Numbers 8 - Labrador Inuttitut Heritage Bible

¹ Nalekablo Mosese oᴋarvigivâ, oᴋarlune:

² Arone oᴋarvigiuk, oᴋautilugolo: Kollit âᴋiksorungne, ᴋollit sevenit ᴋaumaijuksauvut nenneroaᴋarviub sânganêtunik.

³ Aronelo taimailiorpoᴋ; ᴋollingit âᴋiksorpait ᴋaumaiᴋovlugit nenneroaᴋarviub sânganêtunik, sorlo Nâlekab Mosese perᴋongmago.

⁴ Tamadjalo nenneroaᴋarviub senamaninga, goldemit katjuksimajomit; ikkogganganut nuvugulângoanginullo katjuksimajôvoᴋ; ôktûte Nâlekab unertutijanga Mosesemut maliklugo, taimak nenneroaᴋarvik senavâ.

⁵ Nalekablo Mosese oᴋarvigivâ, oᴋarlune:

⁶ Levikut aptikit Israêlikunit, ivsornaitikillo.

⁷ Imailiorvigijaksarivatillo ivsornaitilugit; imeᴋ ulapᴋosertautiksaᴋ serᴋerautigijaksarivat tâpkonunga, tâpkoalo uviningmingnik ilûnâne umgijaumut umgijartuksauvut, annorâtiglo ergortorlugit, nangminermingniglo ivsornaitilutik.

⁸ Tâpkoalo tuktuvak inôtsuk, tunergutiksangalo nerᴋiksaᴋ, senaugatsiaᴋ orᴋsumut akusimajoᴋ, tigujaksarivakit, igvillo tuktuvaub tâpsoma assia inôtsuk tigujaksarivat tunergutiksauᴋovlugo ajortoêrutiksamik.

⁹ Levikullo saᴋᴋertitaksarivatit ilagêktut tupingata sângane; ilagêktullo Israêlikut iluengartut katimatitaksarivatit;

¹⁰ Levikullo saᴋᴋertitaksarivatit Nâlekab sânganut, Israêlikullo aggangmingnut Levikut patingmijaksarivait;

¹¹ Aroniblo Levikut tunergutigijaksarivait tunergutiksaᴋ isautijauᴋattartoᴋ Nâlekab sângane Israêlikut pivlugit, kivgartortuksauᴋovlugit Nâlekab kivgartortauningane.

¹² Levikullo aggangmingnut tuktuvâk niaᴋôgik patingmijaksarivakit; igvillo aipâ tunergutigijaksarivat tunergutiksaᴋ ajortoêrutiksaᴋ, aipangalo tunergutiksaᴋ ôtaksaᴋ, Nâlekamut, Levikut ulapᴋosertauᴋovlugit.

¹³ Levikullo saᴋᴋertitaksarivatit Aronib erningitalo sânginut, tunergutigilugillo tunergutiksaᴋ isautijauᴋattartoᴋ Nâlekamut.

¹⁴ Taimak Levikut aptitaksarivatit Israêlikut akornganit; Levikullo perᴋutigijomavakka.

¹⁵ Tamattomalo tungâne Levikut itertuksauvut ilagêktut tupingata kivgartûsingit piniaromavlugit; ivsornaititaksarivatillo, tunergutigilugillo tunergutiksaᴋ isautijauᴋattartoᴋ.

¹⁶ Tunijaumaringmatta uvamnut Israêlikut akornganit; igliarmik angmaijut ilûnaita Israêlikut ilûnatik pijariorutingit simerlugit tiguvakka nangminerijomavlugit.

¹⁷ Pijariorutit ilûnaita Israêlikut akorngane, inungnelo nergjutinelo, perᴋutigivakka; uvlorme annaunivigilauᴋtamne pijariorutinik tamainik nuname Egipteneme annerilauᴋpakka nangminerijomavlugit.

¹⁸ Levikullo tiguvakka pijariorutit ilûnaita Israêlikune simerlugit.

¹⁹ Levikullo piliutigivakka Aronemut erninginullo Israêlikut akornganit, piniarᴋovlugit Israêlikut kivgartorutinginik ilagêktut tupingane, ulapᴋosêᴋovlugillo Israêlikunik; nusilingnartoᴋarᴋonago Israêlikut akorngane, Israêlikut ᴋanilerajarpatta ivsornaitovingmut.

²⁰ Mosesiblo Aroniblo Israêlikullo ilagêngningita ilûnatik Levikut taimailiorvigivait; Nâlekab perᴋojangit ilûnaita Mosesemut maliklugit Levikut pitjutigilugit, taimak Israêlikut piniarvigivait.

²¹ Levikullo ajortoêrutivut nangminermingnik, annorâtiglo ergortorlugit; Aroniblo tunergutigivait tunergutiksaᴋ isautijaujoᴋ Nâlekab sângane; Aroniblo ulapirᴋsarpait ivsornaitilugit.

²² Kingornganelo Levikut iterput kivgartûtiksatik ilagêktut tupingane piniaromavlugit Aronib erningitalo sângine; sorlo Nâlekab Mosese perᴋongmago Levikut pitjutigilugit, taimailiorvigivait.

²³ Nalekablo Mosese oᴋarvigivâ, oᴋarlune:

²⁴ Tamadja Levikunut ilingajut; jâreᴋartut 25nik ununersaniglo kivgartoriartortuksauvut ilagêktut tupingata sulianginik;

²⁵ Jâreᴋarianginille 50nik sorairtuksauvut suliᴋataugiarmik, kivgartorungnailutiglo;

²⁶ Katangutitigle kamagijaksarivait, udjertorᴋatauvlutik, suliaᴋartuksaungilalle. Taimak Levikut piniarvigijaksarivatit udjertortuksauningit pitjutigivlugit.