Obadia 1 - Labrador Inuttitut Heritage Bible

¹ Obadiab takotitjutigilauᴋtangit. Imâk oᴋarpoᴋ Nâlegaᴋ Nâlegaujoᴋ Edome pivlugo: Tusalauᴋpogut oᴋautsinik Nâlekamit, aᴋpârtorlo tilijauvoᴋ inôᴋatigêksuit akornganut, oᴋarpoᴋ: Makileritse, sorᴋsugvigijartorlavut.

² Ahâk, mikijôtipagit inôᴋatigêksuit akorngane, naggogijaudlarpotit.

³ Omativît pingijainingata uivêrivâtit, igvit ineᴋartotit ᴋairtut ᴋongnângine, poᴋtojome ineᴋartotit; ômatingne oᴋartotit: kia nunamut kataktinajarᴋângâ?

⁴ Nektoraliktut ᴋongmuartigigaloaruvit, Uvloᴋaraloaruvillo uvloriat akorngane, tagvangat kataktitsomavagit, oᴋarpoᴋ Nâlegaᴋ.

⁵ Tigliktut tikinajarpâtit, arᴋtaijullônêt unnuarme, (ingmigolingatitaudlartotit!) tiglidlarajangilât nâmaksiᴋârtinagît? Vaineliksanik katersoijut tikinajarpatit, vaineliksat piunginerlukunginik piksarnik ᴋemainajangilât?

⁶ Esauib perᴋutingit nagvârtaudlarput, pivianartokutingit ijertortaujut naipitaudlarput.

⁷ Angiᴋatigilauᴋtavît ilûnatik nunab kiglinganut aulartipâtit; ulapirᴋsauteᴋaᴋatigijavît uivêrivâtit saglogilutillo; nerriᴋatigijatît mikigitjerput atingne; malugosuktoᴋangilarlo.

⁸ Uvlorme tâpsomane ilisimajut pêjarniangilakkâ Edomemit, silatunerlo Esauib ᴋaᴋᴋanganît?

⁹ Pitsartujoᴋotitillo, Teman, kapiasudlaromârput, ilûnamaritik kipijauᴋovlugit Esauib ᴋaᴋᴋanganit, inuartauvlutik.

¹⁰ Idluitulinerilauᴋtatit nukarnut Jâkomut pitjutigivlugit kangusungnerub ulilârpâtit, kipijaulârpotillo issoᴋangitomut.

¹¹ Uvlorme tâpsomane kamatailivlutit nangilauᴋpotit, uvlorme tâpsomane takorngartat kongmarutingmatsuk katersortaminik, takorngartâllo itâlaungmatta itertarvingitigut, Jerusalemelo imerautigilugo, ilâ, taipsomane taipkoa ilangatut ilauᴋpotit.

¹² Nukavikpîllo uvlunga takonârniarnago pît, uvlorme ajaktortauvingane, Jûdablo ᴋitorngangit ᴋuviasûtiginiarnagit kapiasungningita uvlungane; pingijainartuniglo oᴋauseᴋarniarnak uvlorme kapianartovingme.

¹³ Inuᴋotima itertarvianut iterniarnak kappiasungningita uvlungane; ilâ, kappiasungninginik takonârniarnak kappiasungningita uvlungane, perᴋutingillo isakviginiarnagit kappiasungningita uvlungane.

¹⁴ Nangerniarnaglo apᴋosinerne kipungajune ᴋemâjungit kipijomavlugit; tigujautiniarnagillo tâpsoma amiakorijangit kappiasungningita uvlungane.

¹⁵ Nâlekab uvlunga ᴋaglimat inôᴋatigêksoarnut tamainut; sôrlo igvit piniaravit, taimâk piniarviolârpôtit; piniarnît utilârpoᴋ niaᴋungnut.

¹⁶ Sôrlo ilipse imilaurapse ᴋaᴋᴋamne ivsornaitome, Taimâk inôᴋatigêksuit ilûnatik imilârput; ilâ, imilârput êsilutiglo, pisimangitutitullo ilingalârput.

¹⁷ ᴋaᴋᴋamele Zioneme ᴋemâsimajoᴋaromârpoᴋ, ivsornaijomârporlo tâmna; Jâkoblo ᴋitorngangita perᴋutigilârpait perᴋutigilauᴋtatik.

¹⁸ Jâkoblo ᴋitorngangitaumaujomârput, Jôsefiblo ᴋitorngangit ikomaujomârput, Esauiblo ᴋitorngangit iviub kipakungititut ilârput, amiakoᴋaromângilarlo Esauib ᴋitornganginit; Nâlekab tamanna oᴋautigingmago.

¹⁹ Seᴋinermiulle pigilârpât Esauib ᴋaᴋᴋanga, Filisterillo pigilârpait naᴋsangit; pigilârpaittauᴋ Efraimib naᴋsanga Samariablo naᴋsanga; Benjamiblo Gilead pigilârpâ.

²⁰ Aularutijaujullo Israêlib ᴋitorngangita katimgajunginit tamakkonangat, Kanaanemiut akornganêtut, pigilârpât Zarefat tikidlugo, aularutijaujullo Jerusalemit, Sefaradamêtut, pigilârpait iglugasaksuit seᴋinerdlit.

²¹ Piuliklertuksallo majuaromârput Zionib ᴋaᴋᴋanganut idluarsaromavlugit Esauib ᴋaᴋᴋanganêtut, nâlegauviglo Nâlekab pigilârpâ.