Numbers 9 - Labrador Inuttitut Heritage Bible

¹ Nalekablo Mosese oᴋarvigivâ sunaᴋajuitome Sinaime, jârib aipangata taᴋᴋingita sivorlerpângane, nunamit Egiptenemit aularningita kingorngane, oᴋarlune:

² Israêlikut aularviksiorlit neliuningane perᴋojaujome.

³ Taᴋᴋib tâpsoma uvlungita 14ingane, unnûk tuglerêk akorngangne uvloᴋsiorutigijaksarivase neliuningane perᴋojaujome; perᴋojat maligaksauᴋojallo ilûnaita tâmna pivlugo maliklugit, uvloᴋsiorutigijaksarivase.

⁴ Mosesiblo Israêlikut oᴋautivait aularviksiortuksaugamik.

⁵ Aularviksiorpullo taᴋᴋit sivorlerpângane uvlut 14ingane, unnûk tuglerêk akorngangne, sunaᴋajuitome Sinaime; Nâlekab perᴋojangit tamaita Mosesemut maliklugit; taimailiorput Israêlikut.

⁶ Inuᴋalauᴋporlo ivsornartitaujunik inuk toᴋungajoᴋ pivlugo, taimaimallo aularviksiorᴋataujungnangilat uvlorme tâpsomane; tâpkoalo Mosesib Aroniblo sânganôrput uvlorme tâpsomane.

⁷ Oᴋautilugiglo: Ivsornarpogut inuk toᴋungajoᴋ pivlugo; suna pivlugole agviartauvitâ tunitjiᴋataujungnarluta Nâlekab tunergusiarijaksanganik neliutome perᴋojaujome Israêlikut akornganê?

⁸ Mosesiblo oᴋautivait: Utaᴋileritse, tusarungnarᴋovlunga sumik Nâlegaᴋ perᴋojiniarmangât pivluse.

⁹ Nalekablo Mosese oᴋarvigivâ, oᴋarlune:

¹⁰ Israêlikut oᴋarvigikit, oᴋarlutit: Ilapse ilangat kinguvâpselônêt ilangat ivsornarpat toᴋungajoᴋ pivlugo, ᴋaningitoliarsimakpallônêt, sulle aularviksiortuksauvoᴋ Nâlekamut:

¹¹ Taᴋᴋit aipangata uvlungita 14ingane, unnûk tuglerêk akorngangne uvloᴋsiorutigijaksarivât; nerrijaksarivât niaᴋôjarmik pubjusauteᴋangitomik perortuniglo sungarnitunik aipiujaᴋartilugo;

¹² Ilangalônêt torᴋoraksarilungilât ᴋaupamut, sauningitalo neliat navigaksaringilât; maligaksat tamaita aularviksiorutiksaᴋ pivlugo maliklugit uvloᴋsioraksarivât.

¹³ Inugle ivsornartitaungitoᴋ aularsimangitorlo uvloᴋsiorᴋatautailijorle uvloᴋsiorvingmik, tâmna avitaujuksauvoᴋ inôᴋatiminit; tunitjilaunginame Nâlekab tunergusiarijaksanganik neliutome perᴋojaujome, tâmna nangmartuksauvoᴋ idluinerminik.

¹⁴ Takorngartarlo nunaᴋarpat akunapsingne, aularvik siorvingmiglo uvloᴋsiorᴋataujomavlune Nâlekamut, taimailiortuksauvoᴋ perᴋojaᴋ maligaksauᴋojallo aularviksiorvik pivlugo maliklugit; perᴋojatuaᴋartuksauvose takorngartarmullo nunamelo inûlertomut ilingajomik.

¹⁵ Uvlormelo tupiub napartitauvingane nuvujab tupeᴋ ulikpâ, tagva tupeᴋ kigligiutjineᴋtalik; unnungmallo tupiub ᴋânganêpoᴋ sorlo ikomaujârtoᴋ, uvlâᴋ tikidlugo.

¹⁶ Taimaitsainarpoᴋ; nuvujab ulikpâ, unnuarmelo ikomaujârtûb.

¹⁷ Nuvujarlo ᴋangatartitaujarangat tupiub ᴋânganit, Israêlikut ingergarput; inimelo nuvujab noᴋangavigijangane, tagvane Israêlikut tangmârterput.

¹⁸ Nâlegaᴋ perᴋojingmat Israêlikut ingergarput, Nâlegarlo perᴋojingmat tangmârput: nuvujab tupiub ᴋânganêninga nâvlugo tangmârput.

¹⁹ Nuvujarlo tupiub ᴋânganêtsainarpat uvlunik unuktunik, Israêlikut nâlekput Nâlekab pijomajanganik, ingergalugatiglo.

²⁰ Ilanganelo nuvujaᴋ tupiub ᴋânganêpoᴋ uvlunik ikitunik; tagva Nâlekab perᴋojanga maliklugo tangmârterput, Nâlekablo perᴋojanga maliklugo ingergarput.

²¹ Ilanganelo nuvujaᴋ unnungmit uvlâᴋ tikidlugo tagvanêpoᴋ; nuvujarlo ᴋangatartitaukpat uvlâkut, ingergarput; uvlorle unnuarlo nâvlugo tagvanêtsainarpat, tagva ᴋangatartitautuarpat, ingergarput.

²² Adsigêkpoᴋ uvlûk maggûk nâvlugik, taᴋᴋerlônêt nâvlugo, jârelônêt nâvlugo nuvujaᴋ noᴋangamangât tupiub ᴋângane, nûtsuilune, Israêlikut tangmârsimatsainarput, ingergarlugatiglo; ᴋangatartuarpalle, tagva ingergalerivut.

²³ Nâlekab perᴋojanga maliklugo tangmârterput, Nâlekablo perᴋojanga maliklugo ingergarput: nâlekput Nâlekab pijomajanganik, Nâlekab perᴋojanga Mosesekut maliklugo.