Numbers 6 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Israêlikut oᴋarvigikit, oᴋautilugillo: Angut arnarlônêt angermarikpat adseungitomik, apsimautijûb angerninganik, tunijomavlune nangminerminik Nâlekamut;

³ Aglertuksauvoᴋ vainemik imiksamiglo pitsartudlartomik; imertuksaungilaᴋ sêrnartomik vainemit senamajomik, sêrnartomiglônêt imiksamit pitsartudlartomit senamajomik, imertuksaungilarlônêt vaineliksab paungangita iptinganik; nerrijuksaungilarlo vaineliksab paunganginik nutâniglônêt panertuniglônêt.

⁴ Aglervigijangita uvlungit nâvlugit sumiglônêt nerrijuksaungilaᴋ vaineliksamit senamajomik, saunanginiglônêt aminginiglônêt.

⁵ Angervigijame aglernermik uvlungit nâvlugit, kibjautik atortuksaungilak niaᴋunganut, uvlut, angerutigijane ingmigolingajomavlune Nâlekamut, nâmaksiᴋârtinagit, ivsornaidlartuksauvoᴋ, niaᴋome nujangit erᴋisulângajut takijororᴋojaksarivait.

⁶ Uvlut Nâlekamut ingmigôlingavigijomajangit nâvlugit ᴋanilertuksaungilaᴋ toᴋungajomut.

⁷ Nangminerminik ivsornartituksaungilaᴋ atâtane pivlugo, anânanelônêt, ᴋatangutinelônêt angut, najanelônêt pivlugit, toᴋopatta; ingmigôlingajomanine Gûdemut niaᴋominêngmat.

⁸ Ingmigôlingajomanime uvlungit nâvlugit ivsornaidlarpoᴋ Nâlekamut.

⁹ Tagvainârtomik inôjungnaitoᴋarpat tâpsoma seniane, tâmnalo ivsornartitsigune ingmigôlinganime niaᴋoanik; tagva niaᴋone salijaksarivâ ivsornaititaulervime uvlungane, uvlut seveningane sâlijaksarivâ.

¹⁰ Uvlullo 8ingane ᴋaitsijuksauvoᴋ aᴋigeojârtûngnik maggûngnik aᴋigeojârᴋângniglônêt maggûngnik ajoᴋertuijomut, ilagêktut tupingata upkoanganut.

¹¹ Ajoᴋertuijûblo aipâ tunergutigijaksarivâ ajortoêrutiksamik, aipangalo tunergutiksamik ôtaksamik, tâpsoma ulapᴋosertauniksanganut, toᴋungajoᴋ pitjutigivlugo idluitulilaungmat, niaᴋonelo ivsornaititaksarivâ uvlorme tâpsomane.

¹² Ingmigôlingatinimelo nangminerminik Nâlekamut uvlungit ingmigôlingatitaksarivait, saugârsungmiglo angusalormik, atautsemik jârelingmik, ᴋaitsijuksauvoᴋ tunergutiksamik passijaungijutiksamik; uvlulle sivorlît sulijungnaiput, ingmigôlinganine ivsornartitaulaungmat.

¹³ Tamadjalo perᴋojaᴋ apsimautijomut, ingmigôlinganingata uvlungit nâmaksikpatta; âtaujuksauvoᴋ ilagêktut tupingata upkoanganut;

¹⁴ Tunergutiksaminiglo Nâlekamut tunitjijuksauvoᴋ, saugârsungmik angutimik, atautsemik jârelingnik, ᴋanoetoᴋangitomik, tunergutiksauᴋovlugo ajortoêrutiksamik, angusalormiglo ᴋanoetoᴋangitomik, tunergutiksauᴋovlugo ᴋujaliutiksamik,

¹⁵ Amargaujarmiglo niaᴋôjaᴋtalingmik pubjusauteᴋangitunik, ᴋaᴋᴋôjaniglo sâtunik, senaugatsiarmik orᴋsumut akᴋusimajomik, ᴋaᴋᴋôjârsungniglo sâpatânik pubjusauteᴋangitunik orᴋsumut mingoarsimajunik, tunergutiksaᴋ senaugaᴋ tunergutiksarlo imiksaᴋ ilagilugik.

¹⁶ Ajoᴋertuijûblo âtaksarivait Nâlekab sânganut, tunergutiksaᴋ ajortoêrutiksaᴋ, tunergutiksarlo ôtaksaᴋ, tunergutigijaksarivak;

¹⁷ Angusalorlo tunergutigijaksarivâ tunergutiksaᴋ ᴋujaliutiksaᴋ Nâlekamut, amargaujaᴋ pubjusauteᴋangitunik niaᴋôjaᴋtalik ilagilugo; tunergutiksarlo senaugaᴋ, tunergutiksarlo imiksaᴋ ajoᴋertuijûb tunergutigijaksarivak.

¹⁸ Apsimautijûblo niaᴋone, ingmigôlinganerminik nelonaijaijoᴋ, salijaksarivâ ilagêktut tupingata upkoangane, niaᴋomelo, ingmigôlinganerminik nelonaijaijûb, nujangit tigujaksarivait egilugillo ikomamut, tunergutiksab ᴋujaliutiksab atânêtomut.

¹⁹ Ajoᴋertuijûblo angusalûb talîkita iglua ôjoᴋ, ᴋaᴋᴋôjarlo sâtoᴋ pubjusauteᴋangitoᴋ atauseᴋ amargaujarmit, ᴋaᴋᴋôjârsuglo sâpatâᴋ pubjusauteᴋangitoᴋ atauseᴋ tigujaksarivait ililugillo apsimautijûb agganginut, salimajarêrpat niaᴋominik, ingmigôlinganerminik nelonaijaijomik;

²⁰ Ajoᴋertuijûblo issautiᴋattaraksarivait tunergutiksauᴋovlugit isautijaujoᴋ Nâlekab sângane; tamakkoa ivsornaiput ajoᴋertuijomut, sakkiaᴋ isautijauᴋattartoᴋ talerlo isautijaujoᴋ ᴋongmut ilagilugik; mattomalo kingorngane apsimautijovineᴋ vainetorungnarpoᴋ.

²¹ Tamadja perᴋojat apsimautijoᴋ angermariktoᴋ pivlugo, tunergutiksangalo ingmigôlingatinine nangminerminik Nâlekamut pivlugo, sapilungitanga tapiksautilugo; angernerijanga angerutigijanga maliklugo, taimailiortuksauvoᴋ perᴋojaᴋ ingmigôlingatitoᴋ pivlugo maliklugo.

²² Nâlekablo Mosese oᴋarvigivâ, oᴋarlune:

²³ Arone erningillo oᴋarvigikit, oᴋarlutit: Imâk Israêlikut saimartitaksarivase; oᴋautijaksarivase,

²⁴ Nâlekab pitsartutilitit saputilitillo,

²⁵ Nâlekab kênarminut ᴋaumarsârlitit saimartilitillo,

²⁶ Nâlekab kênarminut ᴋolangiarlitit, ulapirᴋsautiminiglo tunitjivigilitit.

²⁷ Taimâk attera pitilârpât Israêlikunut, saimarsaromavakkalo.