlermik Jêsuse Kristusikut Gûdimnut ᴋujalijutigivapse tamapse, okpernise oᴋautigijaungmat silaᴋsoarme ilûnâne.

⁹ Gûdib (kivgartortama anernipkut, Erningata oᴋausinginik tussarnertunik oᴋâlavlunga,) ᴋaujimavânga, sorairnanga erᴋaumagapse,

¹⁰ Tuksiarnimnelo ᴋenutsainarlunga, tikiluse ᴋanga pitjuteᴋarniarmangârma, Gûdib pijomajanganut.

¹¹ Kipiniarama takojomavluse, tunergumik anernelingmik aitortoromavluse, nakoᴋsititaulerᴋovluse;

¹² Imaipoᴋ: illagiluse manigortauᴋatigigumavluse okpernipsingnut okpernimnullo, okpeᴋatigêgapta.

¹³ Naloᴋojomangilapsele ᴋatangutikka, kajusimaᴋattarlunga tikitsomalaurapse issumapkut, ajungitomik pititsijomavlunga ilipsingnetauᴋ, sorlo nalojune assipsingne; agviartauᴋattarlungale mâna tikidlugo.

¹⁴ Grîᴋinullo Grîᴋiungitunullo, illisimajunullo illisimangitunullo kivgartortuksauvunga.

¹⁵ Taimaimat ajungitamnut pijomavunga, oᴋâlajomavlunga oᴋautsinik tussarnertunik ilipsingnuttauᴋ Rômamêtose.

¹⁶ Oᴋautsit tussarnertut Kristusemik kangusûtiginginapkit; pitsartuniongmatta Gûdemit piloriktilugit ilûnaita okpertut tâpkununga, Jûdit sivorliovlutik Grîᴋillotauᴋ.

¹⁷ Tamakutigûna nalonarungnaititaungmat idluarsititauneᴋ, nâmagijaujoᴋ Gûdib sângane, tamanna okpernermit okpernermut pijoᴋ, sorlo aglaksimangmat: Idluartub okpernine inôtiginiarpâ.

¹⁸ Gûdib ningausia ᴋilangmit saᴋᴋermat inuit ajortulininginut idluitulininginullo tamainut, mikseᴋârnermik noᴋᴋangatitsênartut idluitulidlarnermut.

¹⁹ Gûdeᴋartomik nalojoᴋangilaᴋ tâpkonane; Gûdib mattominga nalojungnaitilaungmagit;

²⁰ Gûdib ilinganinga takuksaungitoᴋ, tamadja ajugaᴋangininga Gûdioningalo issoᴋangitoᴋ silaᴋsûb pingortitautainarninganit takuksaungmat, piniarnerit ullernaigijaukpatta; taimaimat pasijaungijutiksaᴋangilat.

²¹ Gûdeᴋartomik ᴋaujimagalloarlutik, nertornagolo ᴋujagilaunginamitsuk Gûdetut, issumamikut piungitoᴋsôlerput, ômatingillo silaitut tâᴋtoᴋsôlerput.

²² Silatunasugigamik, silaitoᴋsôlerput;

²³ Gûdiblo asserojuitub ânanauninga mumilauᴋpât inub asserortuksab tingmitjallo nergjutillo pâmgortullo adjinginut.

²⁴ Taimaimat Gûdib allarpait kataktilugit ômatingita ikliguninginut, maᴋojungnartunut, timitik ingmingnut kangunartilugit.

²⁵ Taipkoa Gûdib mikseᴋârninga mumilauᴋpât saglunermut, pingortitarlo nertorlugo kivgartornersarilauᴋpât Pingortitsijomit; tâmna nertortauvoᴋ issoᴋangitomut. Amen.

²⁶ Taimaimat Gûdib allarpait kataktilugit ikligunernut; arnangit atornitik kiglormut atornerluklugo pingmatta.

²⁷ Taimaktauᴋ angutit arnaᴋ atorungnairlugo, ingmingnut êgiangusadlarlutik, angut angumut kangunartulilauᴋput tamadlarnitik pivlugit akkilertaudlarlutik ingmingne, taimaitaujariaᴋarmatta.

²⁸ Sorlo Gûde illitarivlugo pijariaᴋarasugilaungimatta, Gûdibtauᴋ allarivait kataktidlugit erᴋarsautiâlungnut, mamainartulerᴋovlugit;

²⁹ Idluitunik tamainik tattadlutik, ikligudlarnermiglo, uivêdlarnermiglo, pijomatudlarnermiglo, ningarnermiglo, ômisungnermiglo tattadlutik inuarosungnermiglo, annâtôtisungunermiglo, terliaᴋatainermiglo, kigguitojoᴋsôlarmiglo;

³⁰ Pasikliluînartoᴋsôlarmiglo, Gûdemik nachojoᴋsôlarmiglo nalangaitoᴋsôlarmiglo, piojorijoᴋsôlarmiglo, piblingaitoᴋsôlarmiglo, asserorsailarmiglo, angajoᴋâmingnik tapatojoᴋsôlarmiglo;

³¹ Silaitoᴋsôlarmiglo, okpernaitoᴋsôlarmiglo, naglingitoᴋsôlarmiglo saimajuitoᴋsôlarmiglo, takupsoajuitoᴋsôlarmiglo.

³² Taipkoa Gûdib idluarninganik ᴋaujimagalloarlutik (taimailiortut toᴋotaksaungmatta,) nangmineᴋ taimailiortuinangilat assitigle taimailiortut ᴋuviagivait aglât.